ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ତ୍ରିଚତ୍ଵାରିଂଶସ୍ସର୍ଗଃ ।
ତତସ୍ସ କିଂକରାନ୍ହତ୍ଵା ହନୁମାଂଧ୍ୟାନମାସ୍ଥିତଃ ।
ଵନଂ ଭଗ୍ନଂ ମୟା ଚୈତ୍ୟପ୍ରାସାଦୋ ନ ଵିନାଶିତଃ ॥ 1 ॥
ତସ୍ମାତ୍ପ୍ରାସାଦମପ୍ୟେଵଂ ଭୀମଂ ଵିଧ୍ଵଂସୟାମ୍ୟହମ୍ ।
ଇତି ସଂଚିଂତ୍ୟ ମନସା ହନୁମାଂଦର୍ଶୟନ୍ବଲମ୍ ॥ 2 ॥
ଚୈତ୍ୟପ୍ରାସାଦମାପ୍ଲୁତ୍ୟ ମେରୁଶୃଂଗମିଵୋନ୍ନତମ୍ ।
ଆରୁରୋହ କପିଶ୍ରେଷ୍ଠୋ ହନୁମାନ୍ମାରୁତାତ୍ମଜଃ ॥ 3 ॥
ଆରୁହ୍ୟ ଗିରିସଂକାଶଂ ପ୍ରାସାଦଂ ହରିୟୂଥପଃ ।
ବଭୌ ସ ସୁମହାତେଜାଃ ପ୍ରତିସୂର୍ୟ ଇଵୋଦିତଃ ॥ 4 ॥
ସଂପ୍ରଧୃଷ୍ୟ ଚ ଦୁର୍ଧର୍ଷଂ ଚୈତ୍ୟପ୍ରାସାଦମୁତ୍ତମମ୍ ।
ହନୁମାନ୍ପ୍ରଜ୍ଵଲନ୍ଲକ୍ଷ୍ମ୍ୟା ପାରିୟାତ୍ରୋପମୋଽଭଵତ୍ ॥ 5 ॥
ସ ଭୂତ୍ଵା ସୁମହାକାୟଃ ପ୍ରଭାଵାନ୍ମାରୁତାତ୍ମଜଃ ।
ଧୃଷ୍ଟମାସ୍ଫୋଟୟାମାସ ଲଂକାଂ ଶବ୍ଦେନ ପୂରୟନ୍ ॥ 6 ॥
ତସ୍ୟାସ୍ଫୋଟିତଶବ୍ଦେନ ମହତା ଶ୍ରୋତ୍ରଘାତିନା ।
ପେତୁର୍ଵିହଂଗମାସ୍ତତ୍ର ଚୈତ୍ୟପାଲାଶ୍ଚ ମୋହିତାଃ ॥ 7 ॥
ଅସ୍ତ୍ରଵିଜ୍ଜୟତାଂ ରାମୋ ଲକ୍ଷ୍ମଣଶ୍ଚ ମହାବଲଃ ।
ରାଜା ଜୟତି ସୁଗ୍ରୀଵୋ ରାଘଵେଣାଭିପାଲିତଃ ॥ 8 ॥
ଦାସୋଽହଂ କୋସଲେଂଦ୍ରସ୍ୟ ରାମସ୍ୟାକ୍ଲିଷ୍ଟକର୍ମଣଃ ।
ହନୁମାନ୍ଶତ୍ରୁସୈନ୍ୟାନାଂ ନିହଂତା ମାରୁତାତ୍ମଜଃ ॥ 9 ॥
ନ ରାଵଣସହସ୍ରଂ ମେ ୟୁଦ୍ଧେ ପ୍ରତିବଲଂ ଭଵେତ୍ ।
ଶିଲାଭିସ୍ତୁ ପ୍ରହରତଃ ପାଦପୈଶ୍ଚ ସହସ୍ରଶଃ ॥ 10 ॥
ଅର୍ଦୟିତ୍ଵା ପୁରୀଂ ଲଂକାମଭିଵାଦ୍ୟ ଚ ମୈଥିଲୀମ୍ ।
ସମୃଦ୍ଧାର୍ଥୋ ଗମିଷ୍ୟାମି ମିଷତାଂ ସର୍ଵରକ୍ଷସାମ୍ ॥ 11 ॥
ଏଵମୁକ୍ତ୍ଵା ଵିମାନସ୍ଥଶ୍ଚୈତ୍ୟସ୍ଥାନ୍ହରିୟୂଥପଃ ।
ନନାଦ ଭୀମନିର୍ହ୍ରାଦୋ ରକ୍ଷସାଂ ଜନୟନ୍ଭୟମ୍ ॥ 12 ॥
ତେନ ଶବ୍ଦେନ ମହତା ଚୈତ୍ୟପାଲାଶ୍ଶତଂ ୟୟୁଃ ।
ଗୃହୀତ୍ଵା ଵିଵିଧାନସ୍ତ୍ରାନ୍ପ୍ରାସାନ୍ଖଂଗାନ୍ପରଶ୍ଵଥାନ୍ ॥ 13 ॥
ଵିସୃଜଂତୋ ମହାକାୟା ମାରୁତିଂ ପର୍ୟଵାରୟନ୍ ।
ତେ ଗଦାଭିର୍ଵିଚିତ୍ରାଭିଃ ପରିଘୈଃ କାଂଚନାଂଗଦୈଃ ।
ଆଜଘ୍ନୁର୍ଵାନରଶ୍ରେଷ୍ଠଂ ବାଣୈଶ୍ଚାଦିତ୍ୟସନ୍ନିଭୈଃ ॥ 14 ॥
ଆଵର୍ତ ଇଵ ଗଂଗାୟାସ୍ତୋୟସ୍ୟ ଵିପୁଲୋ ମହାନ୍ ।
ପରିକ୍ଷିପ୍ୟ ହରିଶ୍ରେଷ୍ଠଂ ସ ବଭୌ ରକ୍ଷସାଂ ଗଣଃ ॥ 15 ॥
ତତୋ ଵାତାତ୍ମଜଃ କ୍ରୁଦ୍ଧୋ ଭୀମ ରୂପଂ ସମାସ୍ଥିତଃ ॥ 16 ॥
ପ୍ରାସାଦସ୍ୟ ମହଂତସ୍ୟ ସ୍ତଂବଂ ହେମପରିଷ୍କୃତମ୍ ।
ଉତ୍ପାଟୟିତ୍ଵା ଵେଗେନ ହନୁମାନ୍ପଵନାତ୍ମଜଃ ॥ 17 ॥
ତତସ୍ତଂ ଭ୍ରାମୟାମାସ ଶତଧାରଂ ମହାବଲଃ ।
ତତ୍ର ଚାଗ୍ନିସ୍ସମଭଵତ୍ପ୍ରାସାଦଶ୍ଚାପ୍ୟଦହ୍ୟତ ॥ 18 ॥
ଦହ୍ୟମାନଂ ତତୋ ଦୃଷ୍ଟ୍ଵା ପ୍ରାସାଦଂ ହରିୟୂଥପଃ ।
ସ ରାକ୍ଷସଶତଂ ହତ୍ତ୍ଵା ଵଜ୍ରେଣେଂଦ୍ର ଇଵାସୁରାନ୍ ॥ 19 ॥
ଅଂତରିକ୍ଷେ ସ୍ଥିତଶ୍ଶ୍ତୀମାନିଦଂ ଵଚନମବ୍ରଵୀତ୍ ।
ମାଦୃଶାନାଂ ସହସ୍ରାଣି ଵିସୃଷ୍ଟାନି ମହାତ୍ମନାମ୍ ॥ 20 ॥
ବଲିନାଂ ଵାନରେଂଦ୍ରାଣାଂ ସୁଗ୍ରୀଵଵଶଵର୍ତିନାମ୍ ।
ଅଟଂତି ଵସୁଧାଂ କୃତ୍ସ୍ନାଂ ଵୟମନ୍ୟେ ଚ ଵାନରାଃ ॥ 21 ॥
ଦଶନାଗବଲାଃ କେଚିତ୍କେଚିଦ୍ଦଶଗୁଣୋତ୍ତରାଃ ।
କେଚିନ୍ନାଗସହସ୍ରସ୍ୟ ବଭୂଵୁସ୍ତୁଲ୍ୟଵିକ୍ରମାଃ ॥ 22 ॥
ସଂତି ଚୌଘବଲାଃ କେଚିତ୍କେଚିଦ୍ଵାୟୁବଲୋପମାଃ ।
ଅପ୍ରମେୟବଲାଶ୍ଚାନ୍ୟେ ତତ୍ରାସନ୍ହରିୟୂଥପାଃ ॥ 23 ॥
ଈଦୃଗ୍ଵିଧୈସ୍ତୁ ହରିଭିର୍ଵୃତୋ ଦଂତନଖାୟୁଧୈଃ ।
ଶତୈଶ୍ଶତସହସ୍ରୈଶ୍ଚ କୋଟୀଭିରୟୁତୈରପି ॥ 24 ॥
ଆଗମିଷ୍ୟତି ସୁଗ୍ରୀଵଃ ସର୍ଵେଷାଂ ଵୋ ନିଷୂଦନଃ ।
ନେୟମସ୍ତି ପୁରୀ ଲଂକା ନ ୟୂୟଂ ନ ଚ ରାଵଣଃ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ତ୍ରିଚତ୍ଵାରିଂଶସ୍ସର୍ଗଃ ॥
