śrīmadvālmīkīya rāmāyaṇē sundarakāṇḍam ।
atha trichatvāriṃśassargaḥ ।
tatassa kiṅkarānhatvā hanumāndhyānamāsthitaḥ ।
vanaṃ bhagnaṃ mayā chaityaprāsādō na vināśitaḥ ॥ 1 ॥
tasmātprāsādamapyēvaṃ bhīmaṃ vidhvaṃsayāmyaham ।
iti sañchintya manasā hanumāndarśayanbalam ॥ 2 ॥
chaityaprāsādamāplutya mēruśṛṅgamivōnnatam ।
ārurōha kapiśrēṣṭhō hanumānmārutātmajaḥ ॥ 3 ॥
āruhya girisaṅkāśaṃ prāsādaṃ hariyūthapaḥ ।
babhau sa sumahātējāḥ pratisūrya ivōditaḥ ॥ 4 ॥
sampradhṛṣya cha durdharṣaṃ chaityaprāsādamuttamam ।
hanumānprajvalanlakṣmyā pāriyātrōpamō'bhavat ॥ 5 ॥
sa bhūtvā sumahākāyaḥ prabhāvānmārutātmajaḥ ।
dhṛṣṭamāsphōṭayāmāsa laṅkāṃ śabdēna pūrayan ॥ 6 ॥
tasyāsphōṭitaśabdēna mahatā śrōtraghātinā ।
pēturvihaṅgamāstatra chaityapālāścha mōhitāḥ ॥ 7 ॥
astravijjayatāṃ rāmō lakṣmaṇaścha mahābalaḥ ।
rājā jayati sugrīvō rāghavēṇābhipālitaḥ ॥ 8 ॥
dāsō'haṃ kōsalēndrasya rāmasyākliṣṭakarmaṇaḥ ।
hanumānśatrusainyānāṃ nihantā mārutātmajaḥ ॥ 9 ॥
na rāvaṇasahasraṃ mē yuddhē pratibalaṃ bhavēt ।
śilābhistu praharataḥ pādapaiścha sahasraśaḥ ॥ 10 ॥
ardayitvā purīṃ laṅkāmabhivādya cha maithilīm ।
samṛddhārthō gamiṣyāmi miṣatāṃ sarvarakṣasām ॥ 11 ॥
ēvamuktvā vimānasthaśchaityasthānhariyūthapaḥ ।
nanāda bhīmanirhrādō rakṣasāṃ janayanbhayam ॥ 12 ॥
tēna śabdēna mahatā chaityapālāśśataṃ yayuḥ ।
gṛhītvā vividhānastrānprāsānkhaṅgānparaśvathān ॥ 13 ॥
visṛjantō mahākāyā mārutiṃ paryavārayan ।
tē gadābhirvichitrābhiḥ parighaiḥ kāñchanāṅgadaiḥ ।
ājaghnurvānaraśrēṣṭhaṃ bāṇaiśchādityasannibhaiḥ ॥ 14 ॥
āvarta iva gaṅgāyāstōyasya vipulō mahān ।
parikṣipya hariśrēṣṭhaṃ sa babhau rakṣasāṃ gaṇaḥ ॥ 15 ॥
tatō vātātmajaḥ kruddhō bhīma rūpaṃ samāsthitaḥ ॥ 16 ॥
prāsādasya mahantasya stambaṃ hēmapariṣkṛtam ।
utpāṭayitvā vēgēna hanumānpavanātmajaḥ ॥ 17 ॥
tatastaṃ bhrāmayāmāsa śatadhāraṃ mahābalaḥ ।
tatra chāgnissamabhavatprāsādaśchāpyadahyata ॥ 18 ॥
dahyamānaṃ tatō dṛṣṭvā prāsādaṃ hariyūthapaḥ ।
sa rākṣasaśataṃ hattvā vajrēṇēndra ivāsurān ॥ 19 ॥
antarikṣē sthitaśśtīmānidaṃ vachanamabravīt ।
mādṛśānāṃ sahasrāṇi visṛṣṭāni mahātmanām ॥ 20 ॥
balināṃ vānarēndrāṇāṃ sugrīvavaśavartinām ।
aṭanti vasudhāṃ kṛtsnāṃ vayamanyē cha vānarāḥ ॥ 21 ॥
daśanāgabalāḥ kēchitkēchiddaśaguṇōttarāḥ ।
kēchinnāgasahasrasya babhūvustulyavikramāḥ ॥ 22 ॥
santi chaughabalāḥ kēchitkēchidvāyubalōpamāḥ ।
apramēyabalāśchānyē tatrāsanhariyūthapāḥ ॥ 23 ॥
īdṛgvidhaistu haribhirvṛtō dantanakhāyudhaiḥ ।
śataiśśatasahasraiścha kōṭībhirayutairapi ॥ 24 ॥
āgamiṣyati sugrīvaḥ sarvēṣāṃ vō niṣūdanaḥ ।
nēyamasti purī laṅkā na yūyaṃ na cha rāvaṇaḥ ॥ 25 ॥
ityārṣē śrīmadrāmāyaṇē vālmīkīya ādikāvyē sundarakāṇḍē trichatvāriṃśassargaḥ ॥
