ശ്രീമദ്വാല്മീകീയ രാമായണേ സുംദരകാംഡമ് ।
അഥ ത്രിചത്വാരിംശസ്സര്ഗഃ ।
തതസ്സ കിംകരാന്ഹത്വാ ഹനുമാംധ്യാനമാസ്ഥിതഃ ।
വനം ഭഗ്നം മയാ ചൈത്യപ്രാസാദോ ന വിനാശിതഃ ॥ 1 ॥
തസ്മാത്പ്രാസാദമപ്യേവം ഭീമം വിധ്വംസയാമ്യഹമ് ।
ഇതി സംചിംത്യ മനസാ ഹനുമാംദര്ശയന്ബലമ് ॥ 2 ॥
ചൈത്യപ്രാസാദമാപ്ലുത്യ മേരുശൃംഗമിവോന്നതമ് ।
ആരുരോഹ കപിശ്രേഷ്ഠോ ഹനുമാന്മാരുതാത്മജഃ ॥ 3 ॥
ആരുഹ്യ ഗിരിസംകാശം പ്രാസാദം ഹരിയൂഥപഃ ।
ബഭൌ സ സുമഹാതേജാഃ പ്രതിസൂര്യ ഇവോദിതഃ ॥ 4 ॥
സംപ്രധൃഷ്യ ച ദുര്ധര്ഷം ചൈത്യപ്രാസാദമുത്തമമ് ।
ഹനുമാന്പ്രജ്വലന്ലക്ഷ്മ്യാ പാരിയാത്രോപമോഽഭവത് ॥ 5 ॥
സ ഭൂത്വാ സുമഹാകായഃ പ്രഭാവാന്മാരുതാത്മജഃ ।
ധൃഷ്ടമാസ്ഫോടയാമാസ ലംകാം ശബ്ദേന പൂരയന് ॥ 6 ॥
തസ്യാസ്ഫോടിതശബ്ദേന മഹതാ ശ്രോത്രഘാതിനാ ।
പേതുർവിഹംഗമാസ്തത്ര ചൈത്യപാലാശ്ച മോഹിതാഃ ॥ 7 ॥
അസ്ത്രവിജ്ജയതാം രാമോ ലക്ഷ്മണശ്ച മഹാബലഃ ।
രാജാ ജയതി സുഗ്രീവോ രാഘവേണാഭിപാലിതഃ ॥ 8 ॥
ദാസോഽഹം കോസലേംദ്രസ്യ രാമസ്യാക്ലിഷ്ടകര്മണഃ ।
ഹനുമാന്ശത്രുസൈന്യാനാം നിഹംതാ മാരുതാത്മജഃ ॥ 9 ॥
ന രാവണസഹസ്രം മേ യുദ്ധേ പ്രതിബലം ഭവേത് ।
ശിലാഭിസ്തു പ്രഹരതഃ പാദപൈശ്ച സഹസ്രശഃ ॥ 10 ॥
അര്ദയിത്വാ പുരീം ലംകാമഭിവാദ്യ ച മൈഥിലീമ് ।
സമൃദ്ധാര്ഥോ ഗമിഷ്യാമി മിഷതാം സർവരക്ഷസാമ് ॥ 11 ॥
ഏവമുക്ത്വാ വിമാനസ്ഥശ്ചൈത്യസ്ഥാന്ഹരിയൂഥപഃ ।
നനാദ ഭീമനിര്ഹ്രാദോ രക്ഷസാം ജനയന്ഭയമ് ॥ 12 ॥
തേന ശബ്ദേന മഹതാ ചൈത്യപാലാശ്ശതം യയുഃ ।
ഗൃഹീത്വാ വിവിധാനസ്ത്രാന്പ്രാസാന്ഖംഗാന്പരശ്വഥാന് ॥ 13 ॥
വിസൃജംതോ മഹാകായാ മാരുതിം പര്യവാരയന് ।
തേ ഗദാഭിർവിചിത്രാഭിഃ പരിഘൈഃ കാംചനാംഗദൈഃ ।
ആജഘ്നുർവാനരശ്രേഷ്ഠം ബാണൈശ്ചാദിത്യസന്നിഭൈഃ ॥ 14 ॥
ആവര്ത ഇവ ഗംഗായാസ്തോയസ്യ വിപുലോ മഹാന് ।
പരിക്ഷിപ്യ ഹരിശ്രേഷ്ഠം സ ബഭൌ രക്ഷസാം ഗണഃ ॥ 15 ॥
തതോ വാതാത്മജഃ ക്രുദ്ധോ ഭീമ രൂപം സമാസ്ഥിതഃ ॥ 16 ॥
പ്രാസാദസ്യ മഹംതസ്യ സ്തംബം ഹേമപരിഷ്കൃതമ് ।
ഉത്പാടയിത്വാ വേഗേന ഹനുമാന്പവനാത്മജഃ ॥ 17 ॥
തതസ്തം ഭ്രാമയാമാസ ശതധാരം മഹാബലഃ ।
തത്ര ചാഗ്നിസ്സമഭവത്പ്രാസാദശ്ചാപ്യദഹ്യത ॥ 18 ॥
ദഹ്യമാനം തതോ ദൃഷ്ട്വാ പ്രാസാദം ഹരിയൂഥപഃ ।
സ രാക്ഷസശതം ഹത്ത്വാ വജ്രേണേംദ്ര ഇവാസുരാന് ॥ 19 ॥
അംതരിക്ഷേ സ്ഥിതശ്ശ്തീമാനിദം വചനമബ്രവീത് ।
മാദൃശാനാം സഹസ്രാണി വിസൃഷ്ടാനി മഹാത്മനാമ് ॥ 20 ॥
ബലിനാം വാനരേംദ്രാണാം സുഗ്രീവവശവര്തിനാമ് ।
അടംതി വസുധാം കൃത്സ്നാം വയമന്യേ ച വാനരാഃ ॥ 21 ॥
ദശനാഗബലാഃ കേചിത്കേചിദ്ദശഗുണോത്തരാഃ ।
കേചിന്നാഗസഹസ്രസ്യ ബഭൂവുസ്തുല്യവിക്രമാഃ ॥ 22 ॥
സംതി ചൌഘബലാഃ കേചിത്കേചിദ്വായുബലോപമാഃ ।
അപ്രമേയബലാശ്ചാന്യേ തത്രാസന്ഹരിയൂഥപാഃ ॥ 23 ॥
ഈദൃഗ്വിധൈസ്തു ഹരിഭിർവൃതോ ദംതനഖായുധൈഃ ।
ശതൈശ്ശതസഹസ്രൈശ്ച കോടീഭിരയുതൈരപി ॥ 24 ॥
ആഗമിഷ്യതി സുഗ്രീവഃ സർവേഷാം വോ നിഷൂദനഃ ।
നേയമസ്തി പുരീ ലംകാ ന യൂയം ന ച രാവണഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ത്രിചത്വാരിംശസ്സര്ഗഃ ॥
