શ્રીમદ્વાલ્મીકીય રામાયણે સુંદરકાંડમ્ ।
અથ ત્રિચત્વારિંશસ્સર્ગઃ ।
તતસ્સ કિંકરાન્હત્વા હનુમાંધ્યાનમાસ્થિતઃ ।
વનં ભગ્નં મયા ચૈત્યપ્રાસાદો ન વિનાશિતઃ ॥ 1 ॥
તસ્માત્પ્રાસાદમપ્યેવં ભીમં વિધ્વંસયામ્યહમ્ ।
ઇતિ સંચિંત્ય મનસા હનુમાંદર્શયન્બલમ્ ॥ 2 ॥
ચૈત્યપ્રાસાદમાપ્લુત્ય મેરુશૃંગમિવોન્નતમ્ ।
આરુરોહ કપિશ્રેષ્ઠો હનુમાન્મારુતાત્મજઃ ॥ 3 ॥
આરુહ્ય ગિરિસંકાશં પ્રાસાદં હરિયૂથપઃ ।
બભૌ સ સુમહાતેજાઃ પ્રતિસૂર્ય ઇવોદિતઃ ॥ 4 ॥
સંપ્રધૃષ્ય ચ દુર્ધર્ષં ચૈત્યપ્રાસાદમુત્તમમ્ ।
હનુમાન્પ્રજ્વલન્લક્ષ્મ્યા પારિયાત્રોપમોઽભવત્ ॥ 5 ॥
સ ભૂત્વા સુમહાકાયઃ પ્રભાવાન્મારુતાત્મજઃ ।
ધૃષ્ટમાસ્ફોટયામાસ લંકાં શબ્દેન પૂરયન્ ॥ 6 ॥
તસ્યાસ્ફોટિતશબ્દેન મહતા શ્રોત્રઘાતિના ।
પેતુર્વિહંગમાસ્તત્ર ચૈત્યપાલાશ્ચ મોહિતાઃ ॥ 7 ॥
અસ્ત્રવિજ્જયતાં રામો લક્ષ્મણશ્ચ મહાબલઃ ।
રાજા જયતિ સુગ્રીવો રાઘવેણાભિપાલિતઃ ॥ 8 ॥
દાસોઽહં કોસલેંદ્રસ્ય રામસ્યાક્લિષ્ટકર્મણઃ ।
હનુમાન્શત્રુસૈન્યાનાં નિહંતા મારુતાત્મજઃ ॥ 9 ॥
ન રાવણસહસ્રં મે યુદ્ધે પ્રતિબલં ભવેત્ ।
શિલાભિસ્તુ પ્રહરતઃ પાદપૈશ્ચ સહસ્રશઃ ॥ 10 ॥
અર્દયિત્વા પુરીં લંકામભિવાદ્ય ચ મૈથિલીમ્ ।
સમૃદ્ધાર્થો ગમિષ્યામિ મિષતાં સર્વરક્ષસામ્ ॥ 11 ॥
એવમુક્ત્વા વિમાનસ્થશ્ચૈત્યસ્થાન્હરિયૂથપઃ ।
નનાદ ભીમનિર્હ્રાદો રક્ષસાં જનયન્ભયમ્ ॥ 12 ॥
તેન શબ્દેન મહતા ચૈત્યપાલાશ્શતં યયુઃ ।
ગૃહીત્વા વિવિધાનસ્ત્રાન્પ્રાસાન્ખંગાન્પરશ્વથાન્ ॥ 13 ॥
વિસૃજંતો મહાકાયા મારુતિં પર્યવારયન્ ।
તે ગદાભિર્વિચિત્રાભિઃ પરિઘૈઃ કાંચનાંગદૈઃ ।
આજઘ્નુર્વાનરશ્રેષ્ઠં બાણૈશ્ચાદિત્યસન્નિભૈઃ ॥ 14 ॥
આવર્ત ઇવ ગંગાયાસ્તોયસ્ય વિપુલો મહાન્ ।
પરિક્ષિપ્ય હરિશ્રેષ્ઠં સ બભૌ રક્ષસાં ગણઃ ॥ 15 ॥
તતો વાતાત્મજઃ ક્રુદ્ધો ભીમ રૂપં સમાસ્થિતઃ ॥ 16 ॥
પ્રાસાદસ્ય મહંતસ્ય સ્તંબં હેમપરિષ્કૃતમ્ ।
ઉત્પાટયિત્વા વેગેન હનુમાન્પવનાત્મજઃ ॥ 17 ॥
તતસ્તં ભ્રામયામાસ શતધારં મહાબલઃ ।
તત્ર ચાગ્નિસ્સમભવત્પ્રાસાદશ્ચાપ્યદહ્યત ॥ 18 ॥
દહ્યમાનં તતો દૃષ્ટ્વા પ્રાસાદં હરિયૂથપઃ ।
સ રાક્ષસશતં હત્ત્વા વજ્રેણેંદ્ર ઇવાસુરાન્ ॥ 19 ॥
અંતરિક્ષે સ્થિતશ્શ્તીમાનિદં વચનમબ્રવીત્ ।
માદૃશાનાં સહસ્રાણિ વિસૃષ્ટાનિ મહાત્મનામ્ ॥ 20 ॥
બલિનાં વાનરેંદ્રાણાં સુગ્રીવવશવર્તિનામ્ ।
અટંતિ વસુધાં કૃત્સ્નાં વયમન્યે ચ વાનરાઃ ॥ 21 ॥
દશનાગબલાઃ કેચિત્કેચિદ્દશગુણોત્તરાઃ ।
કેચિન્નાગસહસ્રસ્ય બભૂવુસ્તુલ્યવિક્રમાઃ ॥ 22 ॥
સંતિ ચૌઘબલાઃ કેચિત્કેચિદ્વાયુબલોપમાઃ ।
અપ્રમેયબલાશ્ચાન્યે તત્રાસન્હરિયૂથપાઃ ॥ 23 ॥
ઈદૃગ્વિધૈસ્તુ હરિભિર્વૃતો દંતનખાયુધૈઃ ।
શતૈશ્શતસહસ્રૈશ્ચ કોટીભિરયુતૈરપિ ॥ 24 ॥
આગમિષ્યતિ સુગ્રીવઃ સર્વેષાં વો નિષૂદનઃ ।
નેયમસ્તિ પુરી લંકા ન યૂયં ન ચ રાવણઃ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે ત્રિચત્વારિંશસ્સર્ગઃ ॥
