ශ්රීමද්වාල්මීකීය රාමායණේ සුංදරකාංඩම් ।
අථ ත්රිචත්වාරිංශස්සර්ගඃ ।
තතස්ස කිංකරාන්හත්වා හනුමාංධ්යානමාස්ථිතඃ ।
වනං භග්නං මයා චෛත්යප්රාසාදෝ න විනාශිතඃ ॥ 1 ॥
තස්මාත්ප්රාසාදමප්යේවං භීමං විධ්වංසයාම්යහම් ।
ඉති සංචිංත්ය මනසා හනුමාංදර්ශයන්බලම් ॥ 2 ॥
චෛත්යප්රාසාදමාප්ලුත්ය මේරුශෘංගමිවෝන්නතම් ।
ආරුරෝහ කපිශ්රේෂ්ඨෝ හනුමාන්මාරුතාත්මජඃ ॥ 3 ॥
ආරුහ්ය ගිරිසංකාශං ප්රාසාදං හරියූථපඃ ।
බභෞ ස සුමහාතේජාඃ ප්රතිසූර්ය ඉවෝදිතඃ ॥ 4 ॥
සංප්රධෘෂ්ය ච දුර්ධර්ෂං චෛත්යප්රාසාදමුත්තමම් ।
හනුමාන්ප්රජ්වලන්ලක්ෂ්ම්යා පාරියාත්රෝපමෝऽභවත් ॥ 5 ॥
ස භූත්වා සුමහාකායඃ ප්රභාවාන්මාරුතාත්මජඃ ।
ධෘෂ්ටමාස්ඵෝටයාමාස ලංකාං ශබ්දේන පූරයන් ॥ 6 ॥
තස්යාස්ඵෝටිතශබ්දේන මහතා ශ්රෝත්රඝාතිනා ।
පේතුර්විහංගමාස්තත්ර චෛත්යපාලාශ්ච මෝහිතාඃ ॥ 7 ॥
අස්ත්රවිජ්ජයතාං රාමෝ ලක්ෂ්මණශ්ච මහාබලඃ ।
රාජා ජයති සුග්රීවෝ රාඝවේණාභිපාලිතඃ ॥ 8 ॥
දාසෝऽහං කෝසලේංද්රස්ය රාමස්යාක්ලිෂ්ටකර්මණඃ ।
හනුමාන්ශත්රුසෛන්යානාං නිහංතා මාරුතාත්මජඃ ॥ 9 ॥
න රාවණසහස්රං මේ යුද්ධේ ප්රතිබලං භවේත් ।
ශිලාභිස්තු ප්රහරතඃ පාදපෛශ්ච සහස්රශඃ ॥ 10 ॥
අර්දයිත්වා පුරීං ලංකාමභිවාද්ය ච මෛථිලීම් ।
සමෘද්ධාර්ථෝ ගමිෂ්යාමි මිෂතාං සර්වරක්ෂසාම් ॥ 11 ॥
ඒවමුක්ත්වා විමානස්ථශ්චෛත්යස්ථාන්හරියූථපඃ ।
නනාද භීමනිර්හ්රාදෝ රක්ෂසාං ජනයන්භයම් ॥ 12 ॥
තේන ශබ්දේන මහතා චෛත්යපාලාශ්ශතං යයුඃ ।
ගෘහීත්වා විවිධානස්ත්රාන්ප්රාසාන්ඛංගාන්පරශ්වථාන් ॥ 13 ॥
විසෘජංතෝ මහාකායා මාරුතිං පර්යවාරයන් ।
තේ ගදාභිර්විචිත්රාභිඃ පරිඝෛඃ කාංචනාංගදෛඃ ।
ආජඝ්නුර්වානරශ්රේෂ්ඨං බාණෛශ්චාදිත්යසන්නිභෛඃ ॥ 14 ॥
ආවර්ත ඉව ගංගායාස්තෝයස්ය විපුලෝ මහාන් ।
පරික්ෂිප්ය හරිශ්රේෂ්ඨං ස බභෞ රක්ෂසාං ගණඃ ॥ 15 ॥
තතෝ වාතාත්මජඃ ක්රුද්ධෝ භීම රූපං සමාස්ථිතඃ ॥ 16 ॥
ප්රාසාදස්ය මහංතස්ය ස්තංබං හේමපරිෂ්කෘතම් ।
උත්පාටයිත්වා වේගේන හනුමාන්පවනාත්මජඃ ॥ 17 ॥
තතස්තං භ්රාමයාමාස ශතධාරං මහාබලඃ ।
තත්ර චාග්නිස්සමභවත්ප්රාසාදශ්චාප්යදහ්යත ॥ 18 ॥
දහ්යමානං තතෝ දෘෂ්ට්වා ප්රාසාදං හරියූථපඃ ।
ස රාක්ෂසශතං හත්ත්වා වජ්රේණේංද්ර ඉවාසුරාන් ॥ 19 ॥
අංතරික්ෂේ ස්ථිතශ්ශ්තීමානිදං වචනමබ්රවීත් ।
මාදෘශානාං සහස්රාණි විසෘෂ්ටානි මහාත්මනාම් ॥ 20 ॥
බලිනාං වානරේංද්රාණාං සුග්රීවවශවර්තිනාම් ।
අටංති වසුධාං කෘත්ස්නාං වයමන්යේ ච වානරාඃ ॥ 21 ॥
දශනාගබලාඃ කේචිත්කේචිද්දශගුණෝත්තරාඃ ।
කේචින්නාගසහස්රස්ය බභූවුස්තුල්යවික්රමාඃ ॥ 22 ॥
සංති චෞඝබලාඃ කේචිත්කේචිද්වායුබලෝපමාඃ ।
අප්රමේයබලාශ්චාන්යේ තත්රාසන්හරියූථපාඃ ॥ 23 ॥
ඊදෘග්විධෛස්තු හරිභිර්වෘතෝ දංතනඛායුධෛඃ ।
ශතෛශ්ශතසහස්රෛශ්ච කෝටීභිරයුතෛරපි ॥ 24 ॥
ආගමිෂ්යති සුග්රීවඃ සර්වේෂාං වෝ නිෂූදනඃ ।
නේයමස්ති පුරී ලංකා න යූයං න ච රාවණඃ ॥ 25 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ත්රිචත්වාරිංශස්සර්ගඃ ॥
