ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ସପ୍ତଚତ୍ଵାରିଂଶସ୍ସର୍ଗଃ ।
ପ୍ରତିପ୍ରଵିଷ୍ଟେଲଂକାୟାଂକୃତାର୍ଥେରାଵଣାତ୍ମଜେ ।
ରାଘଵଂପରିଵାର୍ୟାର୍ତୁରକ୍ଷୁର୍ଵାନରର୍ଷଭାଃ ॥ 1 ॥
ହନୁମାନଂଗଦୋନୀଲଃସୁଷେଣଃକୁମୁଦୋନଲଃ ।
ଗଜୋଗଵାକ୍ଷୋଗଵୟଶ୍ଶରଭୋଗଂଧମାଦନଃ ॥ 2 ॥
ଜାଂବଵାନୃଷଭଃସୁଂଦୋରଂଭଃଶତଵଲିଃପୃଥୁଃ ।
ଵ୍ୟୂଢାନୀକାଶ୍ଚୟତ୍ତାଶ୍ଚଦ୍ରୁମାନାଦାୟସର୍ଵତଃ ॥ 3 ॥
ଵୀକ୍ଷମାଣାଦିଶସ୍ସର୍ଵାସ୍ତିର୍ୟଗୂର୍ଧ୍ଵଂଚଵାନରାଃ ।
ତୃଣେଷ୍ଵପିଚଚେଷ୍ଟତ୍ସୁରାକ୍ଷସାଇତିମେନିରେ ॥ 4 ॥
ରାଵଣଶ୍ଚାପିସମ୍ହୃଷ୍ଟୋଵିସୃଜ୍ୟେଂଦ୍ରଜିତଂସୁତମ୍ ।
ଅଜୁହାଵତତସ୍ସୀତାକ୍ଷିଣୀରାକ୍ଷସୀସ୍ତଦା ॥ 5 ॥
ରାକ୍ଷସ୍ୟସ୍ତ୍ରିଜଟାଚୈଵଶାସନାତ୍ସମୁପସ୍ଥିତାଃ ।
ତାଉଵାଚତତୋହୃଷ୍ଟୋରାକ୍ଷସୀରାକ୍ଷସାଧମଃ ॥ 6 ॥
ହତାଵିଂଦ୍ରଜିତାଖ୍ୟାତଵୈଦେହ୍ୟାରାମଲକ୍ଷ୍ମଣୌ ।
ପୁଷ୍ପକଂତତ୍ସମାରୋପ୍ୟଦର୍ଶୟଧ୍ଵଂହତୌରଣେ ॥ 7 ॥
ୟଦାଶ୍ରୟାଦଵଷ୍ଟବ୍ଧାମାମୁପତିଷ୍ଠତି ।
ସୋଽସ୍ୟାଭର୍ତାସହଭ୍ରାତ୍ରାନିହତୋରଣମୂର୍ଧନି ॥ 8 ॥
ନିର୍ଵିଶଂକାନିରୁଦ୍ଵିଗ୍ନାନିରପେକ୍ଷାଚମୈଥିଲୀ ।
ମାମୁପସ୍ଥାସ୍ୟତେସୀତାସର୍ଵାଭରଣଭୂଷିତା ॥ 9 ॥
ଅଦ୍ୟକାଲଵଶଂପ୍ରାପ୍ତଂରଣେରାମଂସଲକ୍ଷ୍ମଣମ୍ ।
ଅଵେକ୍ଷ୍ୟଵିନିଵୃତ୍ତାସାଚାନ୍ୟାଂଗତିମପଶ୍ୟତୀ ॥ 10 ॥
ନିରପେକ୍ଷାଵିଶାଲାକ୍ଷୀମାମୁପସ୍ଥାସ୍ୟତେସ୍ଵୟମ୍ ।
ତସ୍ୟତଦ୍ଵଚନଂଶ୍ରୁତ୍ଵାରାଵଣସ୍ୟଦୁରାତ୍ମନଃ ॥ 11 ॥
ରାକ୍ଷସ୍ୟସ୍ତାସ୍ତଥେତ୍ୟୁକ୍ତ୍ଵାଜଗ୍ମୁର୍ଵୈୟତ୍ରପୁଷ୍ପକମ୍ ।
ତତଃପୁଷ୍ପକମାଦାୟରାକ୍ଷସ୍ୟୋରାଵଣାଜ୍ଞୟା ॥ 12 ॥
ଅଶୋକଵନିକାସ୍ଥାଂତାଂମୈଥିଲୀଂସମୁପାନୟନ୍ ।
ତାମାଦାୟତୁରାକ୍ଷସ୍ୟୋଭର୍ତୃଶୋକପରାଜିତାମ୍ ॥ 13 ॥
ସୀତାମାରୋପୟାମାସୁର୍ଵିମାନଂପୁଷ୍ପକଂତଦା ।
ତତଃପୁଷ୍ପକମାରୋପ୍ୟସୀତାଂତ୍ରିଜଟୟାସହ ॥ 14 ॥
ଜଗ୍ମୁର୍ଦର୍ଶୟିତୁଂତସ୍ୟୈରାକ୍ଷସ୍ୟୋରାମଲକ୍ଷ୍ମଣୌ ।
ରାଵଣୋଽକାରୟଲ୍ଲଂକାଂପତାକାଧ୍ଵଜମାଲିନୀମ୍ ॥ 15 ॥
ପ୍ରାଘୋଷୟତହୃଷ୍ଟଶ୍ଚଲଂକାୟାଂରାକ୍ଷସେଶ୍ଵରଃ ।
ରାଘଵୋଲକ୍ଷ୍ମଣଶ୍ଚୈଵହତାଵିଂଦ୍ରଜିତାରଣେ ॥ 16 ॥
ଵିମାନେନାପିଗତ୍ଵାତୁସୀତାତ୍ରିଜଟୟାସହ ।
ଦଦର୍ଶଵାନରାଣାଂତୁସର୍ଵଂସୈନ୍ୟଂନିପାତିତମ୍ ॥ 17 ॥
ପ୍ରହୃଷ୍ଟମନସଶ୍ଚାପିଦଦର୍ଶପିଶିତାଶନାନ୍ ।
ଵାନରାଂଶ୍ଚାତିଦୁଃଖାର୍ତାନ୍ରାମଲକ୍ଷ୍ମଣପାର୍ଶ୍ଵତଃ ॥ 18 ॥
ତତସ୍ସୀତାଦଦର୍ଶୋଭୌଶୟାନୌଶରତଲ୍ପଗୌ ।
ଲକ୍ଷ୍ମଣଂଚାପିରାମଂଚଵିସଂଜ୍ଞୌଶରପୀଡିତୌ ॥ 19 ॥
ଵିଧ୍ଵସ୍ତକଵଚୌଵୀରୌଵିପ୍ରଵିଦ୍ଧଶରାସନୌ ।
ସାୟକୈଚଶିନ୍ନସର୍ଵାଂଗୌଶରସ୍ତଂବମୟୌକ୍ଷିତୌ ॥ 20 ॥
ତୌଦୃଷ୍ଟଵାଭ୍ରାତରୌତତ୍ରପ୍ରଵୀରୌପୁରୁଷର୍ଷଭୌ ।
ଶୟାନୌପୁଂଡରୀକାକ୍ଷୌକୁମାରାଵିଵପାଵକୀ ॥ 21 ॥
ଶରତଲ୍ପଗତୌଵୀରୌତଥାଭୂତାନରର୍ଷଭୌ ।
ଦୁଃଖାର୍ତାକରୁଣଂସୀତାସୁଭୃଶଂଵିଲଲାପହ ॥ 22 ॥
ଭର୍ତାରମନଵଦ୍ୟାଂଗୀଲକ୍ଷ୍ମଣଂଚାସିତେକ୍ଷଣା ।
ପ୍ରେକ୍ଷ୍ୟପାଂସୁଷୁଚେଷ୍ଟଂତୌରୁରୋଦଜନକାତ୍ମଜା ॥ 23 ॥
ସବାଷ୍ପଶୋକାଭିହତାସମୀକ୍ଷ୍ୟତୌଭ୍ରାତରୌଦେଵସମପ୍ରଭାଵୌ ।
ଵିତର୍କୟଂତୀନିଧନଂତୟୋସ୍ସାଦୁଃଖାନ୍ଵିତାଵାକ୍ୟମିଦଂଜଗାଦ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ସପ୍ତଚତ୍ଵାରିଂଶସ୍ସର୍ଗଃ ॥
