śrīmadvālmīkīya rāmāyaṇē yuddhakāṇḍam ।
atha saptachatvāriṃśassargaḥ ।
pratipraviṣṭēlaṅkāyāṅkṛtārthērāvaṇātmajē ।
rāghavamparivāryārturakṣurvānararṣabhāḥ ॥ 1 ॥
hanumānaṅgadōnīlaḥsuṣēṇaḥkumudōnalaḥ ।
gajōgavākṣōgavayaśśarabhōgandhamādanaḥ ॥ 2 ॥
jāmbavānṛṣabhaḥsundōrambhaḥśatavaliḥpṛthuḥ ।
vyūḍhānīkāśchayattāśchadrumānādāyasarvataḥ ॥ 3 ॥
vīkṣamāṇādiśassarvāstiryagūrdhvañchavānarāḥ ।
tṛṇēṣvapichachēṣṭatsurākṣasāitimēnirē ॥ 4 ॥
rāvaṇaśchāpisamhṛṣṭōvisṛjyēndrajitaṃsutam ।
ajuhāvatatassītākṣiṇīrākṣasīstadā ॥ 5 ॥
rākṣasyastrijaṭāchaivaśāsanātsamupasthitāḥ ।
tāuvāchatatōhṛṣṭōrākṣasīrākṣasādhamaḥ ॥ 6 ॥
hatāvindrajitākhyātavaidēhyārāmalakṣmaṇau ।
puṣpakantatsamārōpyadarśayadhvaṃhatauraṇē ॥ 7 ॥
yadāśrayādavaṣṭabdhāmāmupatiṣṭhati ।
sō'syābhartāsahabhrātrānihatōraṇamūrdhani ॥ 8 ॥
nirviśaṅkānirudvignānirapēkṣāchamaithilī ।
māmupasthāsyatēsītāsarvābharaṇabhūṣitā ॥ 9 ॥
adyakālavaśamprāptaṃraṇērāmaṃsalakṣmaṇam ।
avēkṣyavinivṛttāsāchānyāṅgatimapaśyatī ॥ 10 ॥
nirapēkṣāviśālākṣīmāmupasthāsyatēsvayam ।
tasyatadvachanaṃśrutvārāvaṇasyadurātmanaḥ ॥ 11 ॥
rākṣasyastāstathētyuktvājagmurvaiyatrapuṣpakam ।
tataḥpuṣpakamādāyarākṣasyōrāvaṇājñayā ॥ 12 ॥
aśōkavanikāsthāntāmmaithilīṃsamupānayan ।
tāmādāyaturākṣasyōbhartṛśōkaparājitām ॥ 13 ॥
sītāmārōpayāmāsurvimānampuṣpakantadā ।
tataḥpuṣpakamārōpyasītāntrijaṭayāsaha ॥ 14 ॥
jagmurdarśayituntasyairākṣasyōrāmalakṣmaṇau ।
rāvaṇō'kārayallaṅkāmpatākādhvajamālinīm ॥ 15 ॥
prāghōṣayatahṛṣṭaśchalaṅkāyāṃrākṣasēśvaraḥ ।
rāghavōlakṣmaṇaśchaivahatāvindrajitāraṇē ॥ 16 ॥
vimānēnāpigatvātusītātrijaṭayāsaha ।
dadarśavānarāṇāntusarvaṃsainyannipātitam ॥ 17 ॥
prahṛṣṭamanasaśchāpidadarśapiśitāśanān ।
vānarāṃśchātiduḥkhārtānrāmalakṣmaṇapārśvataḥ ॥ 18 ॥
tatassītādadarśōbhauśayānauśaratalpagau ।
lakṣmaṇañchāpirāmañchavisañjñauśarapīḍitau ॥ 19 ॥
vidhvastakavachauvīrauvipraviddhaśarāsanau ।
sāyakaichaśinnasarvāṅgauśarastambamayaukṣitau ॥ 20 ॥
taudṛṣṭavābhrātarautatrapravīraupuruṣarṣabhau ।
śayānaupuṇḍarīkākṣaukumārāvivapāvakī ॥ 21 ॥
śaratalpagatauvīrautathābhūtānararṣabhau ।
duḥkhārtākaruṇaṃsītāsubhṛśaṃvilalāpaha ॥ 22 ॥
bhartāramanavadyāṅgīlakṣmaṇañchāsitēkṣaṇā ।
prēkṣyapāṃsuṣuchēṣṭantaururōdajanakātmajā ॥ 23 ॥
sabāṣpaśōkābhihatāsamīkṣyataubhrātaraudēvasamaprabhāvau ।
vitarkayantīnidhanantayōssāduḥkhānvitāvākyamidañjagāda ॥ 24 ॥
ityārṣē śrīmadrāmāyaṇē vālmīkīya ādikāvyē yuddhakāṇḍē saptachatvāriṃśassargaḥ ॥
