શ્રીમદ્વાલ્મીકીય રામાયણે સુંદરકાંડમ્ ।
અથ ચતુશ્ચત્વારિંશસ્સર્ગઃ ।
સંદિષ્ટો રાક્ષસેંદ્રેણ પ્રહસ્તસ્ય સુતો બલી ।
જંબુમાલી મહાદંષ્ટ્રો નિર્જગામ ધનુર્ધરઃ ॥ 1 ॥
રક્તમાલ્યાંબરધરસ્સ્રગ્વી રુચિરકુંડલઃ ।
મહાન્વિવૃત્તનયનશ્ચંડસ્સમરદુર્જયઃ ॥ 2 ॥
ધનુશ્શક્રધનુઃ પ્રખ્યં મહદ્રુચિરસાયકમ્ ।
વિષ્ફારયાણો વેગેન વજ્રાશનિસમસ્વનમ્ ॥ 3 ॥
તસ્ય વિષ્ફારઘોષેણ ધનુષો મહતા દિશઃ ।
પ્રદિશશ્ચ નભશ્ચૈવ સહસા સમપૂર્યત ॥ 4 ॥
રથેન ખરયુક્તેન તમાગતમુદીક્ષ્ય સઃ ।
હનુમાન્વેગસંપન્નો જહર્ષ ચ નનાદ ચ ॥ 5 ॥
તં તોરણવિટંકસ્થં હનુમંતં મહાકપિમ્ ।
જંબુમાલી મહાબાહુર્વિવ્યાધ નિશિતૈશ્શરૈઃ ॥ 6 ॥
અર્ધચંદ્રેણ વદને શિરસ્યેકેન કર્ણિના ।
બાહ્વોર્વિવ્યાધ નારાચૈર્દશભિસ્તં કપીશ્વરમ્ ॥ 7 ॥
તસ્ય તચ્છુશુભે તામ્રં શરેણાભિહતં મુખમ્ ।
શરદીવાંબુજં ફુલ્લં વિદ્ધં ભાસ્કરરશ્મિના ॥ 8 ॥
તત્તસ્ય રક્તં રક્તેન રંજિતં શુશુભે મુખમ્ ।
યથાકાશે મહાપદ્મં સિક્તં ચંદનબિંદુભિઃ ॥ 9 ॥
ચુકોપ બાણાભિહતો રાક્ષસસ્ય મહાકપિઃ ।
તતઃ પાર્શ્વેઽતિવિપુલાં દદર્શ મહતીં શિલામ્ ॥ 10 ॥
તરસા તાં સમુત્પાટ્ય ચિક્ષેપ બલવદ્ભલી ।
તાં શરૈર્દશભિઃ ક્રુદ્ધસ્તાડયામાસ રાક્ષસઃ ॥ 11 ॥
વિપન્નં કર્મ તદ્દૃષ્ટ્વા હનુમાંશ્ચંડવિક્રમઃ ।
સાલં વિપુલમુત્પાટ્ય ભ્રામયામાસ વીર્યવાન્ ॥ 12 ॥
ભ્રામયંતં કપિં દૃષ્ટ્વા સાલવૃક્ષં મહાબલમ્ ।
ચિક્ષેપ સુબહૂન્બાણાન્જંબુમાલી મહાબલઃ ॥ 13 ॥
સાલં ચતુર્ભિશ્ચિચ્છેદ વાનરં પંચભિર્ભુજે ।
ઉરસ્યેકેન બાણેન દશભિસ્તુ સ્તનાંતરે ॥ 14 ॥
સ શરૈઃ પૂરિતતનુઃ ક્રોધેન મહતા વૃતઃ ।
તમેવ પરિઘં ગૃહ્ય ભ્રામયામાસ વેગિતઃ ॥ 15 ॥
અતિવેગોઽતિવેગેન ભ્રામયિત્વા બલોત્કટઃ ।
પરિઘં પાતયામાસ જંબુમાલેર્મહોરસિ ॥ 16 ॥
તસ્ય ચૈવ શિરો નાસ્તિ ન બાહૂ ન ચ જાનુની ।
ન ધનુર્ન રથો નાશ્વાસ્તત્રાદૃશ્યંત નેષવઃ ॥ 17 ॥
સ હતસ્સહસા તેન જંબુમાલી મહાબલઃ ।
પપાત નિહતો ભૂમૌ ચૂર્ણિતાંગવિભૂષણઃ ॥ 18 ॥
જંબુમાલિં ચ નિહતં કિંકરાંશ્ચ મહાબલાન્ ।
ચુક્રોધ રાવણશ્શુત્વા કોપસંરક્તલોચનઃ ॥ 19 ॥
સ રોષસંવર્તિતતામ્રલોચનઃ પ્રહસ્તપુત્ત્રે નિહતે મહાબલે ।
અમાત્યપુત્ત્રાનતિવીર્યવિક્રમાન્ સમાદિદેશાશુ નિશાચરેશ્વરઃ ॥ 20 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે ચતુશ્ચત્વારિંશસ્સર્ગઃ ॥
