śrīmadvālmīkīya rāmāyaṇē sundarakāṇḍam ।
atha chatuśchatvāriṃśassargaḥ ।
sandiṣṭō rākṣasēndrēṇa prahastasya sutō balī ।
jambumālī mahādaṃṣṭrō nirjagāma dhanurdharaḥ ॥ 1 ॥
raktamālyāmbaradharassragvī ruchirakuṇḍalaḥ ।
mahānvivṛttanayanaśchaṇḍassamaradurjayaḥ ॥ 2 ॥
dhanuśśakradhanuḥ prakhyaṃ mahadruchirasāyakam ।
viṣphārayāṇō vēgēna vajrāśanisamasvanam ॥ 3 ॥
tasya viṣphāraghōṣēṇa dhanuṣō mahatā diśaḥ ।
pradiśaścha nabhaśchaiva sahasā samapūryata ॥ 4 ॥
rathēna kharayuktēna tamāgatamudīkṣya saḥ ।
hanumānvēgasampannō jaharṣa cha nanāda cha ॥ 5 ॥
taṃ tōraṇaviṭaṅkasthaṃ hanumantaṃ mahākapim ।
jambumālī mahābāhurvivyādha niśitaiśśaraiḥ ॥ 6 ॥
ardhachandrēṇa vadanē śirasyēkēna karṇinā ।
bāhvōrvivyādha nārāchairdaśabhistaṃ kapīśvaram ॥ 7 ॥
tasya tachChuśubhē tāmraṃ śarēṇābhihataṃ mukham ।
śaradīvāmbujaṃ phullaṃ viddhaṃ bhāskararaśminā ॥ 8 ॥
tattasya raktaṃ raktēna rañjitaṃ śuśubhē mukham ।
yathākāśē mahāpadmaṃ siktaṃ chandanabindubhiḥ ॥ 9 ॥
chukōpa bāṇābhihatō rākṣasasya mahākapiḥ ।
tataḥ pārśvē'tivipulāṃ dadarśa mahatīṃ śilām ॥ 10 ॥
tarasā tāṃ samutpāṭya chikṣēpa balavadbhalī ।
tāṃ śarairdaśabhiḥ kruddhastāḍayāmāsa rākṣasaḥ ॥ 11 ॥
vipannaṃ karma taddṛṣṭvā hanumāṃśchaṇḍavikramaḥ ।
sālaṃ vipulamutpāṭya bhrāmayāmāsa vīryavān ॥ 12 ॥
bhrāmayantaṃ kapiṃ dṛṣṭvā sālavṛkṣaṃ mahābalam ।
chikṣēpa subahūnbāṇānjambumālī mahābalaḥ ॥ 13 ॥
sālaṃ chaturbhiśchichChēda vānaraṃ pañchabhirbhujē ।
urasyēkēna bāṇēna daśabhistu stanāntarē ॥ 14 ॥
sa śaraiḥ pūritatanuḥ krōdhēna mahatā vṛtaḥ ।
tamēva parighaṃ gṛhya bhrāmayāmāsa vēgitaḥ ॥ 15 ॥
ativēgō'tivēgēna bhrāmayitvā balōtkaṭaḥ ।
parighaṃ pātayāmāsa jambumālērmahōrasi ॥ 16 ॥
tasya chaiva śirō nāsti na bāhū na cha jānunī ।
na dhanurna rathō nāśvāstatrādṛśyanta nēṣavaḥ ॥ 17 ॥
sa hatassahasā tēna jambumālī mahābalaḥ ।
papāta nihatō bhūmau chūrṇitāṅgavibhūṣaṇaḥ ॥ 18 ॥
jambumāliṃ cha nihataṃ kiṅkarāṃścha mahābalān ।
chukrōdha rāvaṇaśśutvā kōpasaṃraktalōchanaḥ ॥ 19 ॥
sa rōṣasaṃvartitatāmralōchanaḥ prahastaputtrē nihatē mahābalē ।
amātyaputtrānativīryavikramān samādidēśāśu niśācharēśvaraḥ ॥ 20 ॥
ityārṣē śrīmadrāmāyaṇē vālmīkīya ādikāvyē sundarakāṇḍē chatuśchatvāriṃśassargaḥ ॥
