ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଚତୁଶ୍ଚତ୍ଵାରିଂଶସ୍ସର୍ଗଃ ।
ସଂଦିଷ୍ଟୋ ରାକ୍ଷସେଂଦ୍ରେଣ ପ୍ରହସ୍ତସ୍ୟ ସୁତୋ ବଲୀ ।
ଜଂବୁମାଲୀ ମହାଦଂଷ୍ଟ୍ରୋ ନିର୍ଜଗାମ ଧନୁର୍ଧରଃ ॥ 1 ॥
ରକ୍ତମାଲ୍ୟାଂବରଧରସ୍ସ୍ରଗ୍ଵୀ ରୁଚିରକୁଂଡଲଃ ।
ମହାନ୍ଵିଵୃତ୍ତନୟନଶ୍ଚଂଡସ୍ସମରଦୁର୍ଜୟଃ ॥ 2 ॥
ଧନୁଶ୍ଶକ୍ରଧନୁଃ ପ୍ରଖ୍ୟଂ ମହଦ୍ରୁଚିରସାୟକମ୍ ।
ଵିଷ୍ଫାରୟାଣୋ ଵେଗେନ ଵଜ୍ରାଶନିସମସ୍ଵନମ୍ ॥ 3 ॥
ତସ୍ୟ ଵିଷ୍ଫାରଘୋଷେଣ ଧନୁଷୋ ମହତା ଦିଶଃ ।
ପ୍ରଦିଶଶ୍ଚ ନଭଶ୍ଚୈଵ ସହସା ସମପୂର୍ୟତ ॥ 4 ॥
ରଥେନ ଖରୟୁକ୍ତେନ ତମାଗତମୁଦୀକ୍ଷ୍ୟ ସଃ ।
ହନୁମାନ୍ଵେଗସଂପନ୍ନୋ ଜହର୍ଷ ଚ ନନାଦ ଚ ॥ 5 ॥
ତଂ ତୋରଣଵିଟଂକସ୍ଥଂ ହନୁମଂତଂ ମହାକପିମ୍ ।
ଜଂବୁମାଲୀ ମହାବାହୁର୍ଵିଵ୍ୟାଧ ନିଶିତୈଶ୍ଶରୈଃ ॥ 6 ॥
ଅର୍ଧଚଂଦ୍ରେଣ ଵଦନେ ଶିରସ୍ୟେକେନ କର୍ଣିନା ।
ବାହ୍ଵୋର୍ଵିଵ୍ୟାଧ ନାରାଚୈର୍ଦଶଭିସ୍ତଂ କପୀଶ୍ଵରମ୍ ॥ 7 ॥
ତସ୍ୟ ତଚ୍ଛୁଶୁଭେ ତାମ୍ରଂ ଶରେଣାଭିହତଂ ମୁଖମ୍ ।
ଶରଦୀଵାଂବୁଜଂ ଫୁଲ୍ଲଂ ଵିଦ୍ଧଂ ଭାସ୍କରରଶ୍ମିନା ॥ 8 ॥
ତତ୍ତସ୍ୟ ରକ୍ତଂ ରକ୍ତେନ ରଂଜିତଂ ଶୁଶୁଭେ ମୁଖମ୍ ।
ୟଥାକାଶେ ମହାପଦ୍ମଂ ସିକ୍ତଂ ଚଂଦନବିଂଦୁଭିଃ ॥ 9 ॥
ଚୁକୋପ ବାଣାଭିହତୋ ରାକ୍ଷସସ୍ୟ ମହାକପିଃ ।
ତତଃ ପାର୍ଶ୍ଵେଽତିଵିପୁଲାଂ ଦଦର୍ଶ ମହତୀଂ ଶିଲାମ୍ ॥ 10 ॥
ତରସା ତାଂ ସମୁତ୍ପାଟ୍ୟ ଚିକ୍ଷେପ ବଲଵଦ୍ଭଲୀ ।
ତାଂ ଶରୈର୍ଦଶଭିଃ କ୍ରୁଦ୍ଧସ୍ତାଡୟାମାସ ରାକ୍ଷସଃ ॥ 11 ॥
ଵିପନ୍ନଂ କର୍ମ ତଦ୍ଦୃଷ୍ଟ୍ଵା ହନୁମାଂଶ୍ଚଂଡଵିକ୍ରମଃ ।
ସାଲଂ ଵିପୁଲମୁତ୍ପାଟ୍ୟ ଭ୍ରାମୟାମାସ ଵୀର୍ୟଵାନ୍ ॥ 12 ॥
ଭ୍ରାମୟଂତଂ କପିଂ ଦୃଷ୍ଟ୍ଵା ସାଲଵୃକ୍ଷଂ ମହାବଲମ୍ ।
ଚିକ୍ଷେପ ସୁବହୂନ୍ବାଣାନ୍ଜଂବୁମାଲୀ ମହାବଲଃ ॥ 13 ॥
ସାଲଂ ଚତୁର୍ଭିଶ୍ଚିଚ୍ଛେଦ ଵାନରଂ ପଂଚଭିର୍ଭୁଜେ ।
ଉରସ୍ୟେକେନ ବାଣେନ ଦଶଭିସ୍ତୁ ସ୍ତନାଂତରେ ॥ 14 ॥
ସ ଶରୈଃ ପୂରିତତନୁଃ କ୍ରୋଧେନ ମହତା ଵୃତଃ ।
ତମେଵ ପରିଘଂ ଗୃହ୍ୟ ଭ୍ରାମୟାମାସ ଵେଗିତଃ ॥ 15 ॥
ଅତିଵେଗୋଽତିଵେଗେନ ଭ୍ରାମୟିତ୍ଵା ବଲୋତ୍କଟଃ ।
ପରିଘଂ ପାତୟାମାସ ଜଂବୁମାଲେର୍ମହୋରସି ॥ 16 ॥
ତସ୍ୟ ଚୈଵ ଶିରୋ ନାସ୍ତି ନ ବାହୂ ନ ଚ ଜାନୁନୀ ।
ନ ଧନୁର୍ନ ରଥୋ ନାଶ୍ଵାସ୍ତତ୍ରାଦୃଶ୍ୟଂତ ନେଷଵଃ ॥ 17 ॥
ସ ହତସ୍ସହସା ତେନ ଜଂବୁମାଲୀ ମହାବଲଃ ।
ପପାତ ନିହତୋ ଭୂମୌ ଚୂର୍ଣିତାଂଗଵିଭୂଷଣଃ ॥ 18 ॥
ଜଂବୁମାଲିଂ ଚ ନିହତଂ କିଂକରାଂଶ୍ଚ ମହାବଲାନ୍ ।
ଚୁକ୍ରୋଧ ରାଵଣଶ୍ଶୁତ୍ଵା କୋପସଂରକ୍ତଲୋଚନଃ ॥ 19 ॥
ସ ରୋଷସଂଵର୍ତିତତାମ୍ରଲୋଚନଃ ପ୍ରହସ୍ତପୁତ୍ତ୍ରେ ନିହତେ ମହାବଲେ ।
ଅମାତ୍ୟପୁତ୍ତ୍ରାନତିଵୀର୍ୟଵିକ୍ରମାନ୍ ସମାଦିଦେଶାଶୁ ନିଶାଚରେଶ୍ଵରଃ ॥ 20 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଚତୁଶ୍ଚତ୍ଵାରିଂଶସ୍ସର୍ଗଃ ॥
