ശ്രീമദ്വാല്മീകീയ രാമായണേ സുംദരകാംഡമ് ।
അഥ ചതുശ്ചത്വാരിംശസ്സര്ഗഃ ।
സംദിഷ്ടോ രാക്ഷസേംദ്രേണ പ്രഹസ്തസ്യ സുതോ ബലീ ।
ജംബുമാലീ മഹാദംഷ്ട്രോ നിര്ജഗാമ ധനുര്ധരഃ ॥ 1 ॥
രക്തമാല്യാംബരധരസ്സ്രഗ്വീ രുചിരകുംഡലഃ ।
മഹാന്വിവൃത്തനയനശ്ചംഡസ്സമരദുര്ജയഃ ॥ 2 ॥
ധനുശ്ശക്രധനുഃ പ്രഖ്യം മഹദ്രുചിരസായകമ് ।
വിഷ്ഫാരയാണോ വേഗേന വജ്രാശനിസമസ്വനമ് ॥ 3 ॥
തസ്യ വിഷ്ഫാരഘോഷേണ ധനുഷോ മഹതാ ദിശഃ ।
പ്രദിശശ്ച നഭശ്ചൈവ സഹസാ സമപൂര്യത ॥ 4 ॥
രഥേന ഖരയുക്തേന തമാഗതമുദീക്ഷ്യ സഃ ।
ഹനുമാന്വേഗസംപന്നോ ജഹര്ഷ ച നനാദ ച ॥ 5 ॥
തം തോരണവിടംകസ്ഥം ഹനുമംതം മഹാകപിമ് ।
ജംബുമാലീ മഹാബാഹുർവിവ്യാധ നിശിതൈശ്ശരൈഃ ॥ 6 ॥
അര്ധചംദ്രേണ വദനേ ശിരസ്യേകേന കര്ണിനാ ।
ബാഹ്വോർവിവ്യാധ നാരാചൈര്ദശഭിസ്തം കപീശ്വരമ് ॥ 7 ॥
തസ്യ തച്ഛുശുഭേ താമ്രം ശരേണാഭിഹതം മുഖമ് ।
ശരദീവാംബുജം ഫുല്ലം വിദ്ധം ഭാസ്കരരശ്മിനാ ॥ 8 ॥
തത്തസ്യ രക്തം രക്തേന രംജിതം ശുശുഭേ മുഖമ് ।
യഥാകാശേ മഹാപദ്മം സിക്തം ചംദനബിംദുഭിഃ ॥ 9 ॥
ചുകോപ ബാണാഭിഹതോ രാക്ഷസസ്യ മഹാകപിഃ ।
തതഃ പാര്ശ്വേഽതിവിപുലാം ദദര്ശ മഹതീം ശിലാമ് ॥ 10 ॥
തരസാ താം സമുത്പാട്യ ചിക്ഷേപ ബലവദ്ഭലീ ।
താം ശരൈര്ദശഭിഃ ക്രുദ്ധസ്താഡയാമാസ രാക്ഷസഃ ॥ 11 ॥
വിപന്നം കര്മ തദ്ദൃഷ്ട്വാ ഹനുമാംശ്ചംഡവിക്രമഃ ।
സാലം വിപുലമുത്പാട്യ ഭ്രാമയാമാസ വീര്യവാന് ॥ 12 ॥
ഭ്രാമയംതം കപിം ദൃഷ്ട്വാ സാലവൃക്ഷം മഹാബലമ് ।
ചിക്ഷേപ സുബഹൂന്ബാണാന്ജംബുമാലീ മഹാബലഃ ॥ 13 ॥
സാലം ചതുര്ഭിശ്ചിച്ഛേദ വാനരം പംചഭിര്ഭുജേ ।
ഉരസ്യേകേന ബാണേന ദശഭിസ്തു സ്തനാംതരേ ॥ 14 ॥
സ ശരൈഃ പൂരിതതനുഃ ക്രോധേന മഹതാ വൃതഃ ।
തമേവ പരിഘം ഗൃഹ്യ ഭ്രാമയാമാസ വേഗിതഃ ॥ 15 ॥
അതിവേഗോഽതിവേഗേന ഭ്രാമയിത്വാ ബലോത്കടഃ ।
പരിഘം പാതയാമാസ ജംബുമാലേര്മഹോരസി ॥ 16 ॥
തസ്യ ചൈവ ശിരോ നാസ്തി ന ബാഹൂ ന ച ജാനുനീ ।
ന ധനുര്ന രഥോ നാശ്വാസ്തത്രാദൃശ്യംത നേഷവഃ ॥ 17 ॥
സ ഹതസ്സഹസാ തേന ജംബുമാലീ മഹാബലഃ ।
പപാത നിഹതോ ഭൂമൌ ചൂര്ണിതാംഗവിഭൂഷണഃ ॥ 18 ॥
ജംബുമാലിം ച നിഹതം കിംകരാംശ്ച മഹാബലാന് ।
ചുക്രോധ രാവണശ്ശുത്വാ കോപസംരക്തലോചനഃ ॥ 19 ॥
സ രോഷസംവര്തിതതാമ്രലോചനഃ പ്രഹസ്തപുത്ത്രേ നിഹതേ മഹാബലേ ।
അമാത്യപുത്ത്രാനതിവീര്യവിക്രമാന് സമാദിദേശാശു നിശാചരേശ്വരഃ ॥ 20 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ ചതുശ്ചത്വാരിംശസ്സര്ഗഃ ॥
