श्रीमद्वाल्मीकीय रामायणे युद्धकांडम् ।
अथ त्रयोविंशत्यधिकशततमस्सर्गः ।
प्रतिप्रयातेकाकुत्स्थेमहेंद्रःपाकशासनः ।
अब्रवीत्परमप्रीतोराघवंप्रांजलिंस्थितम् ॥ 1 ॥
अमोघंदर्शनंराम तवास्माकंनरर्षभ ।
प्रीतियुक्ताःस्मतेनत्वंब्रूहियन्मनसेप्सितम् ॥ 2 ॥
एवमुक्तोमहेंद्रेणप्रसन्नेनमहात्मना ।
सुप्रसन्नमनाहृष्टोवचनंप्राहराघवः ॥ 3 ॥
यदिप्रीतिस्समुत्पन्नामयितेविबुधेश्वर ।
वक्ष्यामिकुरुमेसत्यंवचनंवदतांवर ॥ 4 ॥
ममहेतोःपराक्रांतायेगतायमसादनम् ।
तेसर्वेजीवितंप्राप्यसमुततिष्ठंतुवानराः ॥ 5 ॥
मत्कृतेविप्रयुक्तायेपुत्रैर्दारैश्चवानराः ।
तान्प्रीतमनसःसर्वांद्रष्टुमिच्छामिमानद ॥ 6 ॥
विक्रांताश्चापिशूराश्च न मृत्युंगणयंति च ।
कृतयत्नाविपन्नाश्चजीवयैनान् पुरंदर ॥ 7 ॥
मत्प्रियेष्वभिरक्ताश्च न मृत्युंगणयंतिये ।
त्वत्प्रसादात्समेयुस्तेवरमेतमहंवृणे ॥ 8 ॥
नीरुजोनिर्व्रणांश्चैवसंपन्नबलपौरुषान् ।
गोलांगूलांस्तथैवर्क्षांंद्रष्टुमिच्छामिमानद ॥ 9 ॥
अकालेचापिपुष्पाणिमूलानि च फलानि च ।
नद्यश्चविमलास्तत्रतिष्ठेयुर्यत्रवानराः ॥ 10 ॥
श्रुत्वातुवचनंतस्यराघवस्यमहात्मनः ।
महेंद्रःप्रत्युवाचेदंवचनंप्रीतिसंयुतम् ॥ 11 ॥
महानयंवरस्तातयस्त्वयोक्तोरघूत्तम ।
वदिर्मयानोक्तपूर्वं च तस्मादेतद्भविष्यति ॥ 12 ॥
समुत्तिष्ठंतुतेसर्वेहतायेयुधिराक्षसैः ।
ऋक्षाश्चसहगोपुच्छैर्निकृत्ताननबाहवः ॥ 13 ॥
नीरुजोनिर्व्रणाश्चैवसंपन्नबलपौरुषाः ।
समुत्थास्यंतिहरयस्सुप्तानिद्राक्ष्येयथा ॥ 14 ॥
सुहृद्भिर्बांधवैश्चैवज्ञातिभिःस्वजनेन च ।
सर्वएवसमेष्यंतिसम्युक्ताःपरयामुदा ॥ 15 ॥
अकालेपुष्पशबलाःफलवंतश्चपादपाः ।
भविष्यंतिमहेष्वास नद्यश्चसलिलायुताः ॥ 16 ॥
सव्रणैःप्रथमंगात्रैरिदानींनिर्व्रणैस्समैः ।
ततस्समुत्थितास्सर्वेसुप्त्वेवहरियूथपाः ॥ 17 ॥
बभूवुर्वानरास्सर्वेकिंन्वेतदितिविस्मिताः ।
काकुत्स्थंपरिपूर्णार्थंदृष्टवासर्वेसुरोत्तमाः ॥ 18 ॥
अब्रुवन्परमप्रीतास्स्तुत्वारामंसलक्ष्मणम् ।
गच्छायोध्यामितोराजन्विसर्जय च वानरान् ॥ 19 ॥
मैथिलींसांत्वयस्वैनामनुरक्तांयशस्विनीम् ।
भ्रारातरंभरतंपश्यत्वच्छोकाद्व्रतचारिणम् ॥ 20 ॥
शत्रुघ्नं च महात्मानंमात्रूःसर्वाःपरंतप ।
अभिषेचयचात्मानंपौरान्गत्वाप्रहर्षय ॥ 21 ॥
एवमुक्त्वासहस्राक्षोरामंसौमित्रिणासह ।
विमानैःसूर्यसंकाशैर्ययौहृष्टःसुरैःसह ॥ 22 ॥
अभिवाद्य च काकुत्स्थः सर्वांस्तांस्त्रिदशोत्तमान् ।
लक्ष्मणेनसहभ्रात्रावासमाज्ञापयत्तदा ॥ 23 ॥
ततस्तुसालक्ष्मणरामपालितामहाचमूर्हृष्टजनायशस्विनी ।
श्रियाज्वलंतीविरराजसर्वतोनिशाप्रणीतेवहिशीतरश्मिना ॥ 24 ॥
इत्यार्षे श्रीमद्रामायणे वाल्मीकीय आदिकाव्ये युद्धकांडे त्रयोविंशत्यधिकशततमस्सर्गः ॥
