ശ്രീമദ്വാല്മീകീയ രാമായണേ യുദ്ധകാംഡമ് ।
അഥ ത്രയോവിംശത്യധികശതതമസ്സര്ഗഃ ।
പ്രതിപ്രയാതേകാകുത്സ്ഥേമഹേംദ്രഃപാകശാസനഃ ।
അബ്രവീത്പരമപ്രീതോരാഘവംപ്രാംജലിംസ്ഥിതമ് ॥ 1 ॥
അമോഘംദര്ശനംരാമ തവാസ്മാകംനരര്ഷഭ ।
പ്രീതിയുക്താഃസ്മതേനത്വംബ്രൂഹിയന്മനസേപ്സിതമ് ॥ 2 ॥
ഏവമുക്തോമഹേംദ്രേണപ്രസന്നേനമഹാത്മനാ ।
സുപ്രസന്നമനാഹൃഷ്ടോവചനംപ്രാഹരാഘവഃ ॥ 3 ॥
യദിപ്രീതിസ്സമുത്പന്നാമയിതേവിബുധേശ്വര ।
വക്ഷ്യാമികുരുമേസത്യംവചനംവദതാംവര ॥ 4 ॥
മമഹേതോഃപരാക്രാംതായേഗതായമസാദനമ് ।
തേസർവേജീവിതംപ്രാപ്യസമുതതിഷ്ഠംതുവാനരാഃ ॥ 5 ॥
മത്കൃതേവിപ്രയുക്തായേപുത്രൈര്ദാരൈശ്ചവാനരാഃ ।
താന്പ്രീതമനസഃസർവാംദ്രഷ്ടുമിച്ഛാമിമാനദ ॥ 6 ॥
വിക്രാംതാശ്ചാപിശൂരാശ്ച ന മൃത്യുംഗണയംതി ച ।
കൃതയത്നാവിപന്നാശ്ചജീവയൈനാന് പുരംദര ॥ 7 ॥
മത്പ്രിയേഷ്വഭിരക്താശ്ച ന മൃത്യുംഗണയംതിയേ ।
ത്വത്പ്രസാദാത്സമേയുസ്തേവരമേതമഹംവൃണേ ॥ 8 ॥
നീരുജോനിർവ്രണാംശ്ചൈവസംപന്നബലപൌരുഷാന് ।
ഗോലാംഗൂലാംസ്തഥൈവര്ക്ഷാംംദ്രഷ്ടുമിച്ഛാമിമാനദ ॥ 9 ॥
അകാലേചാപിപുഷ്പാണിമൂലാനി ച ഫലാനി ച ।
നദ്യശ്ചവിമലാസ്തത്രതിഷ്ഠേയുര്യത്രവാനരാഃ ॥ 10 ॥
ശ്രുത്വാതുവചനംതസ്യരാഘവസ്യമഹാത്മനഃ ।
മഹേംദ്രഃപ്രത്യുവാചേദംവചനംപ്രീതിസംയുതമ് ॥ 11 ॥
മഹാനയംവരസ്താതയസ്ത്വയോക്തോരഘൂത്തമ ।
വദിര്മയാനോക്തപൂർവം ച തസ്മാദേതദ്ഭവിഷ്യതി ॥ 12 ॥
സമുത്തിഷ്ഠംതുതേസർവേഹതായേയുധിരാക്ഷസൈഃ ।
ഋക്ഷാശ്ചസഹഗോപുച്ഛൈര്നികൃത്താനനബാഹവഃ ॥ 13 ॥
നീരുജോനിർവ്രണാശ്ചൈവസംപന്നബലപൌരുഷാഃ ।
സമുത്ഥാസ്യംതിഹരയസ്സുപ്താനിദ്രാക്ഷ്യേയഥാ ॥ 14 ॥
സുഹൃദ്ഭിര്ബാംധവൈശ്ചൈവജ്ഞാതിഭിഃസ്വജനേന ച ।
സർവഏവസമേഷ്യംതിസമ്യുക്താഃപരയാമുദാ ॥ 15 ॥
അകാലേപുഷ്പശബലാഃഫലവംതശ്ചപാദപാഃ ।
ഭവിഷ്യംതിമഹേഷ്വാസ നദ്യശ്ചസലിലായുതാഃ ॥ 16 ॥
സവ്രണൈഃപ്രഥമംഗാത്രൈരിദാനീംനിർവ്രണൈസ്സമൈഃ ।
തതസ്സമുത്ഥിതാസ്സർവേസുപ്ത്വേവഹരിയൂഥപാഃ ॥ 17 ॥
ബഭൂവുർവാനരാസ്സർവേകിംന്വേതദിതിവിസ്മിതാഃ ।
കാകുത്സ്ഥംപരിപൂര്ണാര്ഥംദൃഷ്ടവാസർവേസുരോത്തമാഃ ॥ 18 ॥
അബ്രുവന്പരമപ്രീതാസ്സ്തുത്വാരാമംസലക്ഷ്മണമ് ।
ഗച്ഛായോധ്യാമിതോരാജന്വിസര്ജയ ച വാനരാന് ॥ 19 ॥
മൈഥിലീംസാംത്വയസ്വൈനാമനുരക്താംയശസ്വിനീമ് ।
ഭ്രാരാതരംഭരതംപശ്യത്വച്ഛോകാദ്വ്രതചാരിണമ് ॥ 20 ॥
ശത്രുഘ്നം ച മഹാത്മാനംമാത്രൂഃസർവാഃപരംതപ ।
അഭിഷേചയചാത്മാനംപൌരാന്ഗത്വാപ്രഹര്ഷയ ॥ 21 ॥
ഏവമുക്ത്വാസഹസ്രാക്ഷോരാമംസൌമിത്രിണാസഹ ।
വിമാനൈഃസൂര്യസംകാശൈര്യയൌഹൃഷ്ടഃസുരൈഃസഹ ॥ 22 ॥
അഭിവാദ്യ ച കാകുത്സ്ഥഃ സർവാംസ്താംസ്ത്രിദശോത്തമാന് ।
ലക്ഷ്മണേനസഹഭ്രാത്രാവാസമാജ്ഞാപയത്തദാ ॥ 23 ॥
തതസ്തുസാലക്ഷ്മണരാമപാലിതാമഹാചമൂര്ഹൃഷ്ടജനായശസ്വിനീ ।
ശ്രിയാജ്വലംതീവിരരാജസർവതോനിശാപ്രണീതേവഹിശീതരശ്മിനാ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ യുദ്ധകാംഡേ ത്രയോവിംശത്യധികശതതമസ്സര്ഗഃ ॥
