ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ତ୍ରୟୋଵିଂଶତ୍ୟଧିକଶତତମସ୍ସର୍ଗଃ ।
ପ୍ରତିପ୍ରୟାତେକାକୁତ୍ସ୍ଥେମହେଂଦ୍ରଃପାକଶାସନଃ ।
ଅବ୍ରଵୀତ୍ପରମପ୍ରୀତୋରାଘଵଂପ୍ରାଂଜଲିଂସ୍ଥିତମ୍ ॥ 1 ॥
ଅମୋଘଂଦର୍ଶନଂରାମ ତଵାସ୍ମାକଂନରର୍ଷଭ ।
ପ୍ରୀତିୟୁକ୍ତାଃସ୍ମତେନତ୍ଵଂବ୍ରୂହିୟନ୍ମନସେପ୍ସିତମ୍ ॥ 2 ॥
ଏଵମୁକ୍ତୋମହେଂଦ୍ରେଣପ୍ରସନ୍ନେନମହାତ୍ମନା ।
ସୁପ୍ରସନ୍ନମନାହୃଷ୍ଟୋଵଚନଂପ୍ରାହରାଘଵଃ ॥ 3 ॥
ୟଦିପ୍ରୀତିସ୍ସମୁତ୍ପନ୍ନାମୟିତେଵିବୁଧେଶ୍ଵର ।
ଵକ୍ଷ୍ୟାମିକୁରୁମେସତ୍ୟଂଵଚନଂଵଦତାଂଵର ॥ 4 ॥
ମମହେତୋଃପରାକ୍ରାଂତାୟେଗତାୟମସାଦନମ୍ ।
ତେସର୍ଵେଜୀଵିତଂପ୍ରାପ୍ୟସମୁତତିଷ୍ଠଂତୁଵାନରାଃ ॥ 5 ॥
ମତ୍କୃତେଵିପ୍ରୟୁକ୍ତାୟେପୁତ୍ରୈର୍ଦାରୈଶ୍ଚଵାନରାଃ ।
ତାନ୍ପ୍ରୀତମନସଃସର୍ଵାଂଦ୍ରଷ୍ଟୁମିଚ୍ଛାମିମାନଦ ॥ 6 ॥
ଵିକ୍ରାଂତାଶ୍ଚାପିଶୂରାଶ୍ଚ ନ ମୃତ୍ୟୁଂଗଣୟଂତି ଚ ।
କୃତୟତ୍ନାଵିପନ୍ନାଶ୍ଚଜୀଵୟୈନାନ୍ ପୁରଂଦର ॥ 7 ॥
ମତ୍ପ୍ରିୟେଷ୍ଵଭିରକ୍ତାଶ୍ଚ ନ ମୃତ୍ୟୁଂଗଣୟଂତିୟେ ।
ତ୍ଵତ୍ପ୍ରସାଦାତ୍ସମେୟୁସ୍ତେଵରମେତମହଂଵୃଣେ ॥ 8 ॥
ନୀରୁଜୋନିର୍ଵ୍ରଣାଂଶ୍ଚୈଵସଂପନ୍ନବଲପୌରୁଷାନ୍ ।
ଗୋଲାଂଗୂଲାଂସ୍ତଥୈଵର୍କ୍ଷାଂଂଦ୍ରଷ୍ଟୁମିଚ୍ଛାମିମାନଦ ॥ 9 ॥
ଅକାଲେଚାପିପୁଷ୍ପାଣିମୂଲାନି ଚ ଫଲାନି ଚ ।
ନଦ୍ୟଶ୍ଚଵିମଲାସ୍ତତ୍ରତିଷ୍ଠେୟୁର୍ୟତ୍ରଵାନରାଃ ॥ 10 ॥
ଶ୍ରୁତ୍ଵାତୁଵଚନଂତସ୍ୟରାଘଵସ୍ୟମହାତ୍ମନଃ ।
ମହେଂଦ୍ରଃପ୍ରତ୍ୟୁଵାଚେଦଂଵଚନଂପ୍ରୀତିସଂୟୁତମ୍ ॥ 11 ॥
ମହାନୟଂଵରସ୍ତାତୟସ୍ତ୍ଵୟୋକ୍ତୋରଘୂତ୍ତମ ।
ଵଦିର୍ମୟାନୋକ୍ତପୂର୍ଵଂ ଚ ତସ୍ମାଦେତଦ୍ଭଵିଷ୍ୟତି ॥ 12 ॥
ସମୁତ୍ତିଷ୍ଠଂତୁତେସର୍ଵେହତାୟେୟୁଧିରାକ୍ଷସୈଃ ।
ଋକ୍ଷାଶ୍ଚସହଗୋପୁଚ୍ଛୈର୍ନିକୃତ୍ତାନନବାହଵଃ ॥ 13 ॥
ନୀରୁଜୋନିର୍ଵ୍ରଣାଶ୍ଚୈଵସଂପନ୍ନବଲପୌରୁଷାଃ ।
ସମୁତ୍ଥାସ୍ୟଂତିହରୟସ୍ସୁପ୍ତାନିଦ୍ରାକ୍ଷ୍ୟେୟଥା ॥ 14 ॥
ସୁହୃଦ୍ଭିର୍ବାଂଧଵୈଶ୍ଚୈଵଜ୍ଞାତିଭିଃସ୍ଵଜନେନ ଚ ।
ସର୍ଵଏଵସମେଷ୍ୟଂତିସମ୍ୟୁକ୍ତାଃପରୟାମୁଦା ॥ 15 ॥
ଅକାଲେପୁଷ୍ପଶବଲାଃଫଲଵଂତଶ୍ଚପାଦପାଃ ।
ଭଵିଷ୍ୟଂତିମହେଷ୍ଵାସ ନଦ୍ୟଶ୍ଚସଲିଲାୟୁତାଃ ॥ 16 ॥
ସଵ୍ରଣୈଃପ୍ରଥମଂଗାତ୍ରୈରିଦାନୀଂନିର୍ଵ୍ରଣୈସ୍ସମୈଃ ।
ତତସ୍ସମୁତ୍ଥିତାସ୍ସର୍ଵେସୁପ୍ତ୍ଵେଵହରିୟୂଥପାଃ ॥ 17 ॥
ବଭୂଵୁର୍ଵାନରାସ୍ସର୍ଵେକିଂନ୍ଵେତଦିତିଵିସ୍ମିତାଃ ।
କାକୁତ୍ସ୍ଥଂପରିପୂର୍ଣାର୍ଥଂଦୃଷ୍ଟଵାସର୍ଵେସୁରୋତ୍ତମାଃ ॥ 18 ॥
ଅବ୍ରୁଵନ୍ପରମପ୍ରୀତାସ୍ସ୍ତୁତ୍ଵାରାମଂସଲକ୍ଷ୍ମଣମ୍ ।
ଗଚ୍ଛାୟୋଧ୍ୟାମିତୋରାଜନ୍ଵିସର୍ଜୟ ଚ ଵାନରାନ୍ ॥ 19 ॥
ମୈଥିଲୀଂସାଂତ୍ଵୟସ୍ଵୈନାମନୁରକ୍ତାଂୟଶସ୍ଵିନୀମ୍ ।
ଭ୍ରାରାତରଂଭରତଂପଶ୍ୟତ୍ଵଚ୍ଛୋକାଦ୍ଵ୍ରତଚାରିଣମ୍ ॥ 20 ॥
ଶତ୍ରୁଘ୍ନଂ ଚ ମହାତ୍ମାନଂମାତ୍ରୂଃସର୍ଵାଃପରଂତପ ।
ଅଭିଷେଚୟଚାତ୍ମାନଂପୌରାନ୍ଗତ୍ଵାପ୍ରହର୍ଷୟ ॥ 21 ॥
ଏଵମୁକ୍ତ୍ଵାସହସ୍ରାକ୍ଷୋରାମଂସୌମିତ୍ରିଣାସହ ।
ଵିମାନୈଃସୂର୍ୟସଂକାଶୈର୍ୟୟୌହୃଷ୍ଟଃସୁରୈଃସହ ॥ 22 ॥
ଅଭିଵାଦ୍ୟ ଚ କାକୁତ୍ସ୍ଥଃ ସର୍ଵାଂସ୍ତାଂସ୍ତ୍ରିଦଶୋତ୍ତମାନ୍ ।
ଲକ୍ଷ୍ମଣେନସହଭ୍ରାତ୍ରାଵାସମାଜ୍ଞାପୟତ୍ତଦା ॥ 23 ॥
ତତସ୍ତୁସାଲକ୍ଷ୍ମଣରାମପାଲିତାମହାଚମୂର୍ହୃଷ୍ଟଜନାୟଶସ୍ଵିନୀ ।
ଶ୍ରିୟାଜ୍ଵଲଂତୀଵିରରାଜସର୍ଵତୋନିଶାପ୍ରଣୀତେଵହିଶୀତରଶ୍ମିନା ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ତ୍ରୟୋଵିଂଶତ୍ୟଧିକଶତତମସ୍ସର୍ଗଃ ॥
