ஶ்ரீமத்³வால்மீகீய ராமாயணே பா³லகாண்ட³ம் ।
அத² பஞ்சாஶஸ்ஸர்க:³ ।
தத: ப்ராகு³த்தராம் க³த்வா ராமஸ்ஸௌமித்ரிணா ஸஹ ।
விஶ்வாமித்ரம் புரஸ்க்ருத்ய யஜ்ஞவாடமுபாக³மத் ॥ 1 ॥
ராமஸ்து முனிஶார்தூ³லமுவாச ஸஹலக்ஷ்மண: ।
ஸாத்⁴வீ யஜ்ஞஸம்ருத்³தி⁴ர்ஹி ஜனகஸ்ய மஹாத்மன: ॥ 2 ॥
ப³ஹூனீஹ ஸஹஸ்ராணி நானாதே³ஶனிவாஸினாம் ।
ப்³ராஹ்மணானாம் மஹாபா⁴க³ வேதா³த்⁴யயனஶாலினாம் ॥ 3 ॥
ருஷிவாடாஶ்ச த்³ருஶ்யந்தே ஶகடீஶதஸங்குலா: ।
தே³ஶோ விதீ⁴யதாம் ப்³ரஹ்மன் யத்ர வத்ஸ்யாமஹே வயம் ॥ 4 ॥
ராமஸ்ய வசனம் ஶ்ருத்வா விஶ்வாமித்ரோ மஹாமுனி: ।
நிவேஶமகரோத்³தே³ஶே விவிக்தே ஸலிலாயுதே ॥ 5 ॥
விஶ்வாமித்ரமனுப்ராப்தம் ஶ்ருத்வா ஸ ந்ருபதிஸ்ததா³ ।
ஶதானந்த³ம் புரஸ்க்ருத்ய புரோஹிதமனிந்தி³தம் ॥ 6 ॥
ப்ரத்யுஜ்ஜகா³ம ஸஹஸா வினயேன ஸமன்வித: ।
ருத்விஜோபி மஹாத்மானஸ்த்வர்க்⁴யமாதா³ய ஸத்வரம் ॥ 7 ॥
விஶ்வாமித்ராய த⁴ர்மேண த³து³ர்மம்ந்த்ரபுரஸ்க்ருதம் ।
ப்ரதிக்³ருஹ்ய ச தாம் பூஜாம் ஜனகஸ்ய மஹாத்மன: ॥ 8 ॥
பப்ரச்ச² குஶலம் ராஜ்ஞோ யஜ்ஞஸ்ய ச நிராமயம் ।
ஸ தாம்ஶ்சாபி முனீன் ப்ருஷ்ட்வா ஸோபாத்⁴யாயபுரோத⁴ஸ: ॥ 9 ॥
யதா²ன்யாயம் ததஸ்ஸர்வைஸ்ஸமாக³ச்ச²த்ப்ரஹ்ருஷ்டவத் ।
அத² ராஜா முனிஶ்ரேஷ்ட²ம் க்ருதாஞ்ஜலிரபா⁴ஷத ॥ 1௦ ॥
ஆஸனே ப⁴க³வானாஸ்தாம் ஸஹைபி⁴ர்முனிபுங்க³வை: ।
ஜனகஸ்ய வசஶ்ஶ்ருத்வா நிஷஸாத³ மஹாமுனி: ॥ 11 ॥
புரோதா⁴ ருத்விஜஶ்சைவ ராஜா ச ஸஹ மந்த்ரிபி⁴: ।
ஆஸனேஷு யதா²ன்யாயமுபவிஷ்டான் ஸமந்தத: ॥ 12 ॥
த்³ருஷ்ட்வா ஸ ந்ருபதிஸ்தத்ர விஶ்வாமித்ரமதா²ப்³ரவீத் ।
அத்³ய யஜ்ஞஸம்ருத்⁴தி³ர்மே ஸப²லா தை³வதை: க்ருதா ॥ 13 ॥
அத்³ய யஜ்ஞப²லம் ப்ராப்தம் ப⁴க³வத்³த³ர்ஶனான்மயா ।
த⁴ன்யோஸ்ம்யனுக்³ருஹீதோஸ்மி யஸ்ய மே முனிபுங்க³வ ॥ 14 ॥
யஜ்ஞோபஸத³னம் ப்³ரஹ்மன் ப்ராப்தோஸி முனிபி⁴: ஸஹ ।
த்³வாத³ஶாஹம் து ப்³ரஹ்மர்ஷே ஶேஷமாஹுர்மனீஷிண: ॥ 15 ॥
ததோ பா⁴கா³ர்தி²னோ தே³வான் த்³ரஷ்டுமர்ஹஸி கௌஶிக ।
இத்யுக்த்வா முனிஶார்தூ³லம் ப்ரஹ்ருஷ்டவத³னஸ்ததா³ ॥ 16 ॥
புனஸ்தம் பரிபப்ரச்ச² ப்ராஞ்ஜலி: ப்ரணதோ ந்ருப: ।
இமௌ குமாரௌ ப⁴த்³ரம் தே தே³வதுல்யபராக்ரமௌ ॥ 17 ॥
கஜ³ஸிம்ஹக³தீ வீரௌ ஶார்தூ³லவ்ருஷபோ⁴பமௌ ।
பத்³மபத்ரவிஶாலாக்ஷௌ க²ட்³க³தூணீத⁴னுர்த⁴ரௌ ॥ 18 ॥
அஶ்வினாவிவ ரூபேண ஸமுபஸ்தி²தயௌவனௌ ।
யத்³ருச்ச²யைவ கா³ம் ப்ராப்தௌ தே³வலோகாதி³வாமரௌ ॥ 19 ॥
கத²ம் பத்³ப்⁴யாமிஹ ப்ராப்தௌ கிமர்த²ம் கஸ்ய வா முனே ।
வராயுத⁴த⁴ரௌ வீரௌ கஸ்ய புத்ரௌ மஹாமுனே ॥ 2௦ ॥
பூ⁴ஷயந்தாவிமம் தே³ஶம் சந்த்³ரஸூர்யாவிவாம்ப³ரம் ।
பரஸ்பரஸ்ய ஸத்³ருஶௌ ப்ரமாணேங்கி³தசேஷ்டிதை: ॥ 21 ॥
காகபக்ஷத⁴ரௌ வீரௌ ஶ்ரோதுமிச்சா²மி தத்த்வத: ।
தஸ்ய தத்³வசனம் ஶ்ருத்வா ஜனகஸ்ய மஹாத்மன: ॥ 22 ॥
ந்யவேத³யன்மஹாத்மானௌ புத்ரௌ த³ஶரத²ஸ்ய தௌ ।
ஸித்³தா⁴ஶ்ரமனிவாஸம் ச ராக்ஷஸானாம் வத⁴ம் ததா² ॥ 23 ॥
தச்சாக³மனமவ்யக்³ரம் விஶாலாயாஶ்ச த³ர்ஶனம் ।
அஹல்யாத³ர்ஶனம் சைவ கௌ³தமேன ஸமாக³மம் ॥ 24 ॥
மஹாத⁴னுஷி ஜிஜ்ஞாஸாம் கர்துமாக³மனம் ததா² ।
ஏதத்ஸர்வம் மஹாதேஜா ஜனகாய மஹாத்மனே ॥ 25 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே பா³லகாண்டே³ பஞ்சாஶஸ்ஸர்க:³ ॥
