ஶ்ரீமத்³வால்மீகீய ராமாயணே அரண்யகாண்ட³ம் ।
அத² ஸப்தபஞ்சாஶஸ்ஸர்க:³ ।
ராக்ஷஸம் ம்ருக³ரூபேண சரந்தம் காமரூபிணம் ।
நிஹத்ய ராமோ மாரீசம் தூர்ணம் பதி² ந்யவர்தத ॥ 1 ॥
தஸ்ய ஸந்த்வரமாணஸ்ய த்³ரஷ்டுகாமஸ்ய மைதி²லீம் ।
க்ரூரஸ்வனோத² கோ³மாயுர்வினநாதா³ஸ்ய ப்ருஷ்ட²த: ॥ 2 ॥
ஸ தஸ்ய ஸ்வரமாஜ்ஞாய தா³ருணம் ரோமஹர்ஷணம் ।
சிந்தயாமாஸ கோ³மாயோஸ்ஸ்வரேண பரிஶங்கித: ॥ 3 ॥
அஶுப⁴ம் ப³த மன்யேஹம் கோ³மாயுர்வாஶ்யதே யதா² ।
ஸ்வஸ்தி ஸ்யாத³பி வைதே³ஹ்யா ராக்ஷஸைர்ப⁴க்ஷணம் வினா ॥ 4 ॥
மாரீசேன து விஜ்ஞாய ஸ்வரமாலம்ப்³ய மாமகம் ।
விக்ருஷ்டம் ம்ருக³ரூபேண லக்ஷ்மணஶ்ஶ்ருணுயாத்³யதி³ ॥ 5 ॥
ஸ ஸௌமித்ரிஸ்ஸ்வரம் ஶ்ருத்வா தாம் ச ஹித்வாச மைதி²லீம் ।
தயேஹ ப்ரஹித: க்ஷிப்ரம் மத்ஸகாஶமிஹைஷ்யதி ॥ 6 ॥
ராக்ஷஸைஸ்ஸஹிதைர்னூனம் ஸீதாயா ஈப்ஸிதோ வத:⁴ ।
காஞ்சனஶ்ச ம்ருகோ³ பூ⁴த்வா வ்யபனீயாஶ்ரமாத்து மாம் ॥ 7 ॥
தூ³ரம் நீத்வா து மாரீசோ ராக்ஷஸோபூ⁴ச்ச²ரா ஹத: ।
ஹா லக்ஷ்மண ஹதோஸ்மீதி யத்³வாக்யம் வ்யாஜஹார ஹ ॥ 8 ॥
அபி ஸ்வஸ்தி ப⁴வேத்தாப்⁴யாம் ரஹிதாப்⁴யாம் மஹாவனே ।
ஜனஸ்தா²னநிமித்தம் ஹி க்ருதவைரோஸ்மி ராக்ஷஸை: ॥ 9 ॥
நிமித்தானி ச கோ⁴ராணி த்³ருஶ்யந்தேத்³ய ப³ஹூனி ச ।
இத்யேவம் சிந்தயன்ராமஶ்ஶ்ருத்வா கோ³மாயுனிஸ்ஸ்வனம் ॥ 1௦ ॥
ஆத்மனஶ்சாபனயனான்ம்ருக³ரூபேண ரக்ஷஸா ।
ஆஜகா³ம ஜனஸ்தா²னம் ராக⁴வ: பரிஶங்கித: ॥ 11 ॥
தம் தீ³னமனஸோ தீ³னமாஸேது³ர்ம்ருக³பக்ஷிண: ।
ஸவ்யம் க்ருத்வா மஹாத்மானம் கோ⁴ராம்ஶ்ச ஸஸ்ருஜுஸ்ஸ்வரான் ॥ 12 ॥
தானி த்³ருஷ்ட்வா நிமித்தானி மஹாகோ⁴ராணி ராக⁴வ: ।
ந்யவர்ததாத² த்வரிதோ ஜவேனாஶ்ரமமாத்மன: ॥ 13 ॥
ஸீதாம் ஸ து வராரோஹாம் லக்ஷ்மணம் ச மஹாப³லம் ।
ஆஜகா³ம ஜனஸ்தா²னம் சிந்தயன்னேவ ராக⁴வ: ॥ 14 ॥
ததோ லக்ஷ்மணமாயாந்தம் த³த³ர்ஶ விக³தப்ரப⁴ம் ।
ததோவிதூ³ரே ராமேண ஸமீயாய ஸ லக்ஷ்மண: ॥ 15 ॥
விஷண்ணஸ்ஸுவிஷண்ணேன து³:கி²தோ து³:க²பா⁴கி³னா ।
ஸஞ்ஜக³ர்ஹேத² தம் ப்⁴ராதா ஜ்யேஷ்டோ² லக்ஷ்மணமாக³தம் ॥ 16 ॥
விஹாய ஸீதாம் விஜனே வனே ராக்ஷஸஸேவிதே ।
க்³ருஹீத்வா ச கரம் ஸவ்யம் லக்ஷ்மணம் ரகு⁴னந்த³ன: ॥ 17 ॥
உவாச மது⁴ரோத³ர்கமித³ம் பருஷமார்திமத் ।
அஹோ லக்ஷ்மண க³ர்ஹ்யம் தே க்ருதம் யஸ்த்வம் விஹாய தாம் ॥ 18 ॥
ஸீதாமிஹாக³தஸ்ஸௌம்ய கச்சித்ஸ்வஸ்தி ப⁴வேதி³ஹ ।
ந மேஸ்தி ஸம்ஶயோ வீர ஸர்வதா² ஜனகாத்மஜா ॥ 19 ॥
வினஷ்டா ப⁴க்ஷிதா வாபி ராக்ஷஸைர்வனசாரிபி⁴: ।
அஶுபா⁴ன்யேவ பூ⁴யிஷ்ட²ம் யதா² ப்ராது³ர்ப⁴வந்தி மே ॥ 2௦ ॥
அபி லக்ஷ்மண ஸீதாயாஸ்ஸாமக்³ர்யம் ப்ராப்னுயாவஹே ।
ஜீவந்த்யா: புருஷவ்யாக்⁴ர ஸுதாயா ஜனகஸ்ய வை ॥ 21 ॥
யதா² வை ம்ருக³ஸங்கா⁴ஶ்ச கோ³மாயுஶ்சைவ பை⁴ரவம் ।
வாஶ்யந்தே ஶகுனாஶ்சாபி ப்ரதீ³ப்தாமபி⁴தோ தி³ஶம் ॥ 22 ॥
அபி ஸ்வஸ்தி ப⁴வேத்தஸ்யா ராஜபுத்ர்யா மஹாப³ல ।
இத³ம் ஹி ரக்ஷோ ம்ருக³ஸன்னிகாஶம் ப்ரலோப்⁴ய மாம் தூ³ரமனுப்ரயாந்தம் ।
ஹதம் கத²ஞ்சின்மஹதா ஶ்ரமேண ஸ ராக்ஷஸோபூ⁴ன்ம்ரியமாண ஏவ ॥ 23 ॥
மனஶ்ச மே தீ³னமிஹாப்ரஹ்ருஷ்டம் சக்ஷுஶ்ச ஸவ்யம் குருதே விகாரம் ।
அஸம்ஶயம் லக்ஷ்மண நாஸ்தி ஸீதா ஹ்ருதா ம்ருதா வா பதி² வர்ததே வா ॥ 24 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அரண்யகாண்டே³ ஸப்தபஞ்சாஶஸ்ஸர்க:³ ॥
