ஶ்ரீமத்³வால்மீகீய ராமாயணே பா³லகாண்ட³ம் ।
அத² ஸப்தஸப்ததிதமஸ்ஸர்க:³ ।
க³தே ராமே ப்ரஶாந்தாத்மா ராமோ தா³ஶரதி²ர்த⁴னு: ।
வருணாயாப்ரமேயாய த³தௌ³ ஹஸ்தே ஸஸாயகம் ॥ 1 ॥
அபி⁴வாத்³ய ததோ ராமோ வஸிஷ்ட²ப்ரமுகா²ன்ருஷீன் ।
பிதரம் விஹ்வலம் த்³ருஷ்ட்வா ப்ரோவாச ரகு⁴னந்த³ன: ॥ 2 ॥
ஜாமத³க்³ன்யோ க³தோ ராம: ப்ரயாது சதுரங்கி³ணீ ।
அயோத்⁴யாபி⁴முகீ² ஸேனா த்வயா நாதே²ன பாலிதா ॥ 3 ॥
ஸந்தி³ஶஸ்வ மஹாராஜ ஸேனாம் த்வச்சா²ஸனே ஸ்தி²தாம் ।
ஶாஸனம் காங்க்ஷதே ஸேனா சாதகாலிர்ஜலம் யதா² ॥ 4 ॥
ராமஸ்ய வசனம் ஶ்ருத்வா ராஜா த³ஶரத² ஸ்ஸுதம் ।
பா³ஹுப்⁴யாம் ஸம்பரிஷ்வஜ்ய மூர்த்⁴னி சாக்⁴ராய ராக⁴வம் ॥ 5 ॥
க³தோ ராம இதி ஶ்ருத்வா ஹ்ருஷ்ட: ப்ரமுதி³தோ ந்ருப: ।
புனர்ஜாதம் ததா³ மேனே புத்ரமாத்மானமேவ ச ॥ 6 ॥
சோத³யாமாஸ தாம் ஸேனாம் ஜகா³மாஶு தத: புரீம் ।
பதாகாத்⁴வஜினீம் ரம்யாம் தூர்யோத்³கு⁴ஷ்டனினாதி³தாம் ॥ 7 ॥
ஸிக்தராஜ பதா²ம் ரம்யாம் ப்ரகீர்ணகுஸுமோத்கராம் ।
ராஜப்ரவேஶஸுமுகை²: பௌரைர்மங்க³லவாதி³பி⁴: ॥ 8 ॥
ஸம்பூர்ணாம் ப்ராவிஶத்³ராஜா ஜனௌகை⁴ஸ்ஸமலங்க்ருதாம் ।
பௌரை: ப்ரத்யுத்³க³தோ தூ³ரம் த்³விஜைஶ்ச புரவாஸிபி⁴: ।
புத்ரைரனுக³த ஶ்ஶ்ரீமான் ஶ்ரீமத்³பி⁴ஶ்ச மஹாயஶா: ॥ 9 ॥
ப்ரவிவேஶ க்³ருஹம் ராஜா ஹிமவத்ஸத்³ருஶம் புன: ।
நனந்த³ ஸஜனோ ராஜா க்³ருஹே காமை ஸ்ஸுபூஜித: ॥ 1௦ ॥
கௌஸல்யா ச ஸுமித்ரா ச கைகேயீ ச ஸுமத்⁴யமா ।
வதூ⁴ப்ரதிக்³ரஹே யுக்தா யாஶ்சான்யா ராஜயோஷித: ॥ 11 ॥
ததஸ்ஸீதாம் மஹாபா⁴கா³மூர்மிலாம் ச யஶஸ்வினீம் ।
குஶத்⁴வஜஸுதே சோபே⁴ ஜக்³ருஹுர்ன்ருபபத்னய: ॥ 12 ॥
மங்க³லாலம்ப⁴னைஶ்சாபி ஶோபி⁴தா: க்ஷௌமவாஸஸ: ।
தே³வதாயதனான்யாஶு ஸர்வாஸ்தா: ப்ரத்யபூஜயன் ॥ 13 ॥
அபி⁴வாத்³யாபி⁴வாத்³யாம்ஶ்ச ஸர்வா ராஜஸுதாஸ்ததா³ ।
ஸ்வம் ஸ்வம் க்³ருஹமதா²ஸாத்³ய குபே³ரப⁴வனோபமம் ॥ 14 ॥
கோ³பி⁴ர்த⁴னைஶ்ச தா⁴ன்யைஶ்ச தர்பயித்வா த்³விஜோத்தமான் ।
ரேமிரே முதி³தா: ஸர்வா ப⁴ர்த்ருபி⁴: ஸஹிதா ரஹ: ॥ 15 ॥
குமாராஶ்ச மஹாத்மானோ வீர்யேணாப்ரதிமா பு⁴வி ।
க்ருததா³ரா: க்ருதாஸ்த்ராஶ்ச ஸத⁴னா: ஸஸுஹ்ருஜ்ஜனா: ॥ 16 ॥
ஶுஶ்ரூஷமாணா: பிதரம் வர்தயந்தி நரர்ஷபா⁴: ।
கஸ்யசித்த்வத² காலஸ்ய ராஜா த³ஶரத:² ஸுதம் ॥ 17 ॥
ப⁴ரதம் கைகயீபுத்ர மப்³ரவீத்³ரகு⁴னந்த³ன: ।
அயம் கேகயராஜஸ்ய புத்ரோ வஸதி புத்ரக ॥ 18 ॥
த்வாம் நேதுமாக³தோ வீர யுதா⁴ஜின்மாதுலஸ்தவ ।
ப்ரார்தி²தஸ்தேன த⁴ர்மஜ்ஞ மிதி⁴லாயாமஹம் ததா² ॥ 19 ॥
ருஷிமத்⁴யே து தஸ்ய த்வம் ப்ரீதிம் கர்துமிஹார்ஹஸி ।
ஶ்ருத்வா த³ஶரத²ஸ்யைதத்³ப⁴ரத: கைகயீஸுத: ॥ 2௦ ॥
அபி⁴வாத்³ய கு³ரும் ராமம் பரிஷ்வஜ்ய ச லக்ஷ்மணம் ।
க³மனாயாபி⁴சக்ராம ஶத்ருக்⁴னஸஹிதஸ்ததா³ ॥ 21 ॥
ஆப்ருச்ச்²ய பிதரம் ஶூரோ ராமம் சாக்லிஷ்டகாரிணம் ।
மாத்ருஶ்சாபி நரஶ்ரேஷ்ட² ஶ்ஶத்ருக்⁴னஸஹிதோ யயௌ ॥ 22 ॥
க³தே து ப⁴ரதே ராமோ லக்ஷ்மணஶ்ச மஹாப³ல: ।
பிதரம் தே³வஸம்ங்காஶம் பூஜயாமாஸதுஸ்ததா³ ॥ 23 ॥
பிதுராஜ்ஞாம் புரஸ்க்ருத்ய பௌரகார்யாணி ஸர்வஶ: ।
சகார ராமோ த⁴ர்மாத்மா ப்ரியாணி ச ஹிதானி ச ॥ 24 ॥
மாத்ருப்⁴யோ மாத்ருகார்யாணி க்ருத்வா பரமயந்த்ரித: ।
கு³ரூணாம் கு³ருகார்யாணி காலே காலேன்வவைக்ஷத ॥ 25 ॥
ஏவம் த³ஶரத:² ப்ரீதோ ப்³ராஹ்மணா நைக³மாஸ்ததா² ।
ராமஸ்ய ஶீலவ்ருத்தேன ஸர்வே விஷயவாஸின: ॥ 26 ॥
தேஷாமதியஶா லோகே ராம ஸ்ஸத்யபராக்ரம: ।
ஸ்வயம்பூ⁴ரிவ பூ⁴தானாம் ப³பூ⁴வ கு³ணவத்தர: ॥ 27 ॥
ராமஸ்து ஸீதயா ஸார்த⁴ம் விஜஹார ப³ஹூன்ருதூன் ।
மனஸ்ஸ்வீ தத்³க³தஸ்தஸ்யா: நித்யம் ஹ்ருதி³ ஸமர்பித: ॥ 28 ॥
ப்ரியா து ஸீதா ராமஸ்ய தா³ரா: பித்ருக்ருதா இதி ।
கு³ணாத்³ரூபகு³ணாச்சாபி ப்ரீதிர்பூ⁴யோப்⁴யவர்த⁴த ॥ 29 ॥
தஸ்யாஶ்ச ப⁴ர்தா த்³விகு³ணம் ஹ்ருத³யே பரிவர்ததே ।
அந்தர்ஜாதமபி வ்யக்தமாக்²யாதி ஹ்ருத³யம் ஹ்ருதா³ ॥ 3௦ ॥
தஸ்ய பூ⁴யோ விஶேஷேண மைதி²லீ ஜனகாத்மஜா ।
தே³வதாபி⁴ ஸ்ஸமா ரூபே ஸீதா ஶ்ரீரிவ ரூபிணீ ॥ 31 ॥
தயா ஸ ராஜர்ஷிஸுதோபி⁴ராமயா ஸமேயிவானுத்தமராஜகன்யயா ।
அதீவ ராம ஶ்ஶுஶுபே⁴பி⁴ராமயா ।
விபு⁴ ஶ்ஶ்ரியா விஷ்ணுரிவாமரேஶ்வர: ॥ 32 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே பா³லகாண்டே³ ஸப்தஸப்ததிதமஸ்ஸர்க:³ ॥
