ஶ்ரீமத்³வால்மீகீய ராமாயணே கிஷ்கிந்தா⁴காண்ட³ம் ।
அத² விம்ஶஸ்ஸர்க:³ ।
ராமசாபவிஸ்ருஷ்டேன ஶரேணாந்தகரேண தம் ।
த்³ருஷ்ட்வா வினிஹதம் பூ⁴மௌ தாரா தாராதி⁴பானநா ॥ 1 ॥
ஸா ஸமாஸாத்³ய ப⁴ர்தாரம் பர்யஷ்வஜத பா⁴மினீ ।
இஷுணாபி⁴ஹதம் த்³ருஷ்ட்வா வாலினம் குஞ்ஜரோபமம் ॥ 2 ॥
வானரேந்த்³ர மஹேந்த்³ராப⁴ம் ஶோகஸந்தப்தமானஸா ।
தாரா தருமிவோன்மூலம் பர்யதே³வயதா³துரா ॥ 3 ॥
ரணே தா³ருண விக்ராந்த ப்ரவீர ப்லவதாம் வர ।
கிம் தீ³னாமபுரோபா⁴கா³மத்³ய த்வம் நாபி⁴பா⁴ஷஸே ॥ 4 ॥
உத்திஷ்ட² ஹரிஶார்தூ³ல பஜ⁴ஸ்வ ஶயனோத்தமம் ।
நைவம்விதா⁴ஶ்ஶேரதே ஹி பூ⁴மௌ ந்ருபதிஸத்தமா: ॥ 5 ॥
அதீவ க²லு தே காந்தா வஸுதா⁴ வஸுதா⁴தி⁴ப ।
க³தாஸுரபி யாம் கா³த்ரைர்மாம் விஹாய நிஷேவஸே ॥ 6 ॥
வ்யக்தமன்யா த்வயா வீர த⁴ர்மத: ஸம்ப்ரவர்திதா ।
கிஷ்கிந்தே⁴வ புரீ ரம்யா ஸ்வர்க³மார்கே³ வினிர்மிதா ॥ 7 ॥
யான்யஸ்மாபி⁴ஸ்த்வயா ஸார்த⁴ம் வனேஷு மது⁴க³ந்தி⁴ஷு ।
விஹ்ருதானி த்வயா காலே தேஷாமுபரம: க்ருத: ॥ 8 ॥
நிரானந்தா³ நிராஶாஹம் நிமக்³னா ஶோகஸாக³ரே ।
த்வயி பஞ்சத்வமாபன்னே மஹாயூத²பயூத²பே ॥ 9 ॥
ஹ்ருத³யம் ஸுஸ்தி²ரம் மஹ்யம் த்³ருஷ்ட்வா வினிஹதம் பதிம் ।
யன்ன ஶோகாபி⁴ஸந்தப்தம் ஸ்பு²டதேத்³ய ஸஹஸ்ரதா⁴ ॥ 1௦ ॥
ஸுக்³ரீவஸ்ய த்வயா பா⁴ர்யா ஹ்ருதா ஸ ச விவாஸித: ।
யத்து த்தஸ்ய த்வயா வ்யுஷ்டி: ப்ராப்தேயம் ப்லவகா³தி⁴ப ॥ 11 ॥
நிஶ்ஶ்ரேயஸபரா மோஹாத்த்வயா சாஹம் விக³ர்ஹிதா ।
யைஷாப்³ருவம் ஹிதம் வாக்யம் வானரேந்த்³ர ஹிதைஷிணீ ॥ 12 ॥
ரூபயௌவனத்³ருப்தானாம் த³க்ஷிணானாம் ச மானத³ ।
நூனமப்ஸரஸாமார்ய சித்தானி ப்ரமதி²ஷ்யஸி ॥ 13 ॥
காலோ நிஸ்ஸம்ஶயோ நூனம் ஜீவிதாந்தகரஸ்தவ ।
ப³லாத்³யேனாவபன்னோஸி ஸுக்³ரீவஸ்யாவஶோ வஶம் ॥ 14 ॥
வைத⁴வ்யம் ஶோகஸந்தாபம் க்ருபணம் க்ருபணா ஸதீ ।
அது³:கோ²பசிதா பூர்வம் வர்தயிஷ்யாம்யனாத²வத் ॥ 15 ॥
லாலிதஶ்சாங்க³தோ³ வீரஸ்ஸுகுமாரஸ்ஸுகோ²சித: ।
வர்த்ஸ்யதே காமவஸ்தா²ம் மே பித்ருவ்யே க்ரோத⁴மூர்சி²தே ॥ 16 ॥
குருஷ்வ பிதரம் புத்ர ஸுத்³ருஷ்டம் த⁴ர்மவத்ஸலம் ।
து³ர்லப⁴ம் த³ர்ஶனம் வத்ஸ தவ தஸ்ய ப⁴விஷ்யதி ॥ 17 ॥
ஸமாஶ்வாஸய புத்ரம் த்வம் ஸந்தே³ஶம் ஸந்தி³ஶஸ்வ மே ।
மூர்த்⁴னி சைனம் ஸமாக்⁴ராய ப்ரவாஸம் ப்ரஸ்தி²தோ ஹ்யஸி ॥ 18 ॥
ராமேண ஹி மஹத்கர்ம க்ருதம் த்வாமபி⁴னிக்⁴னதா ।
ஆன்ருண்யம் ச க³தம் தஸ்ய ஸுக்³ரீவஸ்ய ப்ரதிஶ்ரவே ॥ 19 ॥
ஸகாமோ ப⁴வ ஸுக்³ரீவ ருமாம் த்வம் ப்ரதிபத்ஸ்யஸே ।
பு⁴ங்க்ஷவ ராஜ்யமனுத்³விக்³னஶ்ஶஸ்தோ ப்⁴ராதா ரிபுஸ்தவ ॥ 2௦ ॥
கிம் மாமேவம் விலபதீம் ப்ரேம்ணா த்வம் நாபி⁴பா⁴ஷஸே ।
இமா: பஶ்ய வரா ப³ஹ்வீர்பா⁴ர்யாஸ்தே வானரேஶ்வர ॥ 21 ॥
தஸ்யா விலபிதம் ஶ்ருத்வா வானர்யஸ்ஸர்வதஶ்ச தா: ।
பரிக்³ருஹ்யாங்க³த³ம் தீ³னம் து³:கா²ர்தா பரிசுக்ருஶு: ॥ 22 ॥
கிமங்க³த³ம் ஸாங்க³த³வீரபா³ஹோ விஹாய யாஸ்யத்³ய சிரப்ரவாஸம் ।
ந யுக்தமேவம் கு³ணஸன்னிக்ருஷ்டம் விஹாய புத்ரம் ப்ரியபுத்ர க³ந்தும் ॥ 23 ॥
கிமப்ரியம் தே ப்ரிய சாருவேஷ மயா க்ருதம் நாத² ஸுதேன வா தே ।
ஸஹாங்க³தா³ம் மாம் ப்ரவிஹாய வீர யத்ப்ரஸ்தி²தோ தீ³ர்க⁴ மித: ப்ரவாஸம் ॥ 24 ॥
யத்³யப்ரியம் கிஞ்சித³ஸம்ப்ரதா⁴ர்ய க்ருதம் மயா ஸ்யாத்தவ தீ³ர்க⁴பா³ஹோ ।
க்ஷமஸ்வ மே தத்³த⁴ரிவம்ஶனாத² வ்ரஜாமி மூர்த்⁴னா தவ வீர பாதௌ³ ॥ 25 ॥
ததா² து தாரா கருணம் ருத³ந்தீ ப⁴ர்துஸ்ஸமீபே ஸஹ வானரீபி⁴: ।
வ்யவஸ்யத ப்ராயமுபோபவேஷ்டு மனிந்த்³யவர்ணா பு⁴வி யத்ர வாலீ ॥ 26 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே கிஷ்கிந்தா⁴காண்டே³ விம்ஶஸ்ஸர்க:³ ॥
