ஶ்ரீமத்³வால்மீகீய ராமாயணே அயோத்⁴யாகாண்ட³ம் ।
அத² அஷ்டஷஷ்டிதமஸ்ஸர்க:³ ।
தேஷாம் ஹி வசனம் ஶ்ருத்வா வஸிஷ்ட:² ப்ரத்யுவாச ஹ ।
மித்ராமாத்யக³ணான்ஸர்வான்ப்³ராஹ்மணாம்ஸ்தானித³ம் வச: ॥ 1 ॥
யத³ஸௌ மாதுலகுலே த³த்தராஜ்யம் பரம் ஸுகீ² ।
ப⁴ரதோ வஸதி ப்⁴ராத்ரா ஶத்ருக்⁴னேன ஸமன்வித: ॥ 2 ॥
தச்சீ²க்⁴ரம் ஜவனா தூ³தா க³ச்ச²ந்து த்வரிதைர்ஹயை: ।
ஆனேதும் ப்⁴ராதரௌ வீரௌ கிம் ஸமீக்ஷாமஹே வயம் ॥ 3 ॥
க³ச்ச²ந்த்விதி தத ஸ்ஸர்வே வஸிஷ்ட²ம் வாக்யமப்³ருவன் ।
தேஷாம் தத்³வசனம் ஶ்ரூத்வா வஸிஷ்டோ² வாக்யமப்³ரவீத் ॥ 4 ॥
ஏஹி ஸித்³தா⁴ர்த² விஜய ஜயந்தாஶோக நந்த³ன ।
ஶ்ரூயதாமிதி கர்தவ்யம் ஸர்வானேவ ப்³ரவீமி வ: ॥ 5 ॥
புரம் ராஜக்³ருஹம் க³த்வா ஶீக்⁴ரம் ஶீக்⁴ரஜவை ர்ஹயை: ।
த்யக்தஶோகைரித³ம் வாச்ய ஶ்ஶாஸனாத்³ப⁴ரதோ மம ॥ 6 ॥
புரோஹித ஸ்த்வாம் குஶலம் ப்ராஹ ஸர்வே ச மந்த்ரிண: ।
த்வரமாணஶ்ச நிர்யாஹி க்ருத்யமாத்யயிகம் த்வயா ॥ 7 ॥
மா சாஸ்மை ப்ரோஷிதம் ராமம் மா சாஸ்மை பிதரம் ம்ருதம் ।
ப⁴வந்த ஶ்ஶம்ஸிஷுர்க³த்வா ராக⁴வாணாமிமம் க்ஷயம் ॥ 8 ॥
கௌஶேயானி ச வஸ்த்ராணி பூ⁴ஷணானி வராணி ச ।
க்ஷிப்ரமாத³ய ராஜ்ஞஶ்ச ப⁴ரதஸ்ய ச க³ச்ச²த ॥ 9 ॥
த³த்தபத்²யஶனா தூ³தா ஜக்³முஸ்ஸ்வம் ஸ்வம் நிவேஶனம் ।
கேகயாம் ஸ்தே க³மிஷ்யந்தோ ஹயானாருஹ்ய ஸம்மதான் ॥ 1௦ ॥
தத: ப்ராஸ்தா²னிகம் க்ருத்வா கார்யஶேஷமனந்தரம் ।
வஸிஷ்டே²னாப்⁴யனுஜ்ஞாதா தூ³தா ஸ்ஸந்த்வரிதா யயு: ॥ 11 ॥
ந்யந்தேனாபரதாலஸ்ய ப்ரலம்ப³ஸ்யோத்தரம் ப்ரதி ।
நிஷேவமாணா ஸ்தே ஜக்³முர்னதீ³ம் மத்⁴யேன மாலினீம் ॥ 12 ॥
தே ஹஸ்தினாபுரே க³ங்கா³ம் தீர்த்வா ப்ரத்யங்முகா² யயு: ।
பாஞ்சாலதே³ஶமாஸாத்³ய மத்⁴யேன குருஜாங்க³லம் ॥ 13 ॥
ஸராம்ஸி ச ஸுபூர்ணானி நதீ³ஶ்ச விமலோத³கா: ।
நிரீக்ஷமாணா ஸ்தே ஜக்³முர்தூ³தா: கார்யவஶாத்³த்³ருதம் ॥ 14 ॥
தே ப்ரஸன்னோத³காம் தி³வ்யாம் நானாவிஹக³ஸேவிதாம் ।
உபாதிஜக்³முர்வேகே³ன ஶரத³ண்டா³ம் ஜனாகுலாம் ॥ 15 ॥
நிகூலவ்ருக்ஷமாஸாத்³ய தி³வ்யம் ஸத்யோபயாசனம் ।
அபி⁴க³ம்யாபி⁴வாத்³யம் தம் குலிங்கா³ம் ப்ராவிஶன்புரீம் ॥ 16 ॥
ஆபி⁴காலம் தத: ப்ராப்ய தே போ³தி⁴ப⁴வனாச்ச்யுதாம் ।
பித்ருபைதாமஹீம் புண்யாம் தேருரிக்ஷுமதீம் நதீ³ம் ॥ 17 ॥
அவேக்ஷ்யாஞ்ஜலிபானாம்ஶ்ச ப்³ராஹ்மணான்வேத³பாரகா³ன் ।
யயுர்மத்⁴யேன பா³ஹ்லீகான் ஸுதா³மானம் ச பர்வதம் ॥ 18 ॥
விஷ்ணோ: பத³ம் ப்ரேக்ஷமாணா விபாஶாஞ்சாபி ஶால்மலீம் ।
நதீ³ர்வாபீ ஸ்தடாகானி பல்வலானி ஸராம்ஸி ச ॥ 19 ॥
பஶ்யந்தோ விவிதா⁴ம்ஶ்சாபி ஸிம்ஹாவ்யாக்⁴ரம்ருக³ த்³விபான் ।
யயு: பதா²திமஹதா ஶாஸனம் ப⁴ர்துரீப்ஸவ: ॥ 2௦ ॥
தே ஶ்ராந்தவாஹனா தூ³தா விக்ருஷ்ணேன பதா² தத: ।
கி³ரிவ்ரஜம் புரவரம் ஶீக்⁴ரமாஸேது³ரஞ்ஜஸா ॥ 21 ॥
ப⁴ர்து: ப்ரியார்த²ம் குலரக்ஷணார்த²ம் ப⁴ர்துஶ்ச வம்ஶஸ்ய பரிக்³ரஹார்த²ம் ।
அஹேட³மானா ஸ்த்வரயா ஸ்ம தூ³தா ராத்ர்யாந்து தே தத்புரமேவ யாதா: ॥ 22 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அயோத்⁴யாகாண்டே³ அஷ்டஷஷ்டிதமஸ்ஸர்க:³ ॥
