શ્રીમદ્વાલ્મીકીય રામાયણે બાલકાંડમ્ ।
અથ પંચાશસ્સર્ગઃ ।
તતઃ પ્રાગુત્તરાં ગત્વા રામસ્સૌમિત્રિણા સહ ।
વિશ્વામિત્રં પુરસ્કૃત્ય યજ્ઞવાટમુપાગમત્ ॥ 1 ॥
રામસ્તુ મુનિશાર્દૂલમુવાચ સહલક્ષ્મણઃ ।
સાધ્વી યજ્ઞસમૃદ્ધિર્હિ જનકસ્ય મહાત્મનઃ ॥ 2 ॥
બહૂનીહ સહસ્રાણિ નાનાદેશનિવાસિનામ્ ।
બ્રાહ્મણાનાં મહાભાગ વેદાધ્યયનશાલિનામ્ ॥ 3 ॥
ઋષિવાટાશ્ચ દૃશ્યંતે શકટીશતસંકુલાઃ ।
દેશો વિધીયતાં બ્રહ્મન્ યત્ર વત્સ્યામહે વયમ્ ॥ 4 ॥
રામસ્ય વચનં શ્રુત્વા વિશ્વામિત્રો મહામુનિઃ ।
નિવેશમકરોદ્દેશે વિવિક્તે સલિલાયુતે ॥ 5 ॥
વિશ્વામિત્રમનુપ્રાપ્તં શ્રુત્વા સ નૃપતિસ્તદા ।
શતાનંદં પુરસ્કૃત્ય પુરોહિતમનિંદિતમ્ ॥ 6 ॥
પ્રત્યુજ્જગામ સહસા વિનયેન સમન્વિતઃ ।
ઋત્વિજોઽપિ મહાત્માનસ્ત્વર્ઘ્યમાદાય સત્વરમ્ ॥ 7 ॥
વિશ્વામિત્રાય ધર્મેણ દદુર્મંંત્રપુરસ્કૃતમ્ ।
પ્રતિગૃહ્ય ચ તાં પૂજાં જનકસ્ય મહાત્મનઃ ॥ 8 ॥
પપ્રચ્છ કુશલં રાજ્ઞો યજ્ઞસ્ય ચ નિરામયમ્ ।
સ તાંશ્ચાપિ મુનીન્ પૃષ્ટ્વા સોપાધ્યાયપુરોધસઃ ॥ 9 ॥
યથાન્યાયં તતસ્સર્વૈસ્સમાગચ્છત્પ્રહૃષ્ટવત્ ।
અથ રાજા મુનિશ્રેષ્ઠં કૃતાંજલિરભાષત ॥ 10 ॥
આસને ભગવાનાસ્તાં સહૈભિર્મુનિપુંગવૈઃ ।
જનકસ્ય વચશ્શ્રુત્વા નિષસાદ મહામુનિઃ ॥ 11 ॥
પુરોધા ઋત્વિજશ્ચૈવ રાજા ચ સહ મંત્રિભિઃ ।
આસનેષુ યથાન્યાયમુપવિષ્ટાન્ સમંતતઃ ॥ 12 ॥
દૃષ્ટ્વા સ નૃપતિસ્તત્ર વિશ્વામિત્રમથાબ્રવીત્ ।
અદ્ય યજ્ઞસમૃધ્દિર્મે સફલા દૈવતૈઃ કૃતા ॥ 13 ॥
અદ્ય યજ્ઞફલં પ્રાપ્તં ભગવદ્દર્શનાન્મયા ।
ધન્યોઽસ્મ્યનુગૃહીતોઽસ્મિ યસ્ય મે મુનિપુંગવ ॥ 14 ॥
યજ્ઞોપસદનં બ્રહ્મન્ પ્રાપ્તોઽસિ મુનિભિઃ સહ ।
દ્વાદશાહં તુ બ્રહ્મર્ષે શેષમાહુર્મનીષિણઃ ॥ 15 ॥
તતો ભાગાર્થિનો દેવાન્ દ્રષ્ટુમર્હસિ કૌશિક ।
ઇત્યુક્ત્વા મુનિશાર્દૂલં પ્રહૃષ્ટવદનસ્તદા ॥ 16 ॥
પુનસ્તં પરિપપ્રચ્છ પ્રાંજલિઃ પ્રણતો નૃપઃ ।
ઇમૌ કુમારૌ ભદ્રં તે દેવતુલ્યપરાક્રમૌ ॥ 17 ॥
ગજસિંહગતી વીરૌ શાર્દૂલવૃષભોપમૌ ।
પદ્મપત્રવિશાલાક્ષૌ ખડ્ગતૂણીધનુર્ધરૌ ॥ 18 ॥
અશ્વિનાવિવ રૂપેણ સમુપસ્થિતયૌવનૌ ।
યદૃચ્છયૈવ ગાં પ્રાપ્તૌ દેવલોકાદિવામરૌ ॥ 19 ॥
કથં પદ્ભ્યામિહ પ્રાપ્તૌ કિમર્થં કસ્ય વા મુને ।
વરાયુધધરૌ વીરૌ કસ્ય પુત્રૌ મહામુને ॥ 20 ॥
ભૂષયંતાવિમં દેશં ચંદ્રસૂર્યાવિવાંબરમ્ ।
પરસ્પરસ્ય સદૃશૌ પ્રમાણેંગિતચેષ્ટિતૈઃ ॥ 21 ॥
કાકપક્ષધરૌ વીરૌ શ્રોતુમિચ્છામિ તત્ત્વતઃ ।
તસ્ય તદ્વચનં શ્રુત્વા જનકસ્ય મહાત્મનઃ ॥ 22 ॥
ન્યવેદયન્મહાત્માનૌ પુત્રૌ દશરથસ્ય તૌ ।
સિદ્ધાશ્રમનિવાસં ચ રાક્ષસાનાં વધં તથા ॥ 23 ॥
તચ્ચાગમનમવ્યગ્રં વિશાલાયાશ્ચ દર્શનમ્ ।
અહલ્યાદર્શનં ચૈવ ગૌતમેન સમાગમમ્ ॥ 24 ॥
મહાધનુષિ જિજ્ઞાસાં કર્તુમાગમનં તથા ।
એતત્સર્વં મહાતેજા જનકાય મહાત્મને ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે પંચાશસ્સર્ગઃ ॥
