ஶ்ரீமத்³வால்மீகீய ராமாயணே அயோத்⁴யாகாண்ட³ம் ।
அத² த்³விஸப்ததிதமஸ்ஸர்க:³ ।
அபஶ்யம்ஸ்து ததஸ்தத்ர பிதரம் பிதுராலயே ।
ஜகா³ம ப⁴ரதோ த்³ரஷ்டும் மாதரம் மாதுராலயே ॥ 1 ॥
அனுப்ராப்தம் து தம் த்³ருஷ்ட்வா கைகேயீ ப்ரோஷிதம் ஸுதம் ।
உத்பபாத ததா³ ஹ்ருஷ்டா த்யக்த்வா ஸௌவர்ணமாஸனம் ॥ 2 ॥
ஸ ப்ரவிஶ்யைவ த⁴ர்மாத்மா ஸ்வக்³ருஹம் ஶ்ரீவிவர்ஜிதம் ।
ப⁴ரத: ப்ரதிஜக்³ராஹ ஜனந்யாஶ்சரணௌ ஶுபௌ⁴ ॥ 3 ॥
ஸா தம் மூர்த⁴ன்யுபாக்⁴ராய பரிஷ்வஜ்ய யஶஸ்வினம் ।
அங்கே ப⁴ரதமாரோப்ய ப்ரஷ்டும் ஸமுபசக்ரமே ॥ 4 ॥
அத்³ய தே கதிசித்³ராத்ர்ய ஶ்ச்யுதஸ்யார்யகவேஶ்மன: ।
அபி நாத்⁴வஶ்ரமஶஶீக்⁴ரம் ரதே²னாபததஸ்தவ ॥ 5 ॥
ஆர்யகஸ்தே ஸுகுஶலீ யுதா⁴ஜின்மாதுலஸ்தவ ।
ப்ரவாஸாச்ச ஸுக²ம் புத்ர ஸர்வம் மே வக்துமர்ஹஸி ॥ 6 ॥
ஏவம் ப்ருஷ்டஸ்து கைகேய்யா ப்ரியம் பார்தி²வனந்த³ன: ।
ஆசஷ்ட ப⁴ரத ஸ்ஸர்வம் மாத்ரே ராஜீவலோசன: ॥ 7 ॥
அத்³ய மே ஸப்தமீ ராத்ரிஶ்ச்யுதஸ்யார்யகவேஶ்மன: ।
அம்பா³யா: குஶலீ தாத யுதா⁴ஜின்மாதுலஶ்ச மே ॥ 8 ॥
யன்மே த⁴னம் ச ரத்னம் ச த³தௌ³ ராஜா பரந்தப: ।
பரிஶ்ராந்தம் பத்²யப⁴வத்ததோஹம் பூர்வமாக³த: ॥ 9 ॥
ராஜவாக்யஹரைர்தூ³தைஸ்த்வர்யமாணோஹமாக³த: ।
யத³ஹம் ப்ரஷ்டுமிச்சா²மி தத³ம்பா³ வக்துமர்ஹதி ॥ 1௦ ॥
ஶூன்யோயம் ஶயனீயஸ்தே பர்யங்கோ ஹேமபூ⁴ஷித: ।
ந சாயமிக்ஷ்வாகுஜன: ப்ரஹ்ருஷ்ட: ப்ரதிபா⁴தி மா ॥ 11 ॥
ராஜா ப⁴வதி பூ⁴யிஷ்ட²மிஹாம்பா³யா நிவேஶனே ।
தமஹம் நாத்³ய பஶ்யாமி த்³ரஷ்டுமிச்ச²ன்னிஹாக³த: ॥ 12 ॥
பிதுர்க்³ரஹீஷ்யே சரணௌ தம் மமாக்²யாஹி ப்ருச்ச²த: ।
ஆஹோஸ்வித³ம்ப³ ஜ்யேஷ்டா²யா: கௌஸல்யாயா நிவேஶனே ॥ 13 ॥
தம் ப்ரத்யுவாச கைகேயீ ப்ரியவத்³கோ⁴ரமப்ரியம் ।
அஜானந்தம் ப்ரஜானந்தீ ராஜ்யலோபே⁴ன மோஹிதா ॥ 14 ॥
யா க³திஸ்ஸர்வபூ⁴தானாம் தாம் க³திம் தே பிதா க³த: ।
ராஜா மஹத்மா தேஜஸ்வீ யாயஜூகஸ்ஸதாம் க³தி: ॥ 15 ॥
தச்ச்²ருத்வா ப⁴ரதோ வாக்யம் த⁴ர்மாபி⁴ஜனவாஞ்சுசி: ।
பபாத ஸஹஸா பூ⁴மௌ பித்ருஶோகப³லார்தி³த: ॥ 16 ॥
ஹா ஹதோஸ்மீதி க்ருபணாம் தீ³னாம் வாசமுதீ³ரயன் ।
நிபபாத மஹாபா³ஹுர்பா³ஹூ விக்ஷிப்ய வீர்யவான் ॥ 17 ॥
ததஶ்ஶோகேன ஸம்வீத: பிதுர்மரணது³:கி²த: ।
விலலாப மஹாதேஜா ப்⁴ராந்தாகுலிதசேதன: ॥ 18 ॥
ஏதத்ஸுருசிரம் பா⁴தி பிதுர்மே ஶயனம் புரா ।
ஶஶினேவாமலம் ராத்ரௌ க³க³னம் தோயதா³த்யயே ॥ 19 ॥
ததி³த³ம் ந விபா⁴த்யத்³ய விஹீனம் தேன தீ⁴மதா ।
வ்யோமேவ ஶஶினா ஹீனமப்ச்சு²ஷ்க இவ ஸாக³ர: ॥ 2௦ ॥
பா³ஷ்பமுத்ஸ்ருஜ்ய் கண்டே²ன ஸ்வாத்மனா பரமபீடி³த: ।
ஆச்சா²த்³ய வத³னம் ஶ்ரீமத்³வஸ்த்ரேண ஜயதாம் வர: ॥ 21 ॥
தமார்தம் தே³வஸங்காஶம் ஸமீக்ஷ்ய பதிதம் பு⁴வி ।
நிக்ருத்தமிவ ஸாலஸ்ய ஸ்கந்த⁴ம் பரஶுனா வனே ॥ 22 ॥
மத்தமாதங்க³ஸங்காஶம் சந்த்³ரார்கஸத்³ருஶம் பு⁴வ: ।
உத்தா²பயித்வா ஶோகார்தம் வசனம் சேத³மப்³ரவீத் ॥ 23 ॥
உத்திஷ்டோ²த்திஷ்ட² கிம் ஶேஷே ராஜபுத்ர மஹாயஶ: ।
த்வத்³விதா⁴ நஹி ஶோசந்தி ஸந்த ஸ்ஸத³ஸி ஸம்மதா: ॥ 24 ॥
தா³னயஜ்ஞாதி⁴காரா ஹி ஶீலஶ்ருதிவசோனுகா³ ।
பு³த்³தி⁴ஸ்தே பு³த்³தி⁴ஸம்பன்ன ப்ரபே⁴வார்கஸ்ய மந்தி³ரே ॥ 25 ॥
ஸ ருதி³த்வா சிரம் காலம் பூ⁴மௌ விபரிவ்ருத்ய ச ।
ஜனநீம் ப்ரத்யுவாசேத³ம் ஶோகைர்ப³ஹுபி⁴ராவ்ருத: ॥ 26 ॥
அபி⁴ஷேக்ஷ்யதி ராமம் நு ராஜா யஜ்ஞம் நு யக்ஷ்யதே ।
இத்யஹம் க்ருதஸங்கல்போ ஹ்ருஷ்டோ யாத்ராமயாஸிஷம் ॥ 27 ॥
ததி³த³ம் ஹ்யன்யதா² பூ⁴தம் வ்யவதீ³ர்ணம் மனோ மம ।
பிதரம் யோ ந பஶ்யாமி நித்யம் ப்ரியஹிதே ரதம் ॥ 28 ॥
அம்ப³ கேனாத்யகா³த்³ராஜா வ்யாகி⁴னா மய்யனாக³தே ।
த⁴ன்யா ராமாத³யஸ்ஸர்வே யை: பிதா ஸம்ஸ்க்ருத ஸ்ஸ்வயம் ॥ 29 ॥
ந நூனம் மாம் மஹாராஜ: ப்ராப்தம் ஜானாதி கீர்திமான் ।
உபஜிக்⁴ரேத்³தி⁴ மூர்த்⁴னி தாத ஸ்ஸன்னம்ய ஸத்வரம் ॥ 3௦ ॥
க்வ ஸ பாணிஸ்ஸுக²ஸ்பர்ஶஸ்தாதஸ்யாக்லிஷ்டகர்மண: ।
யேன மாம் ரஜஸா த்⁴வஸ்தமபீ⁴க்ஷ்ணம் பரிமார்ஜதி ॥ 31 ॥
யோ மே ப்⁴ராதா பிதா ப³ந்து⁴ர்யஸ்ய தா³ஸோஸ்மி தீ⁴மத: ।
தஸ்ய மாம் ஶீக்⁴ரமாக்²யாஹி ராமஸ்யாக்லிஷ்டகர்மண: ॥ 32 ॥
பிதா ஹி ப⁴வதி ஜ்யேஷ்டோ² த⁴ர்மமார்யஸ்ய ஜானத: ।
தஸ்ய பாதௌ³ க்³ரஹீஷ்யாமி ஸ ஹீதா³னீம் க³திர்மம ॥ 33 ॥
த⁴ர்மவித்³த⁴ர்மனித்யஶ்ச ஸத்யஸந்தோ⁴ த்³ருட⁴வ்ரத: ।
ஆர்ய: கிமப்³ரவீத்³ராஜா பிதா மே ஸத்யவிக்ரம: ॥ 34 ॥
பஶ்சிமம் ஸாது⁴ ஸந்தே³ஶமிச்சா²மி ஶ்ரோதுமாத்மன: ।
இதி ப்ருஷ்டா யதா²தத்த்வம் கைகேயீ வாக்யமப்³ரவீத் ॥ 35 ॥
ராமேதி ராஜா விலபன் ஹா ஸீதே லக்ஷ்மணேதி ச ।
ஸ மஹாத்மா பரம் லோகம் க³தோ க³திமதாம் வர: ॥ 36 ॥
இமாம் து பஶ்சிமாம் வாசம் வ்யாஜஹார பிதா தவ ।
காலத⁴ர்மபரிக்ஷிப்த: பாஶைரிவ மஹாகஜ³: ॥ 37 ॥
ஸித்³தா⁴ர்தா²ஸ்தே நரா ராமமாக³தம் ஸஹ ஸீதயா ।
லக்ஷ்மணம் ச மஹாபா³ஹும் த்³ரக்ஷ்யந்தி புனராக³தம் ॥ 38 ॥
தச்ச்²ருத்வா விஷஸாதை³வ த்³விதீயாப்ரியஶம்ஸனாத் ।
விஷண்ணவத³னோ பூ⁴த்வா பூ⁴ய: பப்ரச்ச² மாதரம் ॥ 39 ॥
க்வ சேதா³னீம் ஸ த⁴ர்மாத்மா கௌஸல்யானந்த³வர்த⁴ன: ।
லக்ஷ்மணேன ஸஹ ப்⁴ராத்ரா ஸீதயா ச ஸமம் க³த: ॥ 4௦ ॥
ததா² ப்ருஷ்டா யதா²தத்த்வமாக்²யாதுமுபசக்ரமே ।
மாதாஸ்ய ஸுமஹத்³வாக்யம் விப்ரியம் ப்ரியஶங்கயா ॥ 41 ॥
ஸ ஹி ராஜஸுத: புத்ர சீரவாஸா மஹாவனம் ।
த³ண்ட³கான்ஸஹ வைதே³ஹ்யா லக்ஷ்மணானுசரோ க³த: ॥ 42 ॥
தச்ச்²ருத்வா ப⁴ரதஸ்த்ரஸ்தோ ப்⁴ராதுஶ்சாரித்ரஶங்கயா ।
ஸ்வஸ்ய வம்ஶஸ்ய மஹாத்ம்யாத்ப்ரஷ்டும் ஸமுபசக்ரமே ॥ 43 ॥
கச்சின்ன ப்³ராஹ்மணத⁴னம் ஹ்ருதம் ராமேண கஸ்யசித் ।
கச்சின்னாட்⁴யோ த³ரித்³ரோ வா தேனாபாபோ விஹிம்ஸித: ॥ 44 ॥
கச்சின்ன பரதா³ரான்வா ராஜபுத்ரோபி⁴மன்யதே ।
கஸ்மாத்ஸ த³ண்ட³காரண்யே ப்⁴ரூணஹேவ விவாஸித: ॥ 45 ॥
அதா²ஸ்ய சபலா மாதா தத்ஸ்வகர்ம யதா²தத²ம் ।
தேனைவ ஸ்த்ரீஸ்வபா⁴வேன வ்யாஹர்துமுபசக்ரமே ॥ 46 ॥
ஏவமுக்தா து கைகேயீ ப⁴ரதேன மஹாத்மனா ।
உவாச வசனம் ஹ்ருஷ்டா மூடா⁴ பண்டி³தமானினீ ॥ 47 ॥
ந ப்³ராஹ்மணத⁴னம் கிஞ்சித்³த்⁴ருதம் ராமேண கஸ்யசித் கஶ்சின்னாட்⁴யோ த³ரித்³ரோ தேனாபாபோ விஹிம்ஸித: ।
ந ராம: பரதா³ராம்ஶ்ச சக்ஷுர்ப்⁴யாமபி பஶ்யதி ॥ 48 ॥
மயா து புத்ர ஶ்ருத்வைவ ராமஸ்யைவாபி⁴ஷேசனம் ।
யாசிதஸ்தே பிதா ராஜ்யம் ராமஸ்ய ச விவாஸனம் ॥ 49 ॥
ஸ ஸ்வவ்ருத்திம் ஸமாஸ்தா²ய பிதா தே தத்ததா²கரோத் ।
ராமஶ்ச ஸஹ ஸௌமித்ரி: ப்ரேஷிதஸ்ஸஹ ஸீதயா ॥ 5௦ ॥
தமபஶ்யன்ப்ரியம்புத்ரம் மஹீபாலோ மஹாயஶா: ।
புத்ரஶோகபரித்³யூன: பஞ்சத்வமுபபேதி³வான் ॥ 51 ॥
த்வயாத்விதா³னீம் த⁴ர்மஜ்ஞ ராஜத்வமவலம்ப்³யதாம் ।
த்வத்க்ருதே ஹி மயா ஸர்வமித³மேவம் வித⁴ம் க்ருதம் ॥ 52 ॥
மா ஶோகம் மா ச ஸந்தாபம் தை⁴ர்யமாஶ்ரய புத்ரக ।
த்வத³தீ⁴னா ஹி நக³ரீ ராஜ்யம் சைதத³னாமயம் ॥ 53 ॥
தத்புத்ர ஶீக்⁴ரம் விதி⁴னா விதி⁴ஜ்ஞைர்வஸிஷ்ட²முக்²யை ஸ்ஸஹிதோ த்³விஜேந்த்³ரை: ।
ஸங்கால்ய ராஜானமதீ³னஸத்த்வமாத்மானமுர்வ்யாமபி⁴ஷேசயஸ்வ ॥ 54 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அயோத்⁴யாகாண்டே³ த்³விஸப்ததிதமஸ்ஸர்க:³ ॥
