ஶ்ரீமத்³வால்மீகீய ராமாயணே அயோத்⁴யாகாண்ட³ம் ।
அத² த்ரயஸ்த்ரிம்ஶஸ்ஸர்க:³ ।
த³த்த்வா து ஸஹ வைதே³ஹ்யா ப்³ராஹ்மணேப்⁴யோ த⁴னம் ப³ஹு ।
ஜக்³மது: பிதரம் த்³ரஷ்டும் ஸீதயா ஸஹ ராக⁴வௌ ॥ 1 ॥
ததோ க்³ருஹீதே து³ஷ்ப்ரேக்ஷே த்வஶோபே⁴தாம் ததா³யுதே⁴ ।
மாலாதா³மபி⁴ராப³த்³தே⁴ ஸீதயா ஸமலங்க்ருதே ॥ 2 ॥
தத: ப்ராஸாத³ஹர்ம்யாணி விமானஶிக²ராணி ச ।
அதி⁴ருஹ்ய ஜனஶ்ஶ்ரீமானுதா³ஸீனோ வ்யலோகயத் ॥ 3 ॥
ந ஹி ரத்²யா: ஸ்ம ஶக்யந்தே க³ந்தும் ப³ஹுஜனாகுலா: ।
ஆருஹ்ய தஸ்மாத்ப்ராஸாதா³ன் தீ³னா: பஶ்யந்தி ராக⁴வம் ॥ 4 ॥
பதா³திம் வர்ஜிதச்ச²த்ரம் ராமம் த்³ருஷ்ட்வா ஜனாஸ்ததா³ ।
ஊசுர்ப³ஹுவிதா⁴ வாச ஶ்ஶோகோபஹதசேதஸ: ॥ 5 ॥
யம் யாந்தமனுயாதி ஸ்ம சதுரங்க³ப³லம் மஹத் ।
தமேகம் ஸீதயா ஸார்த⁴மனுயாதி ஸ்ம லக்ஷ்மண: ॥ 6 ॥
ஐஶ்வர்யஸ்ய ரஸஜ்ஞ: ஸன் காமினாம் சைவ காமத:³ ।
நேச்ச²த்யேவான்ருதம் கர்தும் பிதரம் த⁴ர்மகௌ³ரவாத் ॥ 7 ॥
யா ந ஶக்யா புரா த்³ரஷ்டும் பூ⁴தைராகாஶகை³ரபி ।
தாமத்³ய ஸீதாம் பஶ்யந்தி ராஜமார்க³க³தா ஜனா: ॥ 8 ॥
அங்க³ராகோ³சிதாம் ஸீதாம் ரக்தசந்த³னஸேவினீம் ।
வர்ஷமுஷ்ணம் ச ஶீதம் ச நேஷ்யந்த்யாஶு விவர்ணதாம் ॥ 9 ॥
அத்³ய நூனம் த³ஶரத²ஸ்ஸத்த்வமாவிஶ்ய பா⁴ஷதே ।
ந ஹி ராஜா ப்ரியம் புத்ரம் விவாஸயிதுமர்ஹதி ॥ 1௦ ॥
நிர்கு³ணஸ்யாபி புத்ரஸ்ய கத²ம் ஸ்யாத்³விப்ரவாஸனம் ।
கிம் புனர்யஸ்ய லோகோயம் ஜிதோ வ்ருத்தேன கேவலம் ॥ 11 ॥
அன்ருஶம்ஸ்யமனுக்ரோஶ: ஶ்ருதம் ஶீலம் த³மஶ்ஶம: ।
ராக⁴வம் ஶோப⁴யந்த்யேதே ஷட்³கு³ணா: புருஷோத்தமம் ॥ 12 ॥
தஸ்மாத்தஸ்யோபகா⁴தேன ப்ரஜா: பரமபீடி³தா: ।
ஔத³கானீவ ஸத்த்வானி க்³ரீஷ்மே ஸலிலஸங்க்ஷயாத் ॥ 13 ॥
பீட³யா பீடி³தம் ஸர்வம் ஜக³த³ஸ்ய ஜக³த்பதே: ।
மூலஸ்யேவோபகா⁴தேன வ்ருக்ஷ: புஷ்பப²லோபக:³ ॥ 14 ॥
மூலம் ஹ்யேஷ மனுஷ்யாணாம் த⁴ர்மஸாரோ மஹாத்³யுதி: ।
புஷ்பம் ப²லம் ச பத்ரம் ச ஶாகா²ஶ்சாஸ்யேதரே ஜனா: ॥ 15 ॥
தே லக்ஷ்மண இவ க்ஷிப்ரம் ஸபத்ன்ய ஸ்ஸஹபா³ந்த⁴வா: ।
க³ச்ச²ந்தமனுக³ச்சா²மோ யேன க³ச்ச²தி ராக⁴வ: ॥ 16 ॥
உத்³யானானி பரித்யஜ்ய க்ஷேத்ராணி ச க்³ருஹாணி ச ।
ஏகது³:க²ஸுகா² ராமமனுக³ச்சா²ம தா⁴ர்மிகம் ॥ 17 ॥
ஸமுத்³த்⁴ருதனிதா⁴னானி பரித்⁴வஸ்தாஜிராணி ச ।
உபாத்த த⁴னதா⁴ன்யானி ஹ்ருதஸாராணி ஸர்வஶ: ॥ 18 ॥
ரஜஸாப்⁴யவகீர்ணானி பரித்யக்தானி தை³வதை: ।
மூஷகை:பரிதா⁴வத்³பி⁴ருத்³பி³லைராவ்ருதானி ச ॥ 19 ॥
அபேதோத³கதூ⁴மானி ஹீனஸம்மார்ஜனானி ச ।
ப்ரணஷ்டப³லிகர்மேஜ்யாமந்த்ரஹோமஜபானி ச ॥ 2௦ ॥
து³ஷ்காலேனேவ ப⁴க்³னானி பி⁴ன்னபா⁴ஜனவந்தி ச ।
அஸ்மாத்த்யக்தானி வேஶ்மானி கைகேயீ ப்ரதிபத்³யதாம் ॥ 21 ॥
வனம் நக³ரமேவாஸ்து யேன க³ச்ச²தி ராக⁴வ: ।
அஸ்மாபி⁴ஶ்ச பரித்யக்தம் புரம் ஸம்பத்³யதாம் வனம் ॥ 22 ॥
பி³லானி த³ம்ஷ்ட்ரிண ஸ்ஸர்வே ஸானூனி ம்ருக³பக்ஷிண: ।
த்யஜந்த்வஸ்மத்³ப⁴யாத்³பீ⁴தா கஜ³ாஸ்ஸிம்ஹா வனானி ச ॥ 23 ॥
அஸ்மத்த்யக்தம் ப்ரபத்³யந்தாம் ஸேவ்யமானம் த்யஜந்து ச ।
த்ருணமாம்ஸ ப²லாதா³னாம் தே³ஶம் வ்யாலம்ருக³த்³விஜம் ॥ 24 ॥
ப்ரபத்³யதாம் ஹி கைகேயீ ஸபுத்ரா ஸஹ பா³ந்த⁴வை: ।
ராக⁴வேண வனே ஸர்வே வயம் வத்ஸ்யாம நிர்வ்ருதா: ॥ 25 ॥
இத்யேவம் விவிதா⁴ வாசோ நானாஜனஸமீரிதா: ।
ஶுஶ்ராவ ராம: ஶ்ருத்வா ச ந விசக்ரேஸ்ய மானஸம் ॥ 26 ॥
ஸ து வேஶ்ம பிதுர்தூ³ராத்கைலாஸஶிக²ரப்ரப⁴ம் ।
அபி⁴சக்ராம த⁴ர்மாத்மா மத்தமாதங்க³விக்ரம: ॥ 27 ॥
வினீதவீரபுருஷம் ப்ரவிஶ்ய து ந்ருபாலயம் ।
த³த³ர்ஶாவஸ்தி²தம் தீ³னம் ஸுமந்த்ரமவிதூ³ரத: ॥ 28 ॥
ப்ரதீக்ஷமாணோபி ஜனம் ததா³ர்த மனார்தரூப: ப்ரஹஸன்னிவாத² ।
ஜகா³ம ராம: பிதரம் தி³த்³ருக்ஷு: பிதுர்னிதே³ஶம் விதி⁴வச்சிகீர்ஷு: ॥ 29 ॥
தத்பூர்வமைக்ஷ்வாகஸுதோ மஹாத்மா ராமோ க³மிஷ்யன்வனமார்தரூபம் ।
வ்யதிஷ்ட²த ப்ரேக்ஷ்ய ததா³ ஸுமந்த்ரம் பிதுர்மஹாத்மா ப்ரதிஹாரணார்த²ம் ॥ 3௦ ॥
பிதுர்னிதே³ஶேன து த⁴ர்மவத்ஸல: வனப்ரவேஶே க்ருதபு³த்³தி⁴னிஶ்சய: ।
ஸ ராக⁴வ: ப்ரேக்ஷ்ய ஸுமந்த்ரமப்³ரவீ ந்னிவேத³யஸ்வாக³மனம் ந்ருபாய மே ॥ 31 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அயோத்⁴யாகாண்டே³ த்ரயஸ்த்ரிம்ஶஸ்ஸர்க:³ ॥
