śrīmadvālmīkīya rāmāyaṇē bālakāṇḍam ।
atha pañchāśassargaḥ ।
tataḥ prāguttarāṃ gatvā rāmassaumitriṇā saha ।
viśvāmitraṃ puraskṛtya yajñavāṭamupāgamat ॥ 1 ॥
rāmastu muniśārdūlamuvācha sahalakṣmaṇaḥ ।
sādhvī yajñasamṛddhirhi janakasya mahātmanaḥ ॥ 2 ॥
bahūnīha sahasrāṇi nānādēśanivāsinām ।
brāhmaṇānāṃ mahābhāga vēdādhyayanaśālinām ॥ 3 ॥
ṛṣivāṭāścha dṛśyantē śakaṭīśatasaṅkulāḥ ।
dēśō vidhīyatāṃ brahman yatra vatsyāmahē vayam ॥ 4 ॥
rāmasya vachanaṃ śrutvā viśvāmitrō mahāmuniḥ ।
nivēśamakarōddēśē viviktē salilāyutē ॥ 5 ॥
viśvāmitramanuprāptaṃ śrutvā sa nṛpatistadā ।
śatānandaṃ puraskṛtya purōhitamaninditam ॥ 6 ॥
pratyujjagāma sahasā vinayēna samanvitaḥ ।
ṛtvijō'pi mahātmānastvarghyamādāya satvaram ॥ 7 ॥
viśvāmitrāya dharmēṇa dadurmanntrapuraskṛtam ।
pratigṛhya cha tāṃ pūjāṃ janakasya mahātmanaḥ ॥ 8 ॥
paprachCha kuśalaṃ rājñō yajñasya cha nirāmayam ।
sa tāṃśchāpi munīn pṛṣṭvā sōpādhyāyapurōdhasaḥ ॥ 9 ॥
yathānyāyaṃ tatassarvaissamāgachChatprahṛṣṭavat ।
atha rājā muniśrēṣṭhaṃ kṛtāñjalirabhāṣata ॥ 10 ॥
āsanē bhagavānāstāṃ sahaibhirmunipuṅgavaiḥ ।
janakasya vachaśśrutvā niṣasāda mahāmuniḥ ॥ 11 ॥
purōdhā ṛtvijaśchaiva rājā cha saha mantribhiḥ ।
āsanēṣu yathānyāyamupaviṣṭān samantataḥ ॥ 12 ॥
dṛṣṭvā sa nṛpatistatra viśvāmitramathābravīt ।
adya yajñasamṛdhdirmē saphalā daivataiḥ kṛtā ॥ 13 ॥
adya yajñaphalaṃ prāptaṃ bhagavaddarśanānmayā ।
dhanyō'smyanugṛhītō'smi yasya mē munipuṅgava ॥ 14 ॥
yajñōpasadanaṃ brahman prāptō'si munibhiḥ saha ।
dvādaśāhaṃ tu brahmarṣē śēṣamāhurmanīṣiṇaḥ ॥ 15 ॥
tatō bhāgārthinō dēvān draṣṭumarhasi kauśika ।
ityuktvā muniśārdūlaṃ prahṛṣṭavadanastadā ॥ 16 ॥
punastaṃ paripaprachCha prāñjaliḥ praṇatō nṛpaḥ ।
imau kumārau bhadraṃ tē dēvatulyaparākramau ॥ 17 ॥
gajasiṃhagatī vīrau śārdūlavṛṣabhōpamau ।
padmapatraviśālākṣau khaḍgatūṇīdhanurdharau ॥ 18 ॥
aśvināviva rūpēṇa samupasthitayauvanau ।
yadṛchChayaiva gāṃ prāptau dēvalōkādivāmarau ॥ 19 ॥
kathaṃ padbhyāmiha prāptau kimarthaṃ kasya vā munē ।
varāyudhadharau vīrau kasya putrau mahāmunē ॥ 20 ॥
bhūṣayantāvimaṃ dēśaṃ chandrasūryāvivāmbaram ।
parasparasya sadṛśau pramāṇēṅgitachēṣṭitaiḥ ॥ 21 ॥
kākapakṣadharau vīrau śrōtumichChāmi tattvataḥ ।
tasya tadvachanaṃ śrutvā janakasya mahātmanaḥ ॥ 22 ॥
nyavēdayanmahātmānau putrau daśarathasya tau ।
siddhāśramanivāsaṃ cha rākṣasānāṃ vadhaṃ tathā ॥ 23 ॥
tachchāgamanamavyagraṃ viśālāyāścha darśanam ।
ahalyādarśanaṃ chaiva gautamēna samāgamam ॥ 24 ॥
mahādhanuṣi jijñāsāṃ kartumāgamanaṃ tathā ।
ētatsarvaṃ mahātējā janakāya mahātmanē ॥ 25 ॥
ityārṣē śrīmadrāmāyaṇē vālmīkīya ādikāvyē bālakāṇḍē pañchāśassargaḥ ॥
