ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ପଂଚାଶସ୍ସର୍ଗଃ ।
ତତଃ ପ୍ରାଗୁତ୍ତରାଂ ଗତ୍ଵା ରାମସ୍ସୌମିତ୍ରିଣା ସହ ।
ଵିଶ୍ଵାମିତ୍ରଂ ପୁରସ୍କୃତ୍ୟ ୟଜ୍ଞଵାଟମୁପାଗମତ୍ ॥ 1 ॥
ରାମସ୍ତୁ ମୁନିଶାର୍ଦୂଲମୁଵାଚ ସହଲକ୍ଷ୍ମଣଃ ।
ସାଧ୍ଵୀ ୟଜ୍ଞସମୃଦ୍ଧିର୍ହି ଜନକସ୍ୟ ମହାତ୍ମନଃ ॥ 2 ॥
ବହୂନୀହ ସହସ୍ରାଣି ନାନାଦେଶନିଵାସିନାମ୍ ।
ବ୍ରାହ୍ମଣାନାଂ ମହାଭାଗ ଵେଦାଧ୍ୟୟନଶାଲିନାମ୍ ॥ 3 ॥
ଋଷିଵାଟାଶ୍ଚ ଦୃଶ୍ୟଂତେ ଶକଟୀଶତସଂକୁଲାଃ ।
ଦେଶୋ ଵିଧୀୟତାଂ ବ୍ରହ୍ମନ୍ ୟତ୍ର ଵତ୍ସ୍ୟାମହେ ଵୟମ୍ ॥ 4 ॥
ରାମସ୍ୟ ଵଚନଂ ଶ୍ରୁତ୍ଵା ଵିଶ୍ଵାମିତ୍ରୋ ମହାମୁନିଃ ।
ନିଵେଶମକରୋଦ୍ଦେଶେ ଵିଵିକ୍ତେ ସଲିଲାୟୁତେ ॥ 5 ॥
ଵିଶ୍ଵାମିତ୍ରମନୁପ୍ରାପ୍ତଂ ଶ୍ରୁତ୍ଵା ସ ନୃପତିସ୍ତଦା ।
ଶତାନଂଦଂ ପୁରସ୍କୃତ୍ୟ ପୁରୋହିତମନିଂଦିତମ୍ ॥ 6 ॥
ପ୍ରତ୍ୟୁଜ୍ଜଗାମ ସହସା ଵିନୟେନ ସମନ୍ଵିତଃ ।
ଋତ୍ଵିଜୋଽପି ମହାତ୍ମାନସ୍ତ୍ଵର୍ଘ୍ୟମାଦାୟ ସତ୍ଵରମ୍ ॥ 7 ॥
ଵିଶ୍ଵାମିତ୍ରାୟ ଧର୍ମେଣ ଦଦୁର୍ମଂଂତ୍ରପୁରସ୍କୃତମ୍ ।
ପ୍ରତିଗୃହ୍ୟ ଚ ତାଂ ପୂଜାଂ ଜନକସ୍ୟ ମହାତ୍ମନଃ ॥ 8 ॥
ପପ୍ରଚ୍ଛ କୁଶଲଂ ରାଜ୍ଞୋ ୟଜ୍ଞସ୍ୟ ଚ ନିରାମୟମ୍ ।
ସ ତାଂଶ୍ଚାପି ମୁନୀନ୍ ପୃଷ୍ଟ୍ଵା ସୋପାଧ୍ୟାୟପୁରୋଧସଃ ॥ 9 ॥
ୟଥାନ୍ୟାୟଂ ତତସ୍ସର୍ଵୈସ୍ସମାଗଚ୍ଛତ୍ପ୍ରହୃଷ୍ଟଵତ୍ ।
ଅଥ ରାଜା ମୁନିଶ୍ରେଷ୍ଠଂ କୃତାଂଜଲିରଭାଷତ ॥ 10 ॥
ଆସନେ ଭଗଵାନାସ୍ତାଂ ସହୈଭିର୍ମୁନିପୁଂଗଵୈଃ ।
ଜନକସ୍ୟ ଵଚଶ୍ଶ୍ରୁତ୍ଵା ନିଷସାଦ ମହାମୁନିଃ ॥ 11 ॥
ପୁରୋଧା ଋତ୍ଵିଜଶ୍ଚୈଵ ରାଜା ଚ ସହ ମଂତ୍ରିଭିଃ ।
ଆସନେଷୁ ୟଥାନ୍ୟାୟମୁପଵିଷ୍ଟାନ୍ ସମଂତତଃ ॥ 12 ॥
ଦୃଷ୍ଟ୍ଵା ସ ନୃପତିସ୍ତତ୍ର ଵିଶ୍ଵାମିତ୍ରମଥାବ୍ରଵୀତ୍ ।
ଅଦ୍ୟ ୟଜ୍ଞସମୃଧ୍ଦିର୍ମେ ସଫଲା ଦୈଵତୈଃ କୃତା ॥ 13 ॥
ଅଦ୍ୟ ୟଜ୍ଞଫଲଂ ପ୍ରାପ୍ତଂ ଭଗଵଦ୍ଦର୍ଶନାନ୍ମୟା ।
ଧନ୍ୟୋଽସ୍ମ୍ୟନୁଗୃହୀତୋଽସ୍ମି ୟସ୍ୟ ମେ ମୁନିପୁଂଗଵ ॥ 14 ॥
ୟଜ୍ଞୋପସଦନଂ ବ୍ରହ୍ମନ୍ ପ୍ରାପ୍ତୋଽସି ମୁନିଭିଃ ସହ ।
ଦ୍ଵାଦଶାହଂ ତୁ ବ୍ରହ୍ମର୍ଷେ ଶେଷମାହୁର୍ମନୀଷିଣଃ ॥ 15 ॥
ତତୋ ଭାଗାର୍ଥିନୋ ଦେଵାନ୍ ଦ୍ରଷ୍ଟୁମର୍ହସି କୌଶିକ ।
ଇତ୍ୟୁକ୍ତ୍ଵା ମୁନିଶାର୍ଦୂଲଂ ପ୍ରହୃଷ୍ଟଵଦନସ୍ତଦା ॥ 16 ॥
ପୁନସ୍ତଂ ପରିପପ୍ରଚ୍ଛ ପ୍ରାଂଜଲିଃ ପ୍ରଣତୋ ନୃପଃ ।
ଇମୌ କୁମାରୌ ଭଦ୍ରଂ ତେ ଦେଵତୁଲ୍ୟପରାକ୍ରମୌ ॥ 17 ॥
ଗଜସିଂହଗତୀ ଵୀରୌ ଶାର୍ଦୂଲଵୃଷଭୋପମୌ ।
ପଦ୍ମପତ୍ରଵିଶାଲାକ୍ଷୌ ଖଡ୍ଗତୂଣୀଧନୁର୍ଧରୌ ॥ 18 ॥
ଅଶ୍ଵିନାଵିଵ ରୂପେଣ ସମୁପସ୍ଥିତୟୌଵନୌ ।
ୟଦୃଚ୍ଛୟୈଵ ଗାଂ ପ୍ରାପ୍ତୌ ଦେଵଲୋକାଦିଵାମରୌ ॥ 19 ॥
କଥଂ ପଦ୍ଭ୍ୟାମିହ ପ୍ରାପ୍ତୌ କିମର୍ଥଂ କସ୍ୟ ଵା ମୁନେ ।
ଵରାୟୁଧଧରୌ ଵୀରୌ କସ୍ୟ ପୁତ୍ରୌ ମହାମୁନେ ॥ 20 ॥
ଭୂଷୟଂତାଵିମଂ ଦେଶଂ ଚଂଦ୍ରସୂର୍ୟାଵିଵାଂବରମ୍ ।
ପରସ୍ପରସ୍ୟ ସଦୃଶୌ ପ୍ରମାଣେଂଗିତଚେଷ୍ଟିତୈଃ ॥ 21 ॥
କାକପକ୍ଷଧରୌ ଵୀରୌ ଶ୍ରୋତୁମିଚ୍ଛାମି ତତ୍ତ୍ଵତଃ ।
ତସ୍ୟ ତଦ୍ଵଚନଂ ଶ୍ରୁତ୍ଵା ଜନକସ୍ୟ ମହାତ୍ମନଃ ॥ 22 ॥
ନ୍ୟଵେଦୟନ୍ମହାତ୍ମାନୌ ପୁତ୍ରୌ ଦଶରଥସ୍ୟ ତୌ ।
ସିଦ୍ଧାଶ୍ରମନିଵାସଂ ଚ ରାକ୍ଷସାନାଂ ଵଧଂ ତଥା ॥ 23 ॥
ତଚ୍ଚାଗମନମଵ୍ୟଗ୍ରଂ ଵିଶାଲାୟାଶ୍ଚ ଦର୍ଶନମ୍ ।
ଅହଲ୍ୟାଦର୍ଶନଂ ଚୈଵ ଗୌତମେନ ସମାଗମମ୍ ॥ 24 ॥
ମହାଧନୁଷି ଜିଜ୍ଞାସାଂ କର୍ତୁମାଗମନଂ ତଥା ।
ଏତତ୍ସର୍ଵଂ ମହାତେଜା ଜନକାୟ ମହାତ୍ମନେ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ପଂଚାଶସ୍ସର୍ଗଃ ॥
