ஶ்ரீமத்³வால்மீகீய ராமாயணே அயோத்⁴யாகாண்ட³ம் ।
அத² பஞ்சத³ஶாதி⁴கஶததமஸ்ஸர்க:³ ।
ததோ நிக்ஷிப்ய மாத்ரு ஸ்ஸ அயோத்⁴யாயாம் த்³ருட⁴ வ்ரத: ।
ப⁴ரத ஶ்ஶோகஸந்தப்தோ கு³ரூனித³மதா²ப்³ரவீத் ॥ 1 ॥
நந்தி³க்³ராமம் க³மிஷ்யாமி ஸர்வானாமந்த்ரயேத்³ய வ: ।
தத்ர து³:க²மித³ம் ஸர்வம் ஸஹிஷ்யே ராக⁴வம் வினா ॥ 2 ॥
க³தஶ்ச வா தி³வம் ராஜா வனஸ்த²ஶ்ச கு³ருர்மம ।
ராமம் ப்ரதீக்ஷே ராஜ்யாய ஸ ஹி ராஜா மஹாயஶா: ॥ 3 ॥
ஏதச்ச்²ருத்வா ஶுப⁴ம் வாக்யம் ப⁴ரதஸ்ய மஹாத்மன: ।
அப்³ருவன்மந்த்ரிணஸ்ஸர்வே வஸிஷ்ட²ஶ்ச புரோஹித: ॥ 4 ॥
ஸுப்⁴ருஶம் ஶ்லாக⁴னீயம் ச யது³க்தம் ப⁴ரத த்வயா ।
வசனம் ப்⁴ராத்ருவாத்ஸல்யாத³னுரூபம் தவைவ தத் ॥ 5 ॥
நித்யம் தே ப³ந்து⁴லுப்³த⁴ஸ்ய திஷ்ட²தோ ப்⁴ராத்ருஸௌஹ்ருதே³ ।
ஆர்யமார்க³ம் ப்ரபன்னஸ்ய நானுமன்யேத க: புமான் ॥ 6 ॥
மந்த்ரிணாம் வசனம் ஶ்ருத்வா யதா²பி⁴லஷிதம் ப்ரியம் ।
அப்³ரவீத்ஸாரதி²ம் வாக்யம் ரதோ² மே யுஜ்யதாமிதி ॥ 7 ॥
ப்ரஹ்ருஷ்டவத³ன ஸ்ஸர்வா மாத்ரு ஸ்ஸமபி⁴வாத்³ய ஸ: ।
ஆருரோஹ ரத²ம் ஶ்ரீமான் ஶத்ருக்⁴னேன ஸமன்வித: ॥ 8 ॥
ஆருஹ்ய ச ரத²ம் ஶீக்⁴ரம் ஶத்ருக்⁴னப⁴ரதாவுபௌ⁴ ।
யயது: பரமப்ரீதௌ வ்ருதௌ மந்த்ரிபுரோஹிதை: ॥ 9 ॥
அக்³ரதோ கு³ரவ: ஸர்வே வஸிஷ்ட²ப்ரமுகா² த்³விஜா: ।
ப்ரயயு: ப்ராங்க்³முகா² ஸ்ஸர்வே நந்தி³க்³ராமோ யதோப⁴வத் ॥ 1௦ ॥
ப³லம் ச தத³னாஹூதம் கஜ³ாஶ்வரத²ஸங்குலம் ।
ப்ரயயௌ ப⁴ரதே யாதே ஸர்வே ச புரவாஸின: ॥ 11 ॥
ரத²ஸ்த:² ஸ து த⁴ர்மாத்மா ப⁴ரதோ ப்⁴ராத்ருவத்ஸல: ।
நந்தி³க்³ராமம் யயௌ தூர்ணம் ஶிரஸ்யாதா³ய பாது³கே ॥ 12 ॥
ததஸ்து ப⁴ரத: க்ஷிப்ரம் நந்தி³க்³ராமம் ப்ரவிஶ்ய ஸ: ।
அவதீர்ய ரதா²த்தூர்ணம் கு³ரூனித³முவாச ஹ ॥ 13 ॥
ஏதத்³ராஜ்யம் மம ப்⁴ராத்ரா த³த்தம் ஸன்னயாஸவத்ஸ்வயம் ।
யோக³க்ஷேமவஹே சேமே பாது³கே ஹேமபூ⁴ஷிதே ॥ 14 ॥
ப⁴ரத ஶ்ஶிரஸா க்ருத்வா ஸன்ன்யாஸம் பாது³கே தத: ।
அப்³ரவீத்³து⁴:க²ஸந்தப்த ஸ்ஸர்வம் ப்ரக்ருதிமண்ட³லம் ॥ 15 ॥
ச²த்ரம் தா⁴ரயத க்ஷிப்ரமார்யபாதா³விமௌ மதௌ ।
ஆப்⁴யாம் ராஜ்யே ஸ்தி²தோ த⁴ர்ம: பாது³காப்⁴யாம் கு³ரோர்மம ॥ 16 ॥
ப்⁴ராத்ரா ஹி மயி ஸம்ன்யாஸோ நிக்ஷிப்த ஸ்ஸௌஹ்ருதா³த³யம் ।
தமிமம் பாலயிஷ்யாமி ராக⁴வாக³மனம் ப்ரதி ॥ 17 ॥
க்ஷிப்ரம் ஸம்யோஜயித்வாது ராக⁴வஸ்ய புனஸ்ஸ்வயம் ।
சரணௌ தௌ து ராமஸ்ய த்³ரக்ஷ்யாமி ஸஹபாது³கௌ ॥ 18 ॥
ததோ நிக்ஷிப்தபா⁴ரோஹம் ராக⁴வேண ஸமாக³த: ।
நிவேத்³ய கு³ரவே ராஜ்யம் பஜ⁴ிஷ்யே கு³ருவ்ருத்திதாம் ॥ 19 ॥
ராக⁴வாய ச ஸன்யாஸம் த³த்த்வேமே வரபாது³கே ।
ராஜ்யம் சேத³மயோத்⁴யாம் ச தூ⁴தபாபோ ப⁴வாமி ச ॥ 2௦ ॥
அபி⁴ஷிக்தே து காகுத்ஸ்தே² ப்ரஹ்ருஷ்டமுதி³தே ஜனே ।
ப்ரீதிர்மம யஶஶ்சைவ ப⁴வேத்³ராஜ்யாச்சதுர்கு³ணம் ॥ 21 ॥
ஏவம் து விலபந்தீ³னோ ப⁴ரத ஸ்ஸமஹாயஶா: ।
நந்தி³க்³ராமேகரோத்³ராஜ்யம் து³:கி²தோ மந்த்ரிபி⁴ஸ்ஸஹ ॥ 22 ॥
ஸ வல்கலஜடாதா⁴ரீ முனிவேஷத⁴ர: ப்ரபு⁴: ।
நந்தி³க்³ராமேவஸத்³வீர ஸ்ஸஸைன்யோ ப⁴ரதஸ்ததா³ ॥ 23 ॥
ராமாக³மனமாகாங்க்ஷன்ப⁴ரதோ ப்⁴ராத்ருவத்ஸல: ।
ப்⁴ராதுர்வசனகாரீ ச ப்ரதிஜ்ஞாபாரக³ஸ்ததா² ॥ 24 ॥
பாது³கே த்வபி⁴ஷிச்யாத² நந்தி³க்³ராமேவஸத்ததா³ ।
ஸ வாலவ்யஜனம் ச²த்ரம் தா⁴ரயாமாஸ ஸ ஸ்வயம் ।
ப⁴ரத ஶ்ஶாஸனம் ஸர்வம் பாது³காப்⁴யாம் நிவேத³யன் ॥ 25 ॥
ததஸ்து ப⁴ரத ஶஶ்ரீமானபி⁴ஷிச்யார்யபாது³கே ।
தத³தீ⁴னஸ்ததா³ ராஜ்யம் காரயாமாஸ ஸர்வதா³ ॥ 26 ॥
ததா³ ஹி யத்கார்யமுபைதி கிஞ்சிது³பாயனம் சோபஹ்ருதம் மஹார்ஹம் ।
ஸ பாது³காப்⁴யாம் ப்ரத²மம் நிவேத்³ய சகார பஶ்சாத்³ப⁴ரதோ யதா²வத் ॥ 27 ॥
இத்யார்ஷே ஶ்ரீமத்³ராமாயணே வால்மீகீய ஆதி³காவ்யே அயோத்⁴யாகாண்டே³ பஞ்சத³ஶாதி⁴கஶததமஸ்ஸர்க:³ ॥
