ശ്രീമദ്വാല്മീകീയ രാമായണേ ബാലകാംഡമ് ।
അഥ പംചാശസ്സര്ഗഃ ।
തതഃ പ്രാഗുത്തരാം ഗത്വാ രാമസ്സൌമിത്രിണാ സഹ ।
വിശ്വാമിത്രം പുരസ്കൃത്യ യജ്ഞവാടമുപാഗമത് ॥ 1 ॥
രാമസ്തു മുനിശാര്ദൂലമുവാച സഹലക്ഷ്മണഃ ।
സാധ്വീ യജ്ഞസമൃദ്ധിര്ഹി ജനകസ്യ മഹാത്മനഃ ॥ 2 ॥
ബഹൂനീഹ സഹസ്രാണി നാനാദേശനിവാസിനാമ് ।
ബ്രാഹ്മണാനാം മഹാഭാഗ വേദാധ്യയനശാലിനാമ് ॥ 3 ॥
ഋഷിവാടാശ്ച ദൃശ്യംതേ ശകടീശതസംകുലാഃ ।
ദേശോ വിധീയതാം ബ്രഹ്മന് യത്ര വത്സ്യാമഹേ വയമ് ॥ 4 ॥
രാമസ്യ വചനം ശ്രുത്വാ വിശ്വാമിത്രോ മഹാമുനിഃ ।
നിവേശമകരോദ്ദേശേ വിവിക്തേ സലിലായുതേ ॥ 5 ॥
വിശ്വാമിത്രമനുപ്രാപ്തം ശ്രുത്വാ സ നൃപതിസ്തദാ ।
ശതാനംദം പുരസ്കൃത്യ പുരോഹിതമനിംദിതമ് ॥ 6 ॥
പ്രത്യുജ്ജഗാമ സഹസാ വിനയേന സമന്വിതഃ ।
ഋത്വിജോഽപി മഹാത്മാനസ്ത്വര്ഘ്യമാദായ സത്വരമ് ॥ 7 ॥
വിശ്വാമിത്രായ ധര്മേണ ദദുര്മംംത്രപുരസ്കൃതമ് ।
പ്രതിഗൃഹ്യ ച താം പൂജാം ജനകസ്യ മഹാത്മനഃ ॥ 8 ॥
പപ്രച്ഛ കുശലം രാജ്ഞോ യജ്ഞസ്യ ച നിരാമയമ് ।
സ താംശ്ചാപി മുനീന് പൃഷ്ട്വാ സോപാധ്യായപുരോധസഃ ॥ 9 ॥
യഥാന്യായം തതസ്സർവൈസ്സമാഗച്ഛത്പ്രഹൃഷ്ടവത് ।
അഥ രാജാ മുനിശ്രേഷ്ഠം കൃതാംജലിരഭാഷത ॥ 10 ॥
ആസനേ ഭഗവാനാസ്താം സഹൈഭിര്മുനിപുംഗവൈഃ ।
ജനകസ്യ വചശ്ശ്രുത്വാ നിഷസാദ മഹാമുനിഃ ॥ 11 ॥
പുരോധാ ഋത്വിജശ്ചൈവ രാജാ ച സഹ മംത്രിഭിഃ ।
ആസനേഷു യഥാന്യായമുപവിഷ്ടാന് സമംതതഃ ॥ 12 ॥
ദൃഷ്ട്വാ സ നൃപതിസ്തത്ര വിശ്വാമിത്രമഥാബ്രവീത് ।
അദ്യ യജ്ഞസമൃധ്ദിര്മേ സഫലാ ദൈവതൈഃ കൃതാ ॥ 13 ॥
അദ്യ യജ്ഞഫലം പ്രാപ്തം ഭഗവദ്ദര്ശനാന്മയാ ।
ധന്യോഽസ്മ്യനുഗൃഹീതോഽസ്മി യസ്യ മേ മുനിപുംഗവ ॥ 14 ॥
യജ്ഞോപസദനം ബ്രഹ്മന് പ്രാപ്തോഽസി മുനിഭിഃ സഹ ।
ദ്വാദശാഹം തു ബ്രഹ്മര്ഷേ ശേഷമാഹുര്മനീഷിണഃ ॥ 15 ॥
തതോ ഭാഗാര്ഥിനോ ദേവാന് ദ്രഷ്ടുമര്ഹസി കൌശിക ।
ഇത്യുക്ത്വാ മുനിശാര്ദൂലം പ്രഹൃഷ്ടവദനസ്തദാ ॥ 16 ॥
പുനസ്തം പരിപപ്രച്ഛ പ്രാംജലിഃ പ്രണതോ നൃപഃ ।
ഇമൌ കുമാരൌ ഭദ്രം തേ ദേവതുല്യപരാക്രമൌ ॥ 17 ॥
ഗജസിംഹഗതീ വീരൌ ശാര്ദൂലവൃഷഭോപമൌ ।
പദ്മപത്രവിശാലാക്ഷൌ ഖഡ്ഗതൂണീധനുര്ധരൌ ॥ 18 ॥
അശ്വിനാവിവ രൂപേണ സമുപസ്ഥിതയൌവനൌ ।
യദൃച്ഛയൈവ ഗാം പ്രാപ്തൌ ദേവലോകാദിവാമരൌ ॥ 19 ॥
കഥം പദ്ഭ്യാമിഹ പ്രാപ്തൌ കിമര്ഥം കസ്യ വാ മുനേ ।
വരായുധധരൌ വീരൌ കസ്യ പുത്രൌ മഹാമുനേ ॥ 20 ॥
ഭൂഷയംതാവിമം ദേശം ചംദ്രസൂര്യാവിവാംബരമ് ।
പരസ്പരസ്യ സദൃശൌ പ്രമാണേംഗിതചേഷ്ടിതൈഃ ॥ 21 ॥
കാകപക്ഷധരൌ വീരൌ ശ്രോതുമിച്ഛാമി തത്ത്വതഃ ।
തസ്യ തദ്വചനം ശ്രുത്വാ ജനകസ്യ മഹാത്മനഃ ॥ 22 ॥
ന്യവേദയന്മഹാത്മാനൌ പുത്രൌ ദശരഥസ്യ തൌ ।
സിദ്ധാശ്രമനിവാസം ച രാക്ഷസാനാം വധം തഥാ ॥ 23 ॥
തച്ചാഗമനമവ്യഗ്രം വിശാലായാശ്ച ദര്ശനമ് ।
അഹല്യാദര്ശനം ചൈവ ഗൌതമേന സമാഗമമ് ॥ 24 ॥
മഹാധനുഷി ജിജ്ഞാസാം കര്തുമാഗമനം തഥാ ।
ഏതത്സർവം മഹാതേജാ ജനകായ മഹാത്മനേ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ പംചാശസ്സര്ഗഃ ॥
