ශ්රීමද්වාල්මීකීය රාමායණේ අයෝධ්යාකාංඩම් ।
අථ පංචදශාධිකශතතමස්සර්ගඃ ।
තතෝ නික්ෂිප්ය මාතෘ ස්ස අයෝධ්යායාං දෘඪ ව්රතඃ ।
භරත ශ්ශෝකසංතප්තෝ ගුරූනිදමථාබ්රවීත් ॥ 1 ॥
නංදිග්රාමං ගමිෂ්යාමි සර්වානාමංත්රයේऽද්ය වඃ ।
තත්ර දුඃඛමිදං සර්වං සහිෂ්යේ රාඝවං විනා ॥ 2 ॥
ගතශ්ච වා දිවං රාජා වනස්ථශ්ච ගුරුර්මම ।
රාමං ප්රතීක්ෂේ රාජ්යාය ස හි රාජා මහායශාඃ ॥ 3 ॥
ඒතච්ඡ්රුත්වා ශුභං වාක්යං භරතස්ය මහාත්මනඃ ।
අබ්රුවන්මංත්රිණස්සර්වේ වසිෂ්ඨශ්ච පුරෝහිතඃ ॥ 4 ॥
සුභෘශං ශ්ලාඝනීයං ච යදුක්තං භරත ත්වයා ।
වචනං භ්රාතෘවාත්සල්යාදනුරූපං තවෛව තත් ॥ 5 ॥
නිත්යං තේ බංධුලුබ්ධස්ය තිෂ්ඨතෝ භ්රාතෘසෞහෘදේ ।
ආර්යමාර්ගං ප්රපන්නස්ය නානුමන්යේත කඃ පුමාන් ॥ 6 ॥
මංත්රිණාං වචනං ශ්රුත්වා යථාභිලෂිතං ප්රියම් ।
අබ්රවීත්සාරථිං වාක්යං රථෝ මේ යුජ්යතාමිති ॥ 7 ॥
ප්රහෘෂ්ටවදන ස්සර්වා මාතෘ ස්සමභිවාද්ය සඃ ।
ආරුරෝහ රථං ශ්රීමාන් ශත්රුඝ්නේන සමන්විතඃ ॥ 8 ॥
ආරුහ්ය ච රථං ශීඝ්රං ශත්රුඝ්නභරතාවුභෞ ।
යයතුඃ පරමප්රීතෞ වෘතෞ මංත්රිපුරෝහිතෛඃ ॥ 9 ॥
අග්රතෝ ගුරවඃ සර්වේ වසිෂ්ඨප්රමුඛා ද්විජාඃ ।
ප්රයයුඃ ප්රාංග්මුඛා ස්සර්වේ නංදිග්රාමෝ යතෝऽභවත් ॥ 10 ॥
බලං ච තදනාහූතං ගජාශ්වරථසංකුලම් ।
ප්රයයෞ භරතේ යාතේ සර්වේ ච පුරවාසිනඃ ॥ 11 ॥
රථස්ථඃ ස තු ධර්මාත්මා භරතෝ භ්රාතෘවත්සලඃ ।
නංදිග්රාමං යයෞ තූර්ණං ශිරස්යාදාය පාදුකේ ॥ 12 ॥
තතස්තු භරතඃ ක්ෂිප්රං නංදිග්රාමං ප්රවිශ්ය සඃ ।
අවතීර්ය රථාත්තූර්ණං ගුරූනිදමුවාච හ ॥ 13 ॥
ඒතද්රාජ්යං මම භ්රාත්රා දත්තං සන්නයාසවත්ස්වයම් ।
යෝගක්ෂේමවහේ චේමේ පාදුකේ හේමභූෂිතේ ॥ 14 ॥
භරත ශ්ශිරසා කෘත්වා සන්න්යාසං පාදුකේ තතඃ ।
අබ්රවීද්ධුඃඛසංතප්ත ස්සර්වං ප්රකෘතිමංඩලම් ॥ 15 ॥
ඡත්රං ධාරයත ක්ෂිප්රමාර්යපාදාවිමෞ මතෞ ।
ආභ්යාං රාජ්යේ ස්ථිතෝ ධර්මඃ පාදුකාභ්යාං ගුරෝර්මම ॥ 16 ॥
භ්රාත්රා හි මයි සංන්යාසෝ නික්ෂිප්ත ස්සෞහෘදාදයම් ।
තමිමං පාලයිෂ්යාමි රාඝවාගමනං ප්රති ॥ 17 ॥
ක්ෂිප්රං සංයෝජයිත්වාතු රාඝවස්ය පුනස්ස්වයම් ।
චරණෞ තෞ තු රාමස්ය ද්රක්ෂ්යාමි සහපාදුකෞ ॥ 18 ॥
තතෝ නික්ෂිප්තභාරෝऽහං රාඝවේණ සමාගතඃ ।
නිවේද්ය ගුරවේ රාජ්යං භජිෂ්යේ ගුරුවෘත්තිතාම් ॥ 19 ॥
රාඝවාය ච සන්යාසං දත්ත්වේමේ වරපාදුකේ ।
රාජ්යං චේදමයෝධ්යාං ච ධූතපාපෝ භවාමි ච ॥ 20 ॥
අභිෂික්තේ තු කාකුත්ස්ථේ ප්රහෘෂ්ටමුදිතේ ජනේ ।
ප්රීතිර්මම යශශ්චෛව භවේද්රාජ්යාච්චතුර්ගුණම් ॥ 21 ॥
ඒවං තු විලපංදීනෝ භරත ස්සමහායශාඃ ।
නංදිග්රාමේऽකරෝද්රාජ්යං දුඃඛිතෝ මංත්රිභිස්සහ ॥ 22 ॥
ස වල්කලජටාධාරී මුනිවේෂධරඃ ප්රභුඃ ।
නංදිග්රාමේऽවසද්වීර ස්සසෛන්යෝ භරතස්තදා ॥ 23 ॥
රාමාගමනමාකාංක්ෂන්භරතෝ භ්රාතෘවත්සලඃ ।
භ්රාතුර්වචනකාරී ච ප්රතිජ්ඤාපාරගස්තථා ॥ 24 ॥
පාදුකේ ත්වභිෂිච්යාථ නංදිග්රාමේऽවසත්තදා ।
ස වාලව්යජනං ඡත්රං ධාරයාමාස ස ස්වයම් ।
භරත ශ්ශාසනං සර්වං පාදුකාභ්යාං නිවේදයන් ॥ 25 ॥
තතස්තු භරත ශශ්රීමානභිෂිච්යාऽऽර්යපාදුකේ ।
තදධීනස්තදා රාජ්යං කාරයාමාස සර්වදා ॥ 26 ॥
තදා හි යත්කාර්යමුපෛති කිංචිදුපායනං චෝපහෘතං මහාර්හම් ।
ස පාදුකාභ්යාං ප්රථමං නිවේද්ය චකාර පශ්චාද්භරතෝ යථාවත් ॥ 27 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ පංචදශාධිකශතතමස්සර්ගඃ ॥
