ශ්රීමද්වාල්මීකීය රාමායණේ අයෝධ්යාකාංඩම් ।
අථ ත්රයස්ත්රිංශස්සර්ගඃ ।
දත්ත්වා තු සහ වෛදේහ්යා බ්රාහ්මණේභ්යෝ ධනං බහු ।
ජග්මතුඃ පිතරං ද්රෂ්ටුං සීතයා සහ රාඝවෞ ॥ 1 ॥
තතෝ ගෘහීතේ දුෂ්ප්රේක්ෂේ ත්වශෝභේතාං තදායුධේ ।
මාලාදාමභිරාබද්ධේ සීතයා සමලංකෘතේ ॥ 2 ॥
තතඃ ප්රාසාදහර්ම්යාණි විමානශිඛරාණි ච ।
අධිරුහ්ය ජනශ්ශ්රීමානුදාසීනෝ ව්යලෝකයත් ॥ 3 ॥
න හි රථ්යාඃ ස්ම ශක්යංතේ ගංතුං බහුජනාකුලාඃ ।
ආරුහ්ය තස්මාත්ප්රාසාදාන් දීනාඃ පශ්යංති රාඝවම් ॥ 4 ॥
පදාතිං වර්ජිතච්ඡත්රං රාමං දෘෂ්ට්වා ජනාස්තදා ।
ඌචුර්බහුවිධා වාච ශ්ශෝකෝපහතචේතසඃ ॥ 5 ॥
යං යාංතමනුයාති ස්ම චතුරංගබලං මහත් ।
තමේකං සීතයා සාර්ධමනුයාති ස්ම ලක්ෂ්මණඃ ॥ 6 ॥
ඓශ්වර්යස්ය රසජ්ඤඃ සන් කාමිනාං චෛව කාමදඃ ।
නේච්ඡත්යේවානෘතං කර්තුං පිතරං ධර්මගෞරවාත් ॥ 7 ॥
යා න ශක්යා පුරා ද්රෂ්ටුං භූතෛරාකාශගෛරපි ।
තාමද්ය සීතාං පශ්යංති රාජමාර්ගගතා ජනාඃ ॥ 8 ॥
අංගරාගෝචිතාං සීතාං රක්තචංදනසේවිනීම් ।
වර්ෂමුෂ්ණං ච ශීතං ච නේෂ්යංත්යාශු විවර්ණතාම් ॥ 9 ॥
අද්ය නූනං දශරථස්සත්ත්වමාවිශ්ය භාෂතේ ।
න හි රාජා ප්රියං පුත්රං විවාසයිතුමර්හති ॥ 10 ॥
නිර්ගුණස්යාපි පුත්රස්ය කථං ස්යාද්විප්රවාසනම් ।
කිං පුනර්යස්ය ලෝකෝऽයං ජිතෝ වෘත්තේන කේවලම් ॥ 11 ॥
අනෘශංස්යමනුක්රෝශඃ ශ්රුතං ශීලං දමශ්ශමඃ ।
රාඝවං ශෝභයංත්යේතේ ෂඩ්ගුණාඃ පුරුෂෝත්තමම් ॥ 12 ॥
තස්මාත්තස්යෝපඝාතේන ප්රජාඃ පරමපීඩිතාඃ ।
ඖදකානීව සත්ත්වානි ග්රීෂ්මේ සලිලසංක්ෂයාත් ॥ 13 ॥
පීඩයා පීඩිතං සර්වං ජගදස්ය ජගත්පතේඃ ।
මූලස්යේවෝපඝාතේන වෘක්ෂඃ පුෂ්පඵලෝපගඃ ॥ 14 ॥
මූලං හ්යේෂ මනුෂ්යාණාං ධර්මසාරෝ මහාද්යුතිඃ ।
පුෂ්පං ඵලං ච පත්රං ච ශාඛාශ්චාස්යේතරේ ජනාඃ ॥ 15 ॥
තේ ලක්ෂ්මණ ඉව ක්ෂිප්රං සපත්න්ය ස්සහබාංධවාඃ ।
ගච්ඡංතමනුගච්ඡාමෝ යේන ගච්ඡති රාඝවඃ ॥ 16 ॥
උද්යානානි පරිත්යජ්ය ක්ෂේත්රාණි ච ගෘහාණි ච ।
ඒකදුඃඛසුඛා රාමමනුගච්ඡාම ධාර්මිකම් ॥ 17 ॥
සමුද්ධෘතනිධානානි පරිධ්වස්තාජිරාණි ච ।
උපාත්ත ධනධාන්යානි හෘතසාරාණි සර්වශඃ ॥ 18 ॥
රජසාභ්යවකීර්ණානි පරිත්යක්තානි දෛවතෛඃ ।
මූෂකෛඃපරිධාවද්භිරුද්බිලෛරාවෘතානි ච ॥ 19 ॥
අපේතෝදකධූමානි හීනසම්මාර්ජනානි ච ।
ප්රණෂ්ටබලිකර්මේජ්යාමංත්රහෝමජපානි ච ॥ 20 ॥
දුෂ්කාලේනේව භග්නානි භින්නභාජනවංති ච ।
අස්මාත්ත්යක්තානි වේශ්මානි කෛකේයී ප්රතිපද්යතාම් ॥ 21 ॥
වනං නගරමේවාස්තු යේන ගච්ඡති රාඝවඃ ।
අස්මාභිශ්ච පරිත්යක්තං පුරං සංපද්යතාං වනම් ॥ 22 ॥
බිලානි දංෂ්ට්රිණ ස්සර්වේ සානූනි මෘගපක්ෂිණඃ ।
ත්යජංත්වස්මද්භයාද්භීතා ගජාස්සිංහා වනානි ච ॥ 23 ॥
අස්මත්ත්යක්තං ප්රපද්යංතාං සේව්යමානං ත්යජංතු ච ।
තෘණමාංස ඵලාදානාං දේශං ව්යාලමෘගද්විජම් ॥ 24 ॥
ප්රපද්යතාං හි කෛකේයී සපුත්රා සහ බාංධවෛඃ ।
රාඝවේණ වනේ සර්වේ වයං වත්ස්යාම නිර්වෘතාඃ ॥ 25 ॥
ඉත්යේවං විවිධා වාචෝ නානාජනසමීරිතාඃ ।
ශුශ්රාව රාමඃ ශ්රුත්වා ච න විචක්රේऽස්ය මානසම් ॥ 26 ॥
ස තු වේශ්ම පිතුර්දූරාත්කෛලාසශිඛරප්රභම් ।
අභිචක්රාම ධර්මාත්මා මත්තමාතංගවික්රමඃ ॥ 27 ॥
විනීතවීරපුරුෂං ප්රවිශ්ය තු නෘපාලයම් ।
දදර්ශාවස්ථිතං දීනං සුමංත්රමවිදූරතඃ ॥ 28 ॥
ප්රතීක්ෂමාණෝऽපි ජනං තදාර්ත මනාර්තරූපඃ ප්රහසන්නිවාථ ।
ජගාම රාමඃ පිතරං දිදෘක්ෂුඃ පිතුර්නිදේශං විධිවච්චිකීර්ෂුඃ ॥ 29 ॥
තත්පූර්වමෛක්ෂ්වාකසුතෝ මහාත්මා රාමෝ ගමිෂ්යන්වනමාර්තරූපම් ।
ව්යතිෂ්ඨත ප්රේක්ෂ්ය තදා සුමංත්රං පිතුර්මහාත්මා ප්රතිහාරණාර්ථම් ॥ 30 ॥
පිතුර්නිදේශේන තු ධර්මවත්සලඃ වනප්රවේශේ කෘතබුද්ධිනිශ්චයඃ ।
ස රාඝවඃ ප්රේක්ෂ්ය සුමංත්රමබ්රවී න්නිවේදයස්වාගමනං නෘපාය මේ ॥ 31 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ ත්රයස්ත්රිංශස්සර්ගඃ ॥
