শ্রীমদ্বাল্মীকীয় রামাযণে অয়োধ্য়াকাংডম্ ।
অথ ত্রযস্ত্রিংশস্সর্গঃ ।
দত্ত্বা তু সহ বৈদেহ্য়া ব্রাহ্মণেভ্য়ো ধনং বহু ।
জগ্মতুঃ পিতরং দ্রষ্টুং সীতয়া সহ রাঘবৌ ॥ 1 ॥
ততো গৃহীতে দুষ্প্রেক্ষে ত্বশোভেতাং তদায়ুধে ।
মালাদামভিরাবদ্ধে সীতয়া সমলংকৃতে ॥ 2 ॥
ততঃ প্রাসাদহর্ম্য়াণি বিমানশিখরাণি চ ।
অধিরুহ্য় জনশ্শ্রীমানুদাসীনো ব্যলোকযত্ ॥ 3 ॥
ন হি রথ্য়াঃ স্ম শক্য়ংতে গংতুং বহুজনাকুলাঃ ।
আরুহ্য় তস্মাত্প্রাসাদান্ দীনাঃ পশ্য়ংতি রাঘবম্ ॥ 4 ॥
পদাতিং বর্জিতচ্ছত্রং রামং দৃষ্ট্বা জনাস্তদা ।
ঊচুর্বহুবিধা বাচ শ্শোকোপহতচেতসঃ ॥ 5 ॥
যং যাংতমনুয়াতি স্ম চতুরংগবলং মহত্ ।
তমেকং সীতয়া সার্ধমনুয়াতি স্ম লক্ষ্মণঃ ॥ 6 ॥
ঐশ্বর্যস্য় রসজ্ঞঃ সন্ কামিনাং চৈব কামদঃ ।
নেচ্ছত্য়েবানৃতং কর্তুং পিতরং ধর্মগৌরবাত্ ॥ 7 ॥
যা ন শক্য়া পুরা দ্রষ্টুং ভূতৈরাকাশগৈরপি ।
তামদ্য় সীতাং পশ্য়ংতি রাজমার্গগতা জনাঃ ॥ 8 ॥
অংগরাগোচিতাং সীতাং রক্তচংদনসেবিনীম্ ।
বর্ষমুষ্ণং চ শীতং চ নেষ্য়ংত্য়াশু বিবর্ণতাম্ ॥ 9 ॥
অদ্য় নূনং দশরথস্সত্ত্বমাবিশ্য় ভাষতে ।
ন হি রাজা প্রিয়ং পুত্রং বিবাসয়িতুমর্হতি ॥ 10 ॥
নির্গুণস্য়াপি পুত্রস্য় কথং স্য়াদ্বিপ্রবাসনম্ ।
কিং পুনর্যস্য় লোকোঽয়ং জিতো বৃত্তেন কেবলম্ ॥ 11 ॥
অনৃশংস্যমনুক্রোশঃ শ্রুতং শীলং দমশ্শমঃ ।
রাঘবং শোভয়ংত্য়েতে ষড্গুণাঃ পুরুষোত্তমম্ ॥ 12 ॥
তস্মাত্তস্য়োপঘাতেন প্রজাঃ পরমপীডিতাঃ ।
ঔদকানীব সত্ত্বানি গ্রীষ্মে সলিলসংক্ষয়াত্ ॥ 13 ॥
পীডয়া পীডিতং সর্বং জগদস্য় জগত্পতেঃ ।
মূলস্য়েবোপঘাতেন বৃক্ষঃ পুষ্পফলোপগঃ ॥ 14 ॥
মূলং হ্য়েষ মনুষ্য়াণাং ধর্মসারো মহাদ্য়ুতিঃ ।
পুষ্পং ফলং চ পত্রং চ শাখাশ্চাস্য়েতরে জনাঃ ॥ 15 ॥
তে লক্ষ্মণ ইব ক্ষিপ্রং সপত্ন্য় স্সহবাংধবাঃ ।
গচ্ছংতমনুগচ্ছামো যেন গচ্ছতি রাঘবঃ ॥ 16 ॥
উদ্য়ানানি পরিত্যজ্য় ক্ষেত্রাণি চ গৃহাণি চ ।
একদুঃখসুখা রামমনুগচ্ছাম ধার্মিকম্ ॥ 17 ॥
সমুদ্ধৃতনিধানানি পরিধ্বস্তাজিরাণি চ ।
উপাত্ত ধনধান্য়ানি হৃতসারাণি সর্বশঃ ॥ 18 ॥
রজসাভ্যবকীর্ণানি পরিত্যক্তানি দৈবতৈঃ ।
মূষকৈঃপরিধাবদ্ভিরুদ্বিলৈরাবৃতানি চ ॥ 19 ॥
অপেতোদকধূমানি হীনসম্মার্জনানি চ ।
প্রণষ্টবলিকর্মেজ্য়ামংত্রহোমজপানি চ ॥ 20 ॥
দুষ্কালেনেব ভগ্নানি ভিন্নভাজনবংতি চ ।
অস্মাত্ত্যক্তানি বেশ্মানি কৈকেয়ী প্রতিপদ্যতাম্ ॥ 21 ॥
বনং নগরমেবাস্তু যেন গচ্ছতি রাঘবঃ ।
অস্মাভিশ্চ পরিত্যক্তং পুরং সংপদ্যতাং বনম্ ॥ 22 ॥
বিলানি দংষ্ট্রিণ স্সর্বে সানূনি মৃগপক্ষিণঃ ।
ত্যজংত্বস্মদ্ভয়াদ্ভীতা গজাস্সিংহা বনানি চ ॥ 23 ॥
অস্মত্ত্যক্তং প্রপদ্য়ংতাং সেব্যমানং ত্যজংতু চ ।
তৃণমাংস ফলাদানাং দেশং ব্য়ালমৃগদ্বিজম্ ॥ 24 ॥
প্রপদ্যতাং হি কৈকেয়ী সপুত্রা সহ বাংধবৈঃ ।
রাঘবেণ বনে সর্বে বয়ং বত্স্য়াম নির্বৃতাঃ ॥ 25 ॥
ইত্য়েবং বিবিধা বাচো নানাজনসমীরিতাঃ ।
শুশ্রাব রামঃ শ্রুত্বা চ ন বিচক্রেঽস্য় মানসম্ ॥ 26 ॥
স তু বেশ্ম পিতুর্দূরাত্কৈলাসশিখরপ্রভম্ ।
অভিচক্রাম ধর্মাত্মা মত্তমাতংগবিক্রমঃ ॥ 27 ॥
বিনীতবীরপুরুষং প্রবিশ্য় তু নৃপালযম্ ।
দদর্শাবস্থিতং দীনং সুমংত্রমবিদূরতঃ ॥ 28 ॥
প্রতীক্ষমাণোঽপি জনং তদার্ত মনার্তরূপঃ প্রহসন্নিবাথ ।
জগাম রামঃ পিতরং দিদৃক্ষুঃ পিতুর্নিদেশং বিধিবচ্চিকীর্ষুঃ ॥ 29 ॥
তত্পূর্বমৈক্ষ্বাকসুতো মহাত্মা রামো গমিষ্যন্বনমার্তরূপম্ ।
ব্যতিষ্ঠত প্রেক্ষ্য় তদা সুমংত্রং পিতুর্মহাত্মা প্রতিহারণার্থম্ ॥ 30 ॥
পিতুর্নিদেশেন তু ধর্মবত্সলঃ বনপ্রবেশে কৃতবুদ্ধিনিশ্চয়ঃ ।
স রাঘবঃ প্রেক্ষ্য় সুমংত্রমব্রবী ন্নিবেদযস্বাগমনং নৃপায় মে ॥ 31 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ত্রযস্ত্রিংশস্সর্গঃ ॥
