શ્રીમદ્વાલ્મીકીય રામાયણે અરણ્યકાંડમ્ ।
અથ સપ્તપંચાશસ્સર્ગઃ ।
રાક્ષસં મૃગરૂપેણ ચરંતં કામરૂપિણમ્ ।
નિહત્ય રામો મારીચં તૂર્ણં પથિ ન્યવર્તત ॥ 1 ॥
તસ્ય સંત્વરમાણસ્ય દ્રષ્ટુકામસ્ય મૈથિલીમ્ ।
ક્રૂરસ્વનોઽથ ગોમાયુર્વિનનાદાસ્ય પૃષ્ઠતઃ ॥ 2 ॥
સ તસ્ય સ્વરમાજ્ઞાય દારુણં રોમહર્ષણમ્ ।
ચિંતયામાસ ગોમાયોસ્સ્વરેણ પરિશંકિતઃ ॥ 3 ॥
અશુભં બત મન્યેઽહં ગોમાયુર્વાશ્યતે યથા ।
સ્વસ્તિ સ્યાદપિ વૈદેહ્યા રાક્ષસૈર્ભક્ષણં વિના ॥ 4 ॥
મારીચેન તુ વિજ્ઞાય સ્વરમાલંબ્ય મામકમ્ ।
વિક્રુષ્ટં મૃગરૂપેણ લક્ષ્મણશ્શૃણુયાદ્યદિ ॥ 5 ॥
સ સૌમિત્રિસ્સ્વરં શ્રુત્વા તાં ચ હિત્વાચ મૈથિલીમ્ ।
તયેહ પ્રહિતઃ ક્ષિપ્રં મત્સકાશમિહૈષ્યતિ ॥ 6 ॥
રાક્ષસૈસ્સહિતૈર્નૂનં સીતાયા ઈપ્સિતો વધઃ ।
કાંચનશ્ચ મૃગો ભૂત્વા વ્યપનીયાશ્રમાત્તુ મામ્ ॥ 7 ॥
દૂરં નીત્વા તુ મારીચો રાક્ષસોઽભૂચ્છરા હતઃ ।
હા લક્ષ્મણ હતોઽસ્મીતિ યદ્વાક્યં વ્યાજહાર હ ॥ 8 ॥
અપિ સ્વસ્તિ ભવેત્તાભ્યાં રહિતાભ્યાં મહાવને ।
જનસ્થાનનિમિત્તં હિ કૃતવૈરોઽસ્મિ રાક્ષસૈઃ ॥ 9 ॥
નિમિત્તાનિ ચ ઘોરાણિ દૃશ્યંતેઽદ્ય બહૂનિ ચ ।
ઇત્યેવં ચિંતયન્રામશ્શ્રુત્વા ગોમાયુનિસ્સ્વનમ્ ॥ 10 ॥
આત્મનશ્ચાપનયનાન્મૃગરૂપેણ રક્ષસા ।
આજગામ જનસ્થાનં રાઘવઃ પરિશંકિતઃ ॥ 11 ॥
તં દીનમનસો દીનમાસેદુર્મૃગપક્ષિણઃ ।
સવ્યં કૃત્વા મહાત્માનં ઘોરાંશ્ચ સસૃજુસ્સ્વરાન્ ॥ 12 ॥
તાનિ દૃષ્ટ્વા નિમિત્તાનિ મહાઘોરાણિ રાઘવઃ ।
ન્યવર્તતાથ ત્વરિતો જવેનાશ્રમમાત્મનઃ ॥ 13 ॥
સીતાં સ તુ વરારોહાં લક્ષ્મણં ચ મહાબલમ્ ।
આજગામ જનસ્થાનં ચિંતયન્નેવ રાઘવઃ ॥ 14 ॥
તતો લક્ષ્મણમાયાંતં દદર્શ વિગતપ્રભમ્ ।
તતોઽવિદૂરે રામેણ સમીયાય સ લક્ષ્મણઃ ॥ 15 ॥
વિષણ્ણસ્સુવિષણ્ણેન દુઃખિતો દુઃખભાગિના ।
સંજગર્હેઽથ તં ભ્રાતા જ્યેષ્ઠો લક્ષ્મણમાગતમ્ ॥ 16 ॥
વિહાય સીતાં વિજને વને રાક્ષસસેવિતે ।
ગૃહીત્વા ચ કરં સવ્યં લક્ષ્મણં રઘુનંદનઃ ॥ 17 ॥
ઉવાચ મધુરોદર્કમિદં પરુષમાર્તિમત્ ।
અહો લક્ષ્મણ ગર્હ્યં તે કૃતં યસ્ત્વં વિહાય તામ્ ॥ 18 ॥
સીતામિહાઽગતસ્સૌમ્ય કચ્ચિત્સ્વસ્તિ ભવેદિહ ।
ન મેઽસ્તિ સંશયો વીર સર્વથા જનકાત્મજા ॥ 19 ॥
વિનષ્ટા ભક્ષિતા વાપિ રાક્ષસૈર્વનચારિભિઃ ।
અશુભાન્યેવ ભૂયિષ્ઠં યથા પ્રાદુર્ભવંતિ મે ॥ 20 ॥
અપિ લક્ષ્મણ સીતાયાસ્સામગ્ર્યં પ્રાપ્નુયાવહે ।
જીવંત્યાઃ પુરુષવ્યાઘ્ર સુતાયા જનકસ્ય વૈ ॥ 21 ॥
યથા વૈ મૃગસંઘાશ્ચ ગોમાયુશ્ચૈવ ભૈરવમ્ ।
વાશ્યંતે શકુનાશ્ચાપિ પ્રદીપ્તામભિતો દિશમ્ ॥ 22 ॥
અપિ સ્વસ્તિ ભવેત્તસ્યા રાજપુત્ર્યા મહાબલ ।
ઇદં હિ રક્ષો મૃગસન્નિકાશં પ્રલોભ્ય માં દૂરમનુપ્રયાંતમ્ ।
હતં કથંચિન્મહતા શ્રમેણ સ રાક્ષસોઽભૂન્મ્રિયમાણ એવ ॥ 23 ॥
મનશ્ચ મે દીનમિહાપ્રહૃષ્ટં ચક્ષુશ્ચ સવ્યં કુરુતે વિકારમ્ ।
અસંશયં લક્ષ્મણ નાસ્તિ સીતા હૃતા મૃતા વા પથિ વર્તતે વા ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે સપ્તપંચાશસ્સર્ગઃ ॥
