śrīmadvālmīkīya rāmāyaṇē araṇyakāṇḍam ।
atha saptapañchāśassargaḥ ।
rākṣasaṃ mṛgarūpēṇa charantaṃ kāmarūpiṇam ।
nihatya rāmō mārīchaṃ tūrṇaṃ pathi nyavartata ॥ 1 ॥
tasya santvaramāṇasya draṣṭukāmasya maithilīm ।
krūrasvanō'tha gōmāyurvinanādāsya pṛṣṭhataḥ ॥ 2 ॥
sa tasya svaramājñāya dāruṇaṃ rōmaharṣaṇam ।
chintayāmāsa gōmāyōssvarēṇa pariśaṅkitaḥ ॥ 3 ॥
aśubhaṃ bata manyē'haṃ gōmāyurvāśyatē yathā ।
svasti syādapi vaidēhyā rākṣasairbhakṣaṇaṃ vinā ॥ 4 ॥
mārīchēna tu vijñāya svaramālambya māmakam ।
vikruṣṭaṃ mṛgarūpēṇa lakṣmaṇaśśṛṇuyādyadi ॥ 5 ॥
sa saumitrissvaraṃ śrutvā tāṃ cha hitvācha maithilīm ।
tayēha prahitaḥ kṣipraṃ matsakāśamihaiṣyati ॥ 6 ॥
rākṣasaissahitairnūnaṃ sītāyā īpsitō vadhaḥ ।
kāñchanaścha mṛgō bhūtvā vyapanīyāśramāttu mām ॥ 7 ॥
dūraṃ nītvā tu mārīchō rākṣasō'bhūchCharā hataḥ ।
hā lakṣmaṇa hatō'smīti yadvākyaṃ vyājahāra ha ॥ 8 ॥
api svasti bhavēttābhyāṃ rahitābhyāṃ mahāvanē ।
janasthānanimittaṃ hi kṛtavairō'smi rākṣasaiḥ ॥ 9 ॥
nimittāni cha ghōrāṇi dṛśyantē'dya bahūni cha ।
ityēvaṃ chintayanrāmaśśrutvā gōmāyunissvanam ॥ 10 ॥
ātmanaśchāpanayanānmṛgarūpēṇa rakṣasā ।
ājagāma janasthānaṃ rāghavaḥ pariśaṅkitaḥ ॥ 11 ॥
taṃ dīnamanasō dīnamāsēdurmṛgapakṣiṇaḥ ।
savyaṃ kṛtvā mahātmānaṃ ghōrāṃścha sasṛjussvarān ॥ 12 ॥
tāni dṛṣṭvā nimittāni mahāghōrāṇi rāghavaḥ ।
nyavartatātha tvaritō javēnāśramamātmanaḥ ॥ 13 ॥
sītāṃ sa tu varārōhāṃ lakṣmaṇaṃ cha mahābalam ।
ājagāma janasthānaṃ chintayannēva rāghavaḥ ॥ 14 ॥
tatō lakṣmaṇamāyāntaṃ dadarśa vigataprabham ।
tatō'vidūrē rāmēṇa samīyāya sa lakṣmaṇaḥ ॥ 15 ॥
viṣaṇṇassuviṣaṇṇēna duḥkhitō duḥkhabhāginā ।
sañjagarhē'tha taṃ bhrātā jyēṣṭhō lakṣmaṇamāgatam ॥ 16 ॥
vihāya sītāṃ vijanē vanē rākṣasasēvitē ।
gṛhītvā cha karaṃ savyaṃ lakṣmaṇaṃ raghunandanaḥ ॥ 17 ॥
uvācha madhurōdarkamidaṃ paruṣamārtimat ।
ahō lakṣmaṇa garhyaṃ tē kṛtaṃ yastvaṃ vihāya tām ॥ 18 ॥
sītāmihā'gatassaumya kachchitsvasti bhavēdiha ।
na mē'sti saṃśayō vīra sarvathā janakātmajā ॥ 19 ॥
vinaṣṭā bhakṣitā vāpi rākṣasairvanachāribhiḥ ।
aśubhānyēva bhūyiṣṭhaṃ yathā prādurbhavanti mē ॥ 20 ॥
api lakṣmaṇa sītāyāssāmagryaṃ prāpnuyāvahē ।
jīvantyāḥ puruṣavyāghra sutāyā janakasya vai ॥ 21 ॥
yathā vai mṛgasaṅghāścha gōmāyuśchaiva bhairavam ।
vāśyantē śakunāśchāpi pradīptāmabhitō diśam ॥ 22 ॥
api svasti bhavēttasyā rājaputryā mahābala ।
idaṃ hi rakṣō mṛgasannikāśaṃ pralōbhya māṃ dūramanuprayāntam ।
hataṃ kathañchinmahatā śramēṇa sa rākṣasō'bhūnmriyamāṇa ēva ॥ 23 ॥
manaścha mē dīnamihāprahṛṣṭaṃ chakṣuścha savyaṃ kurutē vikāram ।
asaṃśayaṃ lakṣmaṇa nāsti sītā hṛtā mṛtā vā pathi vartatē vā ॥ 24 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē saptapañchāśassargaḥ ॥
