ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തപംചാശസ്സര്ഗഃ ।
രാക്ഷസം മൃഗരൂപേണ ചരംതം കാമരൂപിണമ് ।
നിഹത്യ രാമോ മാരീചം തൂര്ണം പഥി ന്യവര്തത ॥ 1 ॥
തസ്യ സംത്വരമാണസ്യ ദ്രഷ്ടുകാമസ്യ മൈഥിലീമ് ।
ക്രൂരസ്വനോഽഥ ഗോമായുർവിനനാദാസ്യ പൃഷ്ഠതഃ ॥ 2 ॥
സ തസ്യ സ്വരമാജ്ഞായ ദാരുണം രോമഹര്ഷണമ് ।
ചിംതയാമാസ ഗോമായോസ്സ്വരേണ പരിശംകിതഃ ॥ 3 ॥
അശുഭം ബത മന്യേഽഹം ഗോമായുർവാശ്യതേ യഥാ ।
സ്വസ്തി സ്യാദപി വൈദേഹ്യാ രാക്ഷസൈര്ഭക്ഷണം വിനാ ॥ 4 ॥
മാരീചേന തു വിജ്ഞായ സ്വരമാലംബ്യ മാമകമ് ।
വിക്രുഷ്ടം മൃഗരൂപേണ ലക്ഷ്മണശ്ശൃണുയാദ്യദി ॥ 5 ॥
സ സൌമിത്രിസ്സ്വരം ശ്രുത്വാ താം ച ഹിത്വാച മൈഥിലീമ് ।
തയേഹ പ്രഹിതഃ ക്ഷിപ്രം മത്സകാശമിഹൈഷ്യതി ॥ 6 ॥
രാക്ഷസൈസ്സഹിതൈര്നൂനം സീതായാ ഈപ്സിതോ വധഃ ।
കാംചനശ്ച മൃഗോ ഭൂത്വാ വ്യപനീയാശ്രമാത്തു മാമ് ॥ 7 ॥
ദൂരം നീത്വാ തു മാരീചോ രാക്ഷസോഽഭൂച്ഛരാ ഹതഃ ।
ഹാ ലക്ഷ്മണ ഹതോഽസ്മീതി യദ്വാക്യം വ്യാജഹാര ഹ ॥ 8 ॥
അപി സ്വസ്തി ഭവേത്താഭ്യാം രഹിതാഭ്യാം മഹാവനേ ।
ജനസ്ഥാനനിമിത്തം ഹി കൃതവൈരോഽസ്മി രാക്ഷസൈഃ ॥ 9 ॥
നിമിത്താനി ച ഘോരാണി ദൃശ്യംതേഽദ്യ ബഹൂനി ച ।
ഇത്യേവം ചിംതയന്രാമശ്ശ്രുത്വാ ഗോമായുനിസ്സ്വനമ് ॥ 10 ॥
ആത്മനശ്ചാപനയനാന്മൃഗരൂപേണ രക്ഷസാ ।
ആജഗാമ ജനസ്ഥാനം രാഘവഃ പരിശംകിതഃ ॥ 11 ॥
തം ദീനമനസോ ദീനമാസേദുര്മൃഗപക്ഷിണഃ ।
സവ്യം കൃത്വാ മഹാത്മാനം ഘോരാംശ്ച സസൃജുസ്സ്വരാന് ॥ 12 ॥
താനി ദൃഷ്ട്വാ നിമിത്താനി മഹാഘോരാണി രാഘവഃ ।
ന്യവര്തതാഥ ത്വരിതോ ജവേനാശ്രമമാത്മനഃ ॥ 13 ॥
സീതാം സ തു വരാരോഹാം ലക്ഷ്മണം ച മഹാബലമ് ।
ആജഗാമ ജനസ്ഥാനം ചിംതയന്നേവ രാഘവഃ ॥ 14 ॥
തതോ ലക്ഷ്മണമായാംതം ദദര്ശ വിഗതപ്രഭമ് ।
തതോഽവിദൂരേ രാമേണ സമീയായ സ ലക്ഷ്മണഃ ॥ 15 ॥
വിഷണ്ണസ്സുവിഷണ്ണേന ദുഃഖിതോ ദുഃഖഭാഗിനാ ।
സംജഗര്ഹേഽഥ തം ഭ്രാതാ ജ്യേഷ്ഠോ ലക്ഷ്മണമാഗതമ് ॥ 16 ॥
വിഹായ സീതാം വിജനേ വനേ രാക്ഷസസേവിതേ ।
ഗൃഹീത്വാ ച കരം സവ്യം ലക്ഷ്മണം രഘുനംദനഃ ॥ 17 ॥
ഉവാച മധുരോദര്കമിദം പരുഷമാര്തിമത് ।
അഹോ ലക്ഷ്മണ ഗര്ഹ്യം തേ കൃതം യസ്ത്വം വിഹായ താമ് ॥ 18 ॥
സീതാമിഹാഽഗതസ്സൌമ്യ കച്ചിത്സ്വസ്തി ഭവേദിഹ ।
ന മേഽസ്തി സംശയോ വീര സർവഥാ ജനകാത്മജാ ॥ 19 ॥
വിനഷ്ടാ ഭക്ഷിതാ വാപി രാക്ഷസൈർവനചാരിഭിഃ ।
അശുഭാന്യേവ ഭൂയിഷ്ഠം യഥാ പ്രാദുര്ഭവംതി മേ ॥ 20 ॥
അപി ലക്ഷ്മണ സീതായാസ്സാമഗ്ര്യം പ്രാപ്നുയാവഹേ ।
ജീവംത്യാഃ പുരുഷവ്യാഘ്ര സുതായാ ജനകസ്യ വൈ ॥ 21 ॥
യഥാ വൈ മൃഗസംഘാശ്ച ഗോമായുശ്ചൈവ ഭൈരവമ് ।
വാശ്യംതേ ശകുനാശ്ചാപി പ്രദീപ്താമഭിതോ ദിശമ് ॥ 22 ॥
അപി സ്വസ്തി ഭവേത്തസ്യാ രാജപുത്ര്യാ മഹാബല ।
ഇദം ഹി രക്ഷോ മൃഗസന്നികാശം പ്രലോഭ്യ മാം ദൂരമനുപ്രയാംതമ് ।
ഹതം കഥംചിന്മഹതാ ശ്രമേണ സ രാക്ഷസോഽഭൂന്മ്രിയമാണ ഏവ ॥ 23 ॥
മനശ്ച മേ ദീനമിഹാപ്രഹൃഷ്ടം ചക്ഷുശ്ച സവ്യം കുരുതേ വികാരമ് ।
അസംശയം ലക്ഷ്മണ നാസ്തി സീതാ ഹൃതാ മൃതാ വാ പഥി വര്തതേ വാ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തപംചാശസ്സര്ഗഃ ॥
