ශ්රීමද්වාල්මීකීය රාමායණේ අරණ්යකාංඩම් ।
අථ සප්තපංචාශස්සර්ගඃ ।
රාක්ෂසං මෘගරූපේණ චරංතං කාමරූපිණම් ।
නිහත්ය රාමෝ මාරීචං තූර්ණං පථි න්යවර්තත ॥ 1 ॥
තස්ය සංත්වරමාණස්ය ද්රෂ්ටුකාමස්ය මෛථිලීම් ।
ක්රූරස්වනෝऽථ ගෝමායුර්විනනාදාස්ය පෘෂ්ඨතඃ ॥ 2 ॥
ස තස්ය ස්වරමාජ්ඤාය දාරුණං රෝමහර්ෂණම් ।
චිංතයාමාස ගෝමායෝස්ස්වරේණ පරිශංකිතඃ ॥ 3 ॥
අශුභං බත මන්යේऽහං ගෝමායුර්වාශ්යතේ යථා ।
ස්වස්ති ස්යාදපි වෛදේහ්යා රාක්ෂසෛර්භක්ෂණං විනා ॥ 4 ॥
මාරීචේන තු විජ්ඤාය ස්වරමාලංබ්ය මාමකම් ।
වික්රුෂ්ටං මෘගරූපේණ ලක්ෂ්මණශ්ශෘණුයාද්යදි ॥ 5 ॥
ස සෞමිත්රිස්ස්වරං ශ්රුත්වා තාං ච හිත්වාච මෛථිලීම් ।
තයේහ ප්රහිතඃ ක්ෂිප්රං මත්සකාශමිහෛෂ්යති ॥ 6 ॥
රාක්ෂසෛස්සහිතෛර්නූනං සීතායා ඊප්සිතෝ වධඃ ।
කාංචනශ්ච මෘගෝ භූත්වා ව්යපනීයාශ්රමාත්තු මාම් ॥ 7 ॥
දූරං නීත්වා තු මාරීචෝ රාක්ෂසෝऽභූච්ඡරා හතඃ ।
හා ලක්ෂ්මණ හතෝऽස්මීති යද්වාක්යං ව්යාජහාර හ ॥ 8 ॥
අපි ස්වස්ති භවේත්තාභ්යාං රහිතාභ්යාං මහාවනේ ।
ජනස්ථානනිමිත්තං හි කෘතවෛරෝऽස්මි රාක්ෂසෛඃ ॥ 9 ॥
නිමිත්තානි ච ඝෝරාණි දෘශ්යංතේऽද්ය බහූනි ච ।
ඉත්යේවං චිංතයන්රාමශ්ශ්රුත්වා ගෝමායුනිස්ස්වනම් ॥ 10 ॥
ආත්මනශ්චාපනයනාන්මෘගරූපේණ රක්ෂසා ।
ආජගාම ජනස්ථානං රාඝවඃ පරිශංකිතඃ ॥ 11 ॥
තං දීනමනසෝ දීනමාසේදුර්මෘගපක්ෂිණඃ ।
සව්යං කෘත්වා මහාත්මානං ඝෝරාංශ්ච සසෘජුස්ස්වරාන් ॥ 12 ॥
තානි දෘෂ්ට්වා නිමිත්තානි මහාඝෝරාණි රාඝවඃ ।
න්යවර්තතාථ ත්වරිතෝ ජවේනාශ්රමමාත්මනඃ ॥ 13 ॥
සීතාං ස තු වරාරෝහාං ලක්ෂ්මණං ච මහාබලම් ।
ආජගාම ජනස්ථානං චිංතයන්නේව රාඝවඃ ॥ 14 ॥
තතෝ ලක්ෂ්මණමායාංතං දදර්ශ විගතප්රභම් ।
තතෝऽවිදූරේ රාමේණ සමීයාය ස ලක්ෂ්මණඃ ॥ 15 ॥
විෂණ්ණස්සුවිෂණ්ණේන දුඃඛිතෝ දුඃඛභාගිනා ।
සංජගර්හේऽථ තං භ්රාතා ජ්යේෂ්ඨෝ ලක්ෂ්මණමාගතම් ॥ 16 ॥
විහාය සීතාං විජනේ වනේ රාක්ෂසසේවිතේ ।
ගෘහීත්වා ච කරං සව්යං ලක්ෂ්මණං රඝුනංදනඃ ॥ 17 ॥
උවාච මධුරෝදර්කමිදං පරුෂමාර්තිමත් ।
අහෝ ලක්ෂ්මණ ගර්හ්යං තේ කෘතං යස්ත්වං විහාය තාම් ॥ 18 ॥
සීතාමිහාऽගතස්සෞම්ය කච්චිත්ස්වස්ති භවේදිහ ।
න මේऽස්ති සංශයෝ වීර සර්වථා ජනකාත්මජා ॥ 19 ॥
විනෂ්ටා භක්ෂිතා වාපි රාක්ෂසෛර්වනචාරිභිඃ ।
අශුභාන්යේව භූයිෂ්ඨං යථා ප්රාදුර්භවංති මේ ॥ 20 ॥
අපි ලක්ෂ්මණ සීතායාස්සාමග්ර්යං ප්රාප්නුයාවහේ ।
ජීවංත්යාඃ පුරුෂව්යාඝ්ර සුතායා ජනකස්ය වෛ ॥ 21 ॥
යථා වෛ මෘගසංඝාශ්ච ගෝමායුශ්චෛව භෛරවම් ।
වාශ්යංතේ ශකුනාශ්චාපි ප්රදීප්තාමභිතෝ දිශම් ॥ 22 ॥
අපි ස්වස්ති භවේත්තස්යා රාජපුත්ර්යා මහාබල ।
ඉදං හි රක්ෂෝ මෘගසන්නිකාශං ප්රලෝභ්ය මාං දූරමනුප්රයාංතම් ।
හතං කථංචින්මහතා ශ්රමේණ ස රාක්ෂසෝऽභූන්ම්රියමාණ ඒව ॥ 23 ॥
මනශ්ච මේ දීනමිහාප්රහෘෂ්ටං චක්ෂුශ්ච සව්යං කුරුතේ විකාරම් ।
අසංශයං ලක්ෂ්මණ නාස්ති සීතා හෘතා මෘතා වා පථි වර්තතේ වා ॥ 24 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අරණ්යකාංඩේ සප්තපංචාශස්සර්ගඃ ॥
