ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ସପ୍ତପଂଚାଶସ୍ସର୍ଗଃ ।
ରାକ୍ଷସଂ ମୃଗରୂପେଣ ଚରଂତଂ କାମରୂପିଣମ୍ ।
ନିହତ୍ୟ ରାମୋ ମାରୀଚଂ ତୂର୍ଣଂ ପଥି ନ୍ୟଵର୍ତତ ॥ 1 ॥
ତସ୍ୟ ସଂତ୍ଵରମାଣସ୍ୟ ଦ୍ରଷ୍ଟୁକାମସ୍ୟ ମୈଥିଲୀମ୍ ।
କ୍ରୂରସ୍ଵନୋଽଥ ଗୋମାୟୁର୍ଵିନନାଦାସ୍ୟ ପୃଷ୍ଠତଃ ॥ 2 ॥
ସ ତସ୍ୟ ସ୍ଵରମାଜ୍ଞାୟ ଦାରୁଣଂ ରୋମହର୍ଷଣମ୍ ।
ଚିଂତୟାମାସ ଗୋମାୟୋସ୍ସ୍ଵରେଣ ପରିଶଂକିତଃ ॥ 3 ॥
ଅଶୁଭଂ ବତ ମନ୍ୟେଽହଂ ଗୋମାୟୁର୍ଵାଶ୍ୟତେ ୟଥା ।
ସ୍ଵସ୍ତି ସ୍ୟାଦପି ଵୈଦେହ୍ୟା ରାକ୍ଷସୈର୍ଭକ୍ଷଣଂ ଵିନା ॥ 4 ॥
ମାରୀଚେନ ତୁ ଵିଜ୍ଞାୟ ସ୍ଵରମାଲଂବ୍ୟ ମାମକମ୍ ।
ଵିକ୍ରୁଷ୍ଟଂ ମୃଗରୂପେଣ ଲକ୍ଷ୍ମଣଶ୍ଶୃଣୁୟାଦ୍ୟଦି ॥ 5 ॥
ସ ସୌମିତ୍ରିସ୍ସ୍ଵରଂ ଶ୍ରୁତ୍ଵା ତାଂ ଚ ହିତ୍ଵାଚ ମୈଥିଲୀମ୍ ।
ତୟେହ ପ୍ରହିତଃ କ୍ଷିପ୍ରଂ ମତ୍ସକାଶମିହୈଷ୍ୟତି ॥ 6 ॥
ରାକ୍ଷସୈସ୍ସହିତୈର୍ନୂନଂ ସୀତାୟା ଈପ୍ସିତୋ ଵଧଃ ।
କାଂଚନଶ୍ଚ ମୃଗୋ ଭୂତ୍ଵା ଵ୍ୟପନୀୟାଶ୍ରମାତ୍ତୁ ମାମ୍ ॥ 7 ॥
ଦୂରଂ ନୀତ୍ଵା ତୁ ମାରୀଚୋ ରାକ୍ଷସୋଽଭୂଚ୍ଛରା ହତଃ ।
ହା ଲକ୍ଷ୍ମଣ ହତୋଽସ୍ମୀତି ୟଦ୍ଵାକ୍ୟଂ ଵ୍ୟାଜହାର ହ ॥ 8 ॥
ଅପି ସ୍ଵସ୍ତି ଭଵେତ୍ତାଭ୍ୟାଂ ରହିତାଭ୍ୟାଂ ମହାଵନେ ।
ଜନସ୍ଥାନନିମିତ୍ତଂ ହି କୃତଵୈରୋଽସ୍ମି ରାକ୍ଷସୈଃ ॥ 9 ॥
ନିମିତ୍ତାନି ଚ ଘୋରାଣି ଦୃଶ୍ୟଂତେଽଦ୍ୟ ବହୂନି ଚ ।
ଇତ୍ୟେଵଂ ଚିଂତୟନ୍ରାମଶ୍ଶ୍ରୁତ୍ଵା ଗୋମାୟୁନିସ୍ସ୍ଵନମ୍ ॥ 10 ॥
ଆତ୍ମନଶ୍ଚାପନୟନାନ୍ମୃଗରୂପେଣ ରକ୍ଷସା ।
ଆଜଗାମ ଜନସ୍ଥାନଂ ରାଘଵଃ ପରିଶଂକିତଃ ॥ 11 ॥
ତଂ ଦୀନମନସୋ ଦୀନମାସେଦୁର୍ମୃଗପକ୍ଷିଣଃ ।
ସଵ୍ୟଂ କୃତ୍ଵା ମହାତ୍ମାନଂ ଘୋରାଂଶ୍ଚ ସସୃଜୁସ୍ସ୍ଵରାନ୍ ॥ 12 ॥
ତାନି ଦୃଷ୍ଟ୍ଵା ନିମିତ୍ତାନି ମହାଘୋରାଣି ରାଘଵଃ ।
ନ୍ୟଵର୍ତତାଥ ତ୍ଵରିତୋ ଜଵେନାଶ୍ରମମାତ୍ମନଃ ॥ 13 ॥
ସୀତାଂ ସ ତୁ ଵରାରୋହାଂ ଲକ୍ଷ୍ମଣଂ ଚ ମହାବଲମ୍ ।
ଆଜଗାମ ଜନସ୍ଥାନଂ ଚିଂତୟନ୍ନେଵ ରାଘଵଃ ॥ 14 ॥
ତତୋ ଲକ୍ଷ୍ମଣମାୟାଂତଂ ଦଦର୍ଶ ଵିଗତପ୍ରଭମ୍ ।
ତତୋଽଵିଦୂରେ ରାମେଣ ସମୀୟାୟ ସ ଲକ୍ଷ୍ମଣଃ ॥ 15 ॥
ଵିଷଣ୍ଣସ୍ସୁଵିଷଣ୍ଣେନ ଦୁଃଖିତୋ ଦୁଃଖଭାଗିନା ।
ସଂଜଗର୍ହେଽଥ ତଂ ଭ୍ରାତା ଜ୍ୟେଷ୍ଠୋ ଲକ୍ଷ୍ମଣମାଗତମ୍ ॥ 16 ॥
ଵିହାୟ ସୀତାଂ ଵିଜନେ ଵନେ ରାକ୍ଷସସେଵିତେ ।
ଗୃହୀତ୍ଵା ଚ କରଂ ସଵ୍ୟଂ ଲକ୍ଷ୍ମଣଂ ରଘୁନଂଦନଃ ॥ 17 ॥
ଉଵାଚ ମଧୁରୋଦର୍କମିଦଂ ପରୁଷମାର୍ତିମତ୍ ।
ଅହୋ ଲକ୍ଷ୍ମଣ ଗର୍ହ୍ୟଂ ତେ କୃତଂ ୟସ୍ତ୍ଵଂ ଵିହାୟ ତାମ୍ ॥ 18 ॥
ସୀତାମିହାଽଗତସ୍ସୌମ୍ୟ କଚ୍ଚିତ୍ସ୍ଵସ୍ତି ଭଵେଦିହ ।
ନ ମେଽସ୍ତି ସଂଶୟୋ ଵୀର ସର୍ଵଥା ଜନକାତ୍ମଜା ॥ 19 ॥
ଵିନଷ୍ଟା ଭକ୍ଷିତା ଵାପି ରାକ୍ଷସୈର୍ଵନଚାରିଭିଃ ।
ଅଶୁଭାନ୍ୟେଵ ଭୂୟିଷ୍ଠଂ ୟଥା ପ୍ରାଦୁର୍ଭଵଂତି ମେ ॥ 20 ॥
ଅପି ଲକ୍ଷ୍ମଣ ସୀତାୟାସ୍ସାମଗ୍ର୍ୟଂ ପ୍ରାପ୍ନୁୟାଵହେ ।
ଜୀଵଂତ୍ୟାଃ ପୁରୁଷଵ୍ୟାଘ୍ର ସୁତାୟା ଜନକସ୍ୟ ଵୈ ॥ 21 ॥
ୟଥା ଵୈ ମୃଗସଂଘାଶ୍ଚ ଗୋମାୟୁଶ୍ଚୈଵ ଭୈରଵମ୍ ।
ଵାଶ୍ୟଂତେ ଶକୁନାଶ୍ଚାପି ପ୍ରଦୀପ୍ତାମଭିତୋ ଦିଶମ୍ ॥ 22 ॥
ଅପି ସ୍ଵସ୍ତି ଭଵେତ୍ତସ୍ୟା ରାଜପୁତ୍ର୍ୟା ମହାବଲ ।
ଇଦଂ ହି ରକ୍ଷୋ ମୃଗସନ୍ନିକାଶଂ ପ୍ରଲୋଭ୍ୟ ମାଂ ଦୂରମନୁପ୍ରୟାଂତମ୍ ।
ହତଂ କଥଂଚିନ୍ମହତା ଶ୍ରମେଣ ସ ରାକ୍ଷସୋଽଭୂନ୍ମ୍ରିୟମାଣ ଏଵ ॥ 23 ॥
ମନଶ୍ଚ ମେ ଦୀନମିହାପ୍ରହୃଷ୍ଟଂ ଚକ୍ଷୁଶ୍ଚ ସଵ୍ୟଂ କୁରୁତେ ଵିକାରମ୍ ।
ଅସଂଶୟଂ ଲକ୍ଷ୍ମଣ ନାସ୍ତି ସୀତା ହୃତା ମୃତା ଵା ପଥି ଵର୍ତତେ ଵା ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ସପ୍ତପଂଚାଶସ୍ସର୍ଗଃ ॥
