ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ସପ୍ତସପ୍ତତିତମସ୍ସର୍ଗଃ ।
ଗତେ ରାମେ ପ୍ରଶାଂତାତ୍ମା ରାମୋ ଦାଶରଥିର୍ଧନୁଃ ।
ଵରୁଣାୟାପ୍ରମେୟାୟ ଦଦୌ ହସ୍ତେ ସସାୟକମ୍ ॥ 1 ॥
ଅଭିଵାଦ୍ୟ ତତୋ ରାମୋ ଵସିଷ୍ଠପ୍ରମୁଖାନୃଷୀନ୍ ।
ପିତରଂ ଵିହ୍ଵଲଂ ଦୃଷ୍ଟ୍ଵା ପ୍ରୋଵାଚ ରଘୁନଂଦନଃ ॥ 2 ॥
ଜାମଦଗ୍ନ୍ୟୋ ଗତୋ ରାମଃ ପ୍ରୟାତୁ ଚତୁରଂଗିଣୀ ।
ଅୟୋଧ୍ୟାଭିମୁଖୀ ସେନା ତ୍ଵୟା ନାଥେନ ପାଲିତା ॥ 3 ॥
ସଂଦିଶସ୍ଵ ମହାରାଜ ସେନାଂ ତ୍ଵଚ୍ଛାସନେ ସ୍ଥିତାମ୍ ।
ଶାସନଂ କାଂକ୍ଷତେ ସେନା ଚାତକାଲିର୍ଜଲଂ ୟଥା ॥ 4 ॥
ରାମସ୍ୟ ଵଚନଂ ଶ୍ରୁତ୍ଵା ରାଜା ଦଶରଥ ସ୍ସୁତମ୍ ।
ବାହୁଭ୍ୟାଂ ସଂପରିଷ୍ଵଜ୍ୟ ମୂର୍ଧ୍ନି ଚାଘ୍ରାୟ ରାଘଵମ୍ ॥ 5 ॥
ଗତୋ ରାମ ଇତି ଶ୍ରୁତ୍ଵା ହୃଷ୍ଟଃ ପ୍ରମୁଦିତୋ ନୃପଃ ।
ପୁନର୍ଜାତଂ ତଦା ମେନେ ପୁତ୍ରମାତ୍ମାନମେଵ ଚ ॥ 6 ॥
ଚୋଦୟାମାସ ତାଂ ସେନାଂ ଜଗାମାଶୁ ତତଃ ପୁରୀମ୍ ।
ପତାକାଧ୍ଵଜିନୀଂ ରମ୍ୟାଂ ତୂର୍ୟୋଦ୍ଘୁଷ୍ଟନିନାଦିତାମ୍ ॥ 7 ॥
ସିକ୍ତରାଜ ପଥାଂ ରମ୍ୟାଂ ପ୍ରକୀର୍ଣକୁସୁମୋତ୍କରାମ୍ ।
ରାଜପ୍ରଵେଶସୁମୁଖୈଃ ପୌରୈର୍ମଂଗଲଵାଦିଭିଃ ॥ 8 ॥
ସଂପୂର୍ଣାଂ ପ୍ରାଵିଶଦ୍ରାଜା ଜନୌଘୈସ୍ସମଲଂକୃତାମ୍ ।
ପୌରୈଃ ପ୍ରତ୍ୟୁଦ୍ଗତୋ ଦୂରଂ ଦ୍ଵିଜୈଶ୍ଚ ପୁରଵାସିଭିଃ ।
ପୁତ୍ରୈରନୁଗତ ଶ୍ଶ୍ରୀମାନ୍ ଶ୍ରୀମଦ୍ଭିଶ୍ଚ ମହାୟଶାଃ ॥ 9 ॥
ପ୍ରଵିଵେଶ ଗୃହଂ ରାଜା ହିମଵତ୍ସଦୃଶଂ ପୁନଃ ।
ନନଂଦ ସଜନୋ ରାଜା ଗୃହେ କାମୈ ସ୍ସୁପୂଜିତଃ ॥ 10 ॥
କୌସଲ୍ୟା ଚ ସୁମିତ୍ରା ଚ କୈକେୟୀ ଚ ସୁମଧ୍ୟମା ।
ଵଧୂପ୍ରତିଗ୍ରହେ ୟୁକ୍ତା ୟାଶ୍ଚାନ୍ୟା ରାଜୟୋଷିତଃ ॥ 11 ॥
ତତସ୍ସୀତାଂ ମହାଭାଗାମୂର୍ମିଲାଂ ଚ ୟଶସ୍ଵିନୀମ୍ ।
କୁଶଧ୍ଵଜସୁତେ ଚୋଭେ ଜଗୃହୁର୍ନୃପପତ୍ନୟଃ ॥ 12 ॥
ମଂଗଲାଲଂଭନୈଶ୍ଚାପି ଶୋଭିତାଃ କ୍ଷୌମଵାସସଃ ।
ଦେଵତାୟତନାନ୍ୟାଶୁ ସର୍ଵାସ୍ତାଃ ପ୍ରତ୍ୟପୂଜୟନ୍ ॥ 13 ॥
ଅଭିଵାଦ୍ୟାଭିଵାଦ୍ୟାଂଶ୍ଚ ସର୍ଵା ରାଜସୁତାସ୍ତଦା ।
ସ୍ଵଂ ସ୍ଵଂ ଗୃହମଥାସାଦ୍ୟ କୁବେରଭଵନୋପମମ୍ ॥ 14 ॥
ଗୋଭିର୍ଧନୈଶ୍ଚ ଧାନ୍ୟୈଶ୍ଚ ତର୍ପୟିତ୍ଵା ଦ୍ଵିଜୋତ୍ତମାନ୍ ।
ରେମିରେ ମୁଦିତାଃ ସର୍ଵା ଭର୍ତୃଭିଃ ସହିତା ରହଃ ॥ 15 ॥
କୁମାରାଶ୍ଚ ମହାତ୍ମାନୋ ଵୀର୍ୟେଣାପ୍ରତିମା ଭୁଵି ।
କୃତଦାରାଃ କୃତାସ୍ତ୍ରାଶ୍ଚ ସଧନାଃ ସସୁହୃଜ୍ଜନାଃ ॥ 16 ॥
ଶୁଶ୍ରୂଷମାଣାଃ ପିତରଂ ଵର୍ତୟଂତି ନରର୍ଷଭାଃ ।
କସ୍ୟଚିତ୍ତ୍ଵଥ କାଲସ୍ୟ ରାଜା ଦଶରଥଃ ସୁତମ୍ ॥ 17 ॥
ଭରତଂ କୈକୟୀପୁତ୍ର ମବ୍ରଵୀଦ୍ରଘୁନଂଦନଃ ।
ଅୟଂ କେକୟରାଜସ୍ୟ ପୁତ୍ରୋ ଵସତି ପୁତ୍ରକ ॥ 18 ॥
ତ୍ଵାଂ ନେତୁମାଗତୋ ଵୀର ୟୁଧାଜିନ୍ମାତୁଲସ୍ତଵ ।
ପ୍ରାର୍ଥିତସ୍ତେନ ଧର୍ମଜ୍ଞ ମିଧିଲାୟାମହଂ ତଥା ॥ 19 ॥
ଋଷିମଧ୍ୟେ ତୁ ତସ୍ୟ ତ୍ଵଂ ପ୍ରୀତିଂ କର୍ତୁମିହାର୍ହସି ।
ଶ୍ରୁତ୍ଵା ଦଶରଥସ୍ୟୈତଦ୍ଭରତଃ କୈକୟୀସୁତଃ ॥ 20 ॥
ଅଭିଵାଦ୍ୟ ଗୁରୁଂ ରାମଂ ପରିଷ୍ଵଜ୍ୟ ଚ ଲକ୍ଷ୍ମଣମ୍ ।
ଗମନାୟାଭିଚକ୍ରାମ ଶତ୍ରୁଘ୍ନସହିତସ୍ତଦା ॥ 21 ॥
ଆପୃଚ୍ଛ୍ୟ ପିତରଂ ଶୂରୋ ରାମଂ ଚାକ୍ଲିଷ୍ଟକାରିଣମ୍ ।
ମାତୃଶ୍ଚାପି ନରଶ୍ରେଷ୍ଠ ଶ୍ଶତ୍ରୁଘ୍ନସହିତୋ ୟୟୌ ॥ 22 ॥
ଗତେ ତୁ ଭରତେ ରାମୋ ଲକ୍ଷ୍ମଣଶ୍ଚ ମହାବଲଃ ।
ପିତରଂ ଦେଵସଂଂକାଶଂ ପୂଜୟାମାସତୁସ୍ତଦା ॥ 23 ॥
ପିତୁରାଜ୍ଞାଂ ପୁରସ୍କୃତ୍ୟ ପୌରକାର୍ୟାଣି ସର୍ଵଶଃ ।
ଚକାର ରାମୋ ଧର୍ମାତ୍ମା ପ୍ରିୟାଣି ଚ ହିତାନି ଚ ॥ 24 ॥
ମାତୃଭ୍ୟୋ ମାତୃକାର୍ୟାଣି କୃତ୍ଵା ପରମୟଂତ୍ରିତଃ ।
ଗୁରୂଣାଂ ଗୁରୁକାର୍ୟାଣି କାଲେ କାଲେଽନ୍ଵଵୈକ୍ଷତ ॥ 25 ॥
ଏଵଂ ଦଶରଥଃ ପ୍ରୀତୋ ବ୍ରାହ୍ମଣା ନୈଗମାସ୍ତଥା ।
ରାମସ୍ୟ ଶୀଲଵୃତ୍ତେନ ସର୍ଵେ ଵିଷୟଵାସିନଃ ॥ 26 ॥
ତେଷାମତିୟଶା ଲୋକେ ରାମ ସ୍ସତ୍ୟପରାକ୍ରମଃ ।
ସ୍ଵୟଂଭୂରିଵ ଭୂତାନାଂ ବଭୂଵ ଗୁଣଵତ୍ତରଃ ॥ 27 ॥
ରାମସ୍ତୁ ସୀତୟା ସାର୍ଧଂ ଵିଜହାର ବହୂନୃତୂନ୍ ।
ମନସ୍ସ୍ଵୀ ତଦ୍ଗତସ୍ତସ୍ୟାଃ ନିତ୍ୟଂ ହୃଦି ସମର୍ପିତଃ ॥ 28 ॥
ପ୍ରିୟା ତୁ ସୀତା ରାମସ୍ୟ ଦାରାଃ ପିତୃକୃତା ଇତି ।
ଗୁଣାଦ୍ରୂପଗୁଣାଚ୍ଚାପି ପ୍ରୀତିର୍ଭୂୟୋଽଭ୍ୟଵର୍ଧତ ॥ 29 ॥
ତସ୍ୟାଶ୍ଚ ଭର୍ତା ଦ୍ଵିଗୁଣଂ ହୃଦୟେ ପରିଵର୍ତତେ ।
ଅଂତର୍ଜାତମପି ଵ୍ୟକ୍ତମାଖ୍ୟାତି ହୃଦୟଂ ହୃଦା ॥ 30 ॥
ତସ୍ୟ ଭୂୟୋ ଵିଶେଷେଣ ମୈଥିଲୀ ଜନକାତ୍ମଜା ।
ଦେଵତାଭି ସ୍ସମା ରୂପେ ସୀତା ଶ୍ରୀରିଵ ରୂପିଣୀ ॥ 31 ॥
ତୟା ସ ରାଜର୍ଷିସୁତୋଽଭିରାମୟା ସମେୟିଵାନୁତ୍ତମରାଜକନ୍ୟୟା ।
ଅତୀଵ ରାମ ଶ୍ଶୁଶୁଭେଽଭିରାମୟା ।
ଵିଭୁ ଶ୍ଶ୍ରିୟା ଵିଷ୍ଣୁରିଵାମରେଶ୍ଵରଃ ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ସପ୍ତସପ୍ତତିତମସ୍ସର୍ଗଃ ॥
