ශ්රීමද්වාල්මීකීය රාමායණේ බාලකාංඩම් ।
අථ සප්තසප්තතිතමස්සර්ගඃ ।
ගතේ රාමේ ප්රශාංතාත්මා රාමෝ දාශරථිර්ධනුඃ ।
වරුණායාප්රමේයාය දදෞ හස්තේ සසායකම් ॥ 1 ॥
අභිවාද්ය තතෝ රාමෝ වසිෂ්ඨප්රමුඛානෘෂීන් ।
පිතරං විහ්වලං දෘෂ්ට්වා ප්රෝවාච රඝුනංදනඃ ॥ 2 ॥
ජාමදග්න්යෝ ගතෝ රාමඃ ප්රයාතු චතුරංගිණී ।
අයෝධ්යාභිමුඛී සේනා ත්වයා නාථේන පාලිතා ॥ 3 ॥
සංදිශස්ව මහාරාජ සේනාං ත්වච්ඡාසනේ ස්ථිතාම් ।
ශාසනං කාංක්ෂතේ සේනා චාතකාලිර්ජලං යථා ॥ 4 ॥
රාමස්ය වචනං ශ්රුත්වා රාජා දශරථ ස්සුතම් ।
බාහුභ්යාං සංපරිෂ්වජ්ය මූර්ධ්නි චාඝ්රාය රාඝවම් ॥ 5 ॥
ගතෝ රාම ඉති ශ්රුත්වා හෘෂ්ටඃ ප්රමුදිතෝ නෘපඃ ।
පුනර්ජාතං තදා මේනේ පුත්රමාත්මානමේව ච ॥ 6 ॥
චෝදයාමාස තාං සේනාං ජගාමාශු තතඃ පුරීම් ।
පතාකාධ්වජිනීං රම්යාං තූර්යෝද්ඝුෂ්ටනිනාදිතාම් ॥ 7 ॥
සික්තරාජ පථාං රම්යාං ප්රකීර්ණකුසුමෝත්කරාම් ।
රාජප්රවේශසුමුඛෛඃ පෞරෛර්මංගලවාදිභිඃ ॥ 8 ॥
සංපූර්ණාං ප්රාවිශද්රාජා ජනෞඝෛස්සමලංකෘතාම් ।
පෞරෛඃ ප්රත්යුද්ගතෝ දූරං ද්විජෛශ්ච පුරවාසිභිඃ ।
පුත්රෛරනුගත ශ්ශ්රීමාන් ශ්රීමද්භිශ්ච මහායශාඃ ॥ 9 ॥
ප්රවිවේශ ගෘහං රාජා හිමවත්සදෘශං පුනඃ ।
නනංද සජනෝ රාජා ගෘහේ කාමෛ ස්සුපූජිතඃ ॥ 10 ॥
කෞසල්යා ච සුමිත්රා ච කෛකේයී ච සුමධ්යමා ।
වධූප්රතිග්රහේ යුක්තා යාශ්චාන්යා රාජයෝෂිතඃ ॥ 11 ॥
තතස්සීතාං මහාභාගාමූර්මිලාං ච යශස්විනීම් ।
කුශධ්වජසුතේ චෝභේ ජගෘහුර්නෘපපත්නයඃ ॥ 12 ॥
මංගලාලංභනෛශ්චාපි ශෝභිතාඃ ක්ෂෞමවාසසඃ ।
දේවතායතනාන්යාශු සර්වාස්තාඃ ප්රත්යපූජයන් ॥ 13 ॥
අභිවාද්යාභිවාද්යාංශ්ච සර්වා රාජසුතාස්තදා ।
ස්වං ස්වං ගෘහමථාසාද්ය කුබේරභවනෝපමම් ॥ 14 ॥
ගෝභිර්ධනෛශ්ච ධාන්යෛශ්ච තර්පයිත්වා ද්විජෝත්තමාන් ।
රේමිරේ මුදිතාඃ සර්වා භර්තෘභිඃ සහිතා රහඃ ॥ 15 ॥
කුමාරාශ්ච මහාත්මානෝ වීර්යේණාප්රතිමා භුවි ।
කෘතදාරාඃ කෘතාස්ත්රාශ්ච සධනාඃ සසුහෘජ්ජනාඃ ॥ 16 ॥
ශුශ්රූෂමාණාඃ පිතරං වර්තයංති නරර්ෂභාඃ ।
කස්යචිත්ත්වථ කාලස්ය රාජා දශරථඃ සුතම් ॥ 17 ॥
භරතං කෛකයීපුත්ර මබ්රවීද්රඝුනංදනඃ ।
අයං කේකයරාජස්ය පුත්රෝ වසති පුත්රක ॥ 18 ॥
ත්වාං නේතුමාගතෝ වීර යුධාජින්මාතුලස්තව ।
ප්රාර්ථිතස්තේන ධර්මජ්ඤ මිධිලායාමහං තථා ॥ 19 ॥
ඍෂිමධ්යේ තු තස්ය ත්වං ප්රීතිං කර්තුමිහාර්හසි ।
ශ්රුත්වා දශරථස්යෛතද්භරතඃ කෛකයීසුතඃ ॥ 20 ॥
අභිවාද්ය ගුරුං රාමං පරිෂ්වජ්ය ච ලක්ෂ්මණම් ।
ගමනායාභිචක්රාම ශත්රුඝ්නසහිතස්තදා ॥ 21 ॥
ආපෘච්ඡ්ය පිතරං ශූරෝ රාමං චාක්ලිෂ්ටකාරිණම් ।
මාතෘශ්චාපි නරශ්රේෂ්ඨ ශ්ශත්රුඝ්නසහිතෝ යයෞ ॥ 22 ॥
ගතේ තු භරතේ රාමෝ ලක්ෂ්මණශ්ච මහාබලඃ ।
පිතරං දේවසංංකාශං පූජයාමාසතුස්තදා ॥ 23 ॥
පිතුරාජ්ඤාං පුරස්කෘත්ය පෞරකාර්යාණි සර්වශඃ ।
චකාර රාමෝ ධර්මාත්මා ප්රියාණි ච හිතානි ච ॥ 24 ॥
මාතෘභ්යෝ මාතෘකාර්යාණි කෘත්වා පරමයංත්රිතඃ ।
ගුරූණාං ගුරුකාර්යාණි කාලේ කාලේऽන්වවෛක්ෂත ॥ 25 ॥
ඒවං දශරථඃ ප්රීතෝ බ්රාහ්මණා නෛගමාස්තථා ।
රාමස්ය ශීලවෘත්තේන සර්වේ විෂයවාසිනඃ ॥ 26 ॥
තේෂාමතියශා ලෝකේ රාම ස්සත්යපරාක්රමඃ ।
ස්වයංභූරිව භූතානාං බභූව ගුණවත්තරඃ ॥ 27 ॥
රාමස්තු සීතයා සාර්ධං විජහාර බහූනෘතූන් ।
මනස්ස්වී තද්ගතස්තස්යාඃ නිත්යං හෘදි සමර්පිතඃ ॥ 28 ॥
ප්රියා තු සීතා රාමස්ය දාරාඃ පිතෘකෘතා ඉති ।
ගුණාද්රූපගුණාච්චාපි ප්රීතිර්භූයෝऽභ්යවර්ධත ॥ 29 ॥
තස්යාශ්ච භර්තා ද්විගුණං හෘදයේ පරිවර්තතේ ।
අංතර්ජාතමපි ව්යක්තමාඛ්යාති හෘදයං හෘදා ॥ 30 ॥
තස්ය භූයෝ විශේෂේණ මෛථිලී ජනකාත්මජා ।
දේවතාභි ස්සමා රූපේ සීතා ශ්රීරිව රූපිණී ॥ 31 ॥
තයා ස රාජර්ෂිසුතෝऽභිරාමයා සමේයිවානුත්තමරාජකන්යයා ।
අතීව රාම ශ්ශුශුභේऽභිරාමයා ।
විභු ශ්ශ්රියා විෂ්ණුරිවාමරේශ්වරඃ ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ සප්තසප්තතිතමස්සර්ගඃ ॥
