શ્રીમદ્વાલ્મીકીય રામાયણે બાલકાંડમ્ ।
અથ સપ્તસપ્તતિતમસ્સર્ગઃ ।
ગતે રામે પ્રશાંતાત્મા રામો દાશરથિર્ધનુઃ ।
વરુણાયાપ્રમેયાય દદૌ હસ્તે સસાયકમ્ ॥ 1 ॥
અભિવાદ્ય તતો રામો વસિષ્ઠપ્રમુખાનૃષીન્ ।
પિતરં વિહ્વલં દૃષ્ટ્વા પ્રોવાચ રઘુનંદનઃ ॥ 2 ॥
જામદગ્ન્યો ગતો રામઃ પ્રયાતુ ચતુરંગિણી ।
અયોધ્યાભિમુખી સેના ત્વયા નાથેન પાલિતા ॥ 3 ॥
સંદિશસ્વ મહારાજ સેનાં ત્વચ્છાસને સ્થિતામ્ ।
શાસનં કાંક્ષતે સેના ચાતકાલિર્જલં યથા ॥ 4 ॥
રામસ્ય વચનં શ્રુત્વા રાજા દશરથ સ્સુતમ્ ।
બાહુભ્યાં સંપરિષ્વજ્ય મૂર્ધ્નિ ચાઘ્રાય રાઘવમ્ ॥ 5 ॥
ગતો રામ ઇતિ શ્રુત્વા હૃષ્ટઃ પ્રમુદિતો નૃપઃ ।
પુનર્જાતં તદા મેને પુત્રમાત્માનમેવ ચ ॥ 6 ॥
ચોદયામાસ તાં સેનાં જગામાશુ તતઃ પુરીમ્ ।
પતાકાધ્વજિનીં રમ્યાં તૂર્યોદ્ઘુષ્ટનિનાદિતામ્ ॥ 7 ॥
સિક્તરાજ પથાં રમ્યાં પ્રકીર્ણકુસુમોત્કરામ્ ।
રાજપ્રવેશસુમુખૈઃ પૌરૈર્મંગલવાદિભિઃ ॥ 8 ॥
સંપૂર્ણાં પ્રાવિશદ્રાજા જનૌઘૈસ્સમલંકૃતામ્ ।
પૌરૈઃ પ્રત્યુદ્ગતો દૂરં દ્વિજૈશ્ચ પુરવાસિભિઃ ।
પુત્રૈરનુગત શ્શ્રીમાન્ શ્રીમદ્ભિશ્ચ મહાયશાઃ ॥ 9 ॥
પ્રવિવેશ ગૃહં રાજા હિમવત્સદૃશં પુનઃ ।
નનંદ સજનો રાજા ગૃહે કામૈ સ્સુપૂજિતઃ ॥ 10 ॥
કૌસલ્યા ચ સુમિત્રા ચ કૈકેયી ચ સુમધ્યમા ।
વધૂપ્રતિગ્રહે યુક્તા યાશ્ચાન્યા રાજયોષિતઃ ॥ 11 ॥
તતસ્સીતાં મહાભાગામૂર્મિલાં ચ યશસ્વિનીમ્ ।
કુશધ્વજસુતે ચોભે જગૃહુર્નૃપપત્નયઃ ॥ 12 ॥
મંગલાલંભનૈશ્ચાપિ શોભિતાઃ ક્ષૌમવાસસઃ ।
દેવતાયતનાન્યાશુ સર્વાસ્તાઃ પ્રત્યપૂજયન્ ॥ 13 ॥
અભિવાદ્યાભિવાદ્યાંશ્ચ સર્વા રાજસુતાસ્તદા ।
સ્વં સ્વં ગૃહમથાસાદ્ય કુબેરભવનોપમમ્ ॥ 14 ॥
ગોભિર્ધનૈશ્ચ ધાન્યૈશ્ચ તર્પયિત્વા દ્વિજોત્તમાન્ ।
રેમિરે મુદિતાઃ સર્વા ભર્તૃભિઃ સહિતા રહઃ ॥ 15 ॥
કુમારાશ્ચ મહાત્માનો વીર્યેણાપ્રતિમા ભુવિ ।
કૃતદારાઃ કૃતાસ્ત્રાશ્ચ સધનાઃ સસુહૃજ્જનાઃ ॥ 16 ॥
શુશ્રૂષમાણાઃ પિતરં વર્તયંતિ નરર્ષભાઃ ।
કસ્યચિત્ત્વથ કાલસ્ય રાજા દશરથઃ સુતમ્ ॥ 17 ॥
ભરતં કૈકયીપુત્ર મબ્રવીદ્રઘુનંદનઃ ।
અયં કેકયરાજસ્ય પુત્રો વસતિ પુત્રક ॥ 18 ॥
ત્વાં નેતુમાગતો વીર યુધાજિન્માતુલસ્તવ ।
પ્રાર્થિતસ્તેન ધર્મજ્ઞ મિધિલાયામહં તથા ॥ 19 ॥
ઋષિમધ્યે તુ તસ્ય ત્વં પ્રીતિં કર્તુમિહાર્હસિ ।
શ્રુત્વા દશરથસ્યૈતદ્ભરતઃ કૈકયીસુતઃ ॥ 20 ॥
અભિવાદ્ય ગુરું રામં પરિષ્વજ્ય ચ લક્ષ્મણમ્ ।
ગમનાયાભિચક્રામ શત્રુઘ્નસહિતસ્તદા ॥ 21 ॥
આપૃચ્છ્ય પિતરં શૂરો રામં ચાક્લિષ્ટકારિણમ્ ।
માતૃશ્ચાપિ નરશ્રેષ્ઠ શ્શત્રુઘ્નસહિતો યયૌ ॥ 22 ॥
ગતે તુ ભરતે રામો લક્ષ્મણશ્ચ મહાબલઃ ।
પિતરં દેવસંંકાશં પૂજયામાસતુસ્તદા ॥ 23 ॥
પિતુરાજ્ઞાં પુરસ્કૃત્ય પૌરકાર્યાણિ સર્વશઃ ।
ચકાર રામો ધર્માત્મા પ્રિયાણિ ચ હિતાનિ ચ ॥ 24 ॥
માતૃભ્યો માતૃકાર્યાણિ કૃત્વા પરમયંત્રિતઃ ।
ગુરૂણાં ગુરુકાર્યાણિ કાલે કાલેઽન્વવૈક્ષત ॥ 25 ॥
એવં દશરથઃ પ્રીતો બ્રાહ્મણા નૈગમાસ્તથા ।
રામસ્ય શીલવૃત્તેન સર્વે વિષયવાસિનઃ ॥ 26 ॥
તેષામતિયશા લોકે રામ સ્સત્યપરાક્રમઃ ।
સ્વયંભૂરિવ ભૂતાનાં બભૂવ ગુણવત્તરઃ ॥ 27 ॥
રામસ્તુ સીતયા સાર્ધં વિજહાર બહૂનૃતૂન્ ।
મનસ્સ્વી તદ્ગતસ્તસ્યાઃ નિત્યં હૃદિ સમર્પિતઃ ॥ 28 ॥
પ્રિયા તુ સીતા રામસ્ય દારાઃ પિતૃકૃતા ઇતિ ।
ગુણાદ્રૂપગુણાચ્ચાપિ પ્રીતિર્ભૂયોઽભ્યવર્ધત ॥ 29 ॥
તસ્યાશ્ચ ભર્તા દ્વિગુણં હૃદયે પરિવર્તતે ।
અંતર્જાતમપિ વ્યક્તમાખ્યાતિ હૃદયં હૃદા ॥ 30 ॥
તસ્ય ભૂયો વિશેષેણ મૈથિલી જનકાત્મજા ।
દેવતાભિ સ્સમા રૂપે સીતા શ્રીરિવ રૂપિણી ॥ 31 ॥
તયા સ રાજર્ષિસુતોઽભિરામયા સમેયિવાનુત્તમરાજકન્યયા ।
અતીવ રામ શ્શુશુભેઽભિરામયા ।
વિભુ શ્શ્રિયા વિષ્ણુરિવામરેશ્વરઃ ॥ 32 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે સપ્તસપ્તતિતમસ્સર્ગઃ ॥
