śrīmadvālmīkīya rāmāyaṇē bālakāṇḍam ।
atha saptasaptatitamassargaḥ ।
gatē rāmē praśāntātmā rāmō dāśarathirdhanuḥ ।
varuṇāyāpramēyāya dadau hastē sasāyakam ॥ 1 ॥
abhivādya tatō rāmō vasiṣṭhapramukhānṛṣīn ।
pitaraṃ vihvalaṃ dṛṣṭvā prōvācha raghunandanaḥ ॥ 2 ॥
jāmadagnyō gatō rāmaḥ prayātu chaturaṅgiṇī ।
ayōdhyābhimukhī sēnā tvayā nāthēna pālitā ॥ 3 ॥
sandiśasva mahārāja sēnāṃ tvachChāsanē sthitām ।
śāsanaṃ kāṅkṣatē sēnā chātakālirjalaṃ yathā ॥ 4 ॥
rāmasya vachanaṃ śrutvā rājā daśaratha ssutam ।
bāhubhyāṃ sampariṣvajya mūrdhni chāghrāya rāghavam ॥ 5 ॥
gatō rāma iti śrutvā hṛṣṭaḥ pramuditō nṛpaḥ ।
punarjātaṃ tadā mēnē putramātmānamēva cha ॥ 6 ॥
chōdayāmāsa tāṃ sēnāṃ jagāmāśu tataḥ purīm ।
patākādhvajinīṃ ramyāṃ tūryōdghuṣṭanināditām ॥ 7 ॥
siktarāja pathāṃ ramyāṃ prakīrṇakusumōtkarām ।
rājapravēśasumukhaiḥ paurairmaṅgalavādibhiḥ ॥ 8 ॥
sampūrṇāṃ prāviśadrājā janaughaissamalaṅkṛtām ।
pauraiḥ pratyudgatō dūraṃ dvijaiścha puravāsibhiḥ ।
putrairanugata śśrīmān śrīmadbhiścha mahāyaśāḥ ॥ 9 ॥
pravivēśa gṛhaṃ rājā himavatsadṛśaṃ punaḥ ।
nananda sajanō rājā gṛhē kāmai ssupūjitaḥ ॥ 10 ॥
kausalyā cha sumitrā cha kaikēyī cha sumadhyamā ।
vadhūpratigrahē yuktā yāśchānyā rājayōṣitaḥ ॥ 11 ॥
tatassītāṃ mahābhāgāmūrmilāṃ cha yaśasvinīm ।
kuśadhvajasutē chōbhē jagṛhurnṛpapatnayaḥ ॥ 12 ॥
maṅgalālambhanaiśchāpi śōbhitāḥ kṣaumavāsasaḥ ।
dēvatāyatanānyāśu sarvāstāḥ pratyapūjayan ॥ 13 ॥
abhivādyābhivādyāṃścha sarvā rājasutāstadā ।
svaṃ svaṃ gṛhamathāsādya kubērabhavanōpamam ॥ 14 ॥
gōbhirdhanaiścha dhānyaiścha tarpayitvā dvijōttamān ।
rēmirē muditāḥ sarvā bhartṛbhiḥ sahitā rahaḥ ॥ 15 ॥
kumārāścha mahātmānō vīryēṇāpratimā bhuvi ।
kṛtadārāḥ kṛtāstrāścha sadhanāḥ sasuhṛjjanāḥ ॥ 16 ॥
śuśrūṣamāṇāḥ pitaraṃ vartayanti nararṣabhāḥ ।
kasyachittvatha kālasya rājā daśarathaḥ sutam ॥ 17 ॥
bharataṃ kaikayīputra mabravīdraghunandanaḥ ।
ayaṃ kēkayarājasya putrō vasati putraka ॥ 18 ॥
tvāṃ nētumāgatō vīra yudhājinmātulastava ।
prārthitastēna dharmajña midhilāyāmahaṃ tathā ॥ 19 ॥
ṛṣimadhyē tu tasya tvaṃ prītiṃ kartumihārhasi ।
śrutvā daśarathasyaitadbharataḥ kaikayīsutaḥ ॥ 20 ॥
abhivādya guruṃ rāmaṃ pariṣvajya cha lakṣmaṇam ।
gamanāyābhichakrāma śatrughnasahitastadā ॥ 21 ॥
āpṛchChya pitaraṃ śūrō rāmaṃ chākliṣṭakāriṇam ।
mātṛśchāpi naraśrēṣṭha śśatrughnasahitō yayau ॥ 22 ॥
gatē tu bharatē rāmō lakṣmaṇaścha mahābalaḥ ।
pitaraṃ dēvasaṃṅkāśaṃ pūjayāmāsatustadā ॥ 23 ॥
piturājñāṃ puraskṛtya paurakāryāṇi sarvaśaḥ ।
chakāra rāmō dharmātmā priyāṇi cha hitāni cha ॥ 24 ॥
mātṛbhyō mātṛkāryāṇi kṛtvā paramayantritaḥ ।
gurūṇāṃ gurukāryāṇi kālē kālē'nvavaikṣata ॥ 25 ॥
ēvaṃ daśarathaḥ prītō brāhmaṇā naigamāstathā ।
rāmasya śīlavṛttēna sarvē viṣayavāsinaḥ ॥ 26 ॥
tēṣāmatiyaśā lōkē rāma ssatyaparākramaḥ ।
svayambhūriva bhūtānāṃ babhūva guṇavattaraḥ ॥ 27 ॥
rāmastu sītayā sārdhaṃ vijahāra bahūnṛtūn ।
manassvī tadgatastasyāḥ nityaṃ hṛdi samarpitaḥ ॥ 28 ॥
priyā tu sītā rāmasya dārāḥ pitṛkṛtā iti ।
guṇādrūpaguṇāchchāpi prītirbhūyō'bhyavardhata ॥ 29 ॥
tasyāścha bhartā dviguṇaṃ hṛdayē parivartatē ।
antarjātamapi vyaktamākhyāti hṛdayaṃ hṛdā ॥ 30 ॥
tasya bhūyō viśēṣēṇa maithilī janakātmajā ।
dēvatābhi ssamā rūpē sītā śrīriva rūpiṇī ॥ 31 ॥
tayā sa rājarṣisutō'bhirāmayā samēyivānuttamarājakanyayā ।
atīva rāma śśuśubhē'bhirāmayā ।
vibhu śśriyā viṣṇurivāmarēśvaraḥ ॥ 32 ॥
ityārṣē śrīmadrāmāyaṇē vālmīkīya ādikāvyē bālakāṇḍē saptasaptatitamassargaḥ ॥
