ശ്രീമദ്വാല്മീകീയ രാമായണേ ബാലകാംഡമ് ।
അഥ സപ്തസപ്തതിതമസ്സര്ഗഃ ।
ഗതേ രാമേ പ്രശാംതാത്മാ രാമോ ദാശരഥിര്ധനുഃ ।
വരുണായാപ്രമേയായ ദദൌ ഹസ്തേ സസായകമ് ॥ 1 ॥
അഭിവാദ്യ തതോ രാമോ വസിഷ്ഠപ്രമുഖാനൃഷീന് ।
പിതരം വിഹ്വലം ദൃഷ്ട്വാ പ്രോവാച രഘുനംദനഃ ॥ 2 ॥
ജാമദഗ്ന്യോ ഗതോ രാമഃ പ്രയാതു ചതുരംഗിണീ ।
അയോധ്യാഭിമുഖീ സേനാ ത്വയാ നാഥേന പാലിതാ ॥ 3 ॥
സംദിശസ്വ മഹാരാജ സേനാം ത്വച്ഛാസനേ സ്ഥിതാമ് ।
ശാസനം കാംക്ഷതേ സേനാ ചാതകാലിര്ജലം യഥാ ॥ 4 ॥
രാമസ്യ വചനം ശ്രുത്വാ രാജാ ദശരഥ സ്സുതമ് ।
ബാഹുഭ്യാം സംപരിഷ്വജ്യ മൂര്ധ്നി ചാഘ്രായ രാഘവമ് ॥ 5 ॥
ഗതോ രാമ ഇതി ശ്രുത്വാ ഹൃഷ്ടഃ പ്രമുദിതോ നൃപഃ ।
പുനര്ജാതം തദാ മേനേ പുത്രമാത്മാനമേവ ച ॥ 6 ॥
ചോദയാമാസ താം സേനാം ജഗാമാശു തതഃ പുരീമ് ।
പതാകാധ്വജിനീം രമ്യാം തൂര്യോദ്ഘുഷ്ടനിനാദിതാമ് ॥ 7 ॥
സിക്തരാജ പഥാം രമ്യാം പ്രകീര്ണകുസുമോത്കരാമ് ।
രാജപ്രവേശസുമുഖൈഃ പൌരൈര്മംഗലവാദിഭിഃ ॥ 8 ॥
സംപൂര്ണാം പ്രാവിശദ്രാജാ ജനൌഘൈസ്സമലംകൃതാമ് ।
പൌരൈഃ പ്രത്യുദ്ഗതോ ദൂരം ദ്വിജൈശ്ച പുരവാസിഭിഃ ।
പുത്രൈരനുഗത ശ്ശ്രീമാന് ശ്രീമദ്ഭിശ്ച മഹായശാഃ ॥ 9 ॥
പ്രവിവേശ ഗൃഹം രാജാ ഹിമവത്സദൃശം പുനഃ ।
നനംദ സജനോ രാജാ ഗൃഹേ കാമൈ സ്സുപൂജിതഃ ॥ 10 ॥
കൌസല്യാ ച സുമിത്രാ ച കൈകേയീ ച സുമധ്യമാ ।
വധൂപ്രതിഗ്രഹേ യുക്താ യാശ്ചാന്യാ രാജയോഷിതഃ ॥ 11 ॥
തതസ്സീതാം മഹാഭാഗാമൂര്മിലാം ച യശസ്വിനീമ് ।
കുശധ്വജസുതേ ചോഭേ ജഗൃഹുര്നൃപപത്നയഃ ॥ 12 ॥
മംഗലാലംഭനൈശ്ചാപി ശോഭിതാഃ ക്ഷൌമവാസസഃ ।
ദേവതായതനാന്യാശു സർവാസ്താഃ പ്രത്യപൂജയന് ॥ 13 ॥
അഭിവാദ്യാഭിവാദ്യാംശ്ച സർവാ രാജസുതാസ്തദാ ।
സ്വം സ്വം ഗൃഹമഥാസാദ്യ കുബേരഭവനോപമമ് ॥ 14 ॥
ഗോഭിര്ധനൈശ്ച ധാന്യൈശ്ച തര്പയിത്വാ ദ്വിജോത്തമാന് ।
രേമിരേ മുദിതാഃ സർവാ ഭര്തൃഭിഃ സഹിതാ രഹഃ ॥ 15 ॥
കുമാരാശ്ച മഹാത്മാനോ വീര്യേണാപ്രതിമാ ഭുവി ।
കൃതദാരാഃ കൃതാസ്ത്രാശ്ച സധനാഃ സസുഹൃജ്ജനാഃ ॥ 16 ॥
ശുശ്രൂഷമാണാഃ പിതരം വര്തയംതി നരര്ഷഭാഃ ।
കസ്യചിത്ത്വഥ കാലസ്യ രാജാ ദശരഥഃ സുതമ് ॥ 17 ॥
ഭരതം കൈകയീപുത്ര മബ്രവീദ്രഘുനംദനഃ ।
അയം കേകയരാജസ്യ പുത്രോ വസതി പുത്രക ॥ 18 ॥
ത്വാം നേതുമാഗതോ വീര യുധാജിന്മാതുലസ്തവ ।
പ്രാര്ഥിതസ്തേന ധര്മജ്ഞ മിധിലായാമഹം തഥാ ॥ 19 ॥
ഋഷിമധ്യേ തു തസ്യ ത്വം പ്രീതിം കര്തുമിഹാര്ഹസി ।
ശ്രുത്വാ ദശരഥസ്യൈതദ്ഭരതഃ കൈകയീസുതഃ ॥ 20 ॥
അഭിവാദ്യ ഗുരും രാമം പരിഷ്വജ്യ ച ലക്ഷ്മണമ് ।
ഗമനായാഭിചക്രാമ ശത്രുഘ്നസഹിതസ്തദാ ॥ 21 ॥
ആപൃച്ഛ്യ പിതരം ശൂരോ രാമം ചാക്ലിഷ്ടകാരിണമ് ।
മാതൃശ്ചാപി നരശ്രേഷ്ഠ ശ്ശത്രുഘ്നസഹിതോ യയൌ ॥ 22 ॥
ഗതേ തു ഭരതേ രാമോ ലക്ഷ്മണശ്ച മഹാബലഃ ।
പിതരം ദേവസംംകാശം പൂജയാമാസതുസ്തദാ ॥ 23 ॥
പിതുരാജ്ഞാം പുരസ്കൃത്യ പൌരകാര്യാണി സർവശഃ ।
ചകാര രാമോ ധര്മാത്മാ പ്രിയാണി ച ഹിതാനി ച ॥ 24 ॥
മാതൃഭ്യോ മാതൃകാര്യാണി കൃത്വാ പരമയംത്രിതഃ ।
ഗുരൂണാം ഗുരുകാര്യാണി കാലേ കാലേഽന്വവൈക്ഷത ॥ 25 ॥
ഏവം ദശരഥഃ പ്രീതോ ബ്രാഹ്മണാ നൈഗമാസ്തഥാ ।
രാമസ്യ ശീലവൃത്തേന സർവേ വിഷയവാസിനഃ ॥ 26 ॥
തേഷാമതിയശാ ലോകേ രാമ സ്സത്യപരാക്രമഃ ।
സ്വയംഭൂരിവ ഭൂതാനാം ബഭൂവ ഗുണവത്തരഃ ॥ 27 ॥
രാമസ്തു സീതയാ സാര്ധം വിജഹാര ബഹൂനൃതൂന് ।
മനസ്സ്വീ തദ്ഗതസ്തസ്യാഃ നിത്യം ഹൃദി സമര്പിതഃ ॥ 28 ॥
പ്രിയാ തു സീതാ രാമസ്യ ദാരാഃ പിതൃകൃതാ ഇതി ।
ഗുണാദ്രൂപഗുണാച്ചാപി പ്രീതിര്ഭൂയോഽഭ്യവര്ധത ॥ 29 ॥
തസ്യാശ്ച ഭര്താ ദ്വിഗുണം ഹൃദയേ പരിവര്തതേ ।
അംതര്ജാതമപി വ്യക്തമാഖ്യാതി ഹൃദയം ഹൃദാ ॥ 30 ॥
തസ്യ ഭൂയോ വിശേഷേണ മൈഥിലീ ജനകാത്മജാ ।
ദേവതാഭി സ്സമാ രൂപേ സീതാ ശ്രീരിവ രൂപിണീ ॥ 31 ॥
തയാ സ രാജര്ഷിസുതോഽഭിരാമയാ സമേയിവാനുത്തമരാജകന്യയാ ।
അതീവ രാമ ശ്ശുശുഭേഽഭിരാമയാ ।
വിഭു ശ്ശ്രിയാ വിഷ്ണുരിവാമരേശ്വരഃ ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ സപ്തസപ്തതിതമസ്സര്ഗഃ ॥
