ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටෂෂ්ටිතමස්සර්ගඃ ।
තේෂාං හි වචනං ශ්රුත්වා වසිෂ්ඨඃ ප්රත්යුවාච හ ।
මිත්රාමාත්යගණාන්සර්වාන්බ්රාහ්මණාංස්තානිදං වචඃ ॥ 1 ॥
යදසෞ මාතුලකුලේ දත්තරාජ්යං පරං සුඛී ।
භරතෝ වසති භ්රාත්රා ශත්රුඝ්නේන සමන්විතඃ ॥ 2 ॥
තච්ඡීඝ්රං ජවනා දූතා ගච්ඡංතු ත්වරිතෛර්හයෛඃ ।
ආනේතුං භ්රාතරෞ වීරෞ කිං සමීක්ෂාමහේ වයම් ॥ 3 ॥
ගච්ඡංත්විති තත ස්සර්වේ වසිෂ්ඨං වාක්යමබ්රුවන් ।
තේෂාං තද්වචනං ශ්රූත්වා වසිෂ්ඨෝ වාක්යමබ්රවීත් ॥ 4 ॥
ඒහි සිද්ධාර්ථ විජය ජයංතාශෝක නංදන ।
ශ්රූයතාමිති කර්තව්යං සර්වානේව බ්රවීමි වඃ ॥ 5 ॥
පුරං රාජගෘහං ගත්වා ශීඝ්රං ශීඝ්රජවෛ ර්හයෛඃ ।
ත්යක්තශෝකෛරිදං වාච්ය ශ්ශාසනාද්භරතෝ මම ॥ 6 ॥
පුරෝහිත ස්ත්වාං කුශලං ප්රාහ සර්වේ ච මංත්රිණඃ ।
ත්වරමාණශ්ච නිර්යාහි කෘත්යමාත්යයිකං ත්වයා ॥ 7 ॥
මා චාස්මෛ ප්රෝෂිතං රාමං මා චාස්මෛ පිතරං මෘතම් ।
භවංත ශ්ශංසිෂුර්ගත්වා රාඝවාණාමිමං ක්ෂයම් ॥ 8 ॥
කෞශේයානි ච වස්ත්රාණි භූෂණානි වරාණි ච ।
ක්ෂිප්රමාදය රාජ්ඤශ්ච භරතස්ය ච ගච්ඡත ॥ 9 ॥
දත්තපථ්යශනා දූතා ජග්මුස්ස්වං ස්වං නිවේශනම් ।
කේකයාං ස්තේ ගමිෂ්යංතෝ හයානාරුහ්ය සංමතාන් ॥ 10 ॥
තතඃ ප්රාස්ථානිකං කෘත්වා කාර්යශේෂමනංතරම් ।
වසිෂ්ඨේනාභ්යනුජ්ඤාතා දූතා ස්සංත්වරිතා යයුඃ ॥ 11 ॥
න්යංතේනාපරතාලස්ය ප්රලංබස්යෝත්තරං ප්රති ।
නිෂේවමාණා ස්තේ ජග්මුර්නදීං මධ්යේන මාලිනීම් ॥ 12 ॥
තේ හස්තිනාපුරේ ගංගාං තීර්ත්වා ප්රත්යඞ්මුඛා යයුඃ ।
පාංචාලදේශමාසාද්ය මධ්යේන කුරුජාංගලම් ॥ 13 ॥
සරාංසි ච සුපූර්ණානි නදීශ්ච විමලෝදකාඃ ।
නිරීක්ෂමාණා ස්තේ ජග්මුර්දූතාඃ කාර්යවශාද්ද්රුතම් ॥ 14 ॥
තේ ප්රසන්නෝදකාං දිව්යාං නානාවිහගසේවිතාම් ।
උපාතිජග්මුර්වේගේන ශරදංඩාං ජනාකුලාම් ॥ 15 ॥
නිකූලවෘක්ෂමාසාද්ය දිව්යං සත්යෝපයාචනම් ।
අභිගම්යාභිවාද්යං තං කුලිංගාං ප්රාවිශන්පුරීම් ॥ 16 ॥
ආභිකාලං තතඃ ප්රාප්ය තේ බෝධිභවනාච්ච්යුතාම් ।
පිතෘපෛතාමහීං පුණ්යාං තේරුරික්ෂුමතීං නදීම් ॥ 17 ॥
අවේක්ෂ්යාංජලිපානාංශ්ච බ්රාහ්මණාන්වේදපාරගාන් ।
යයුර්මධ්යේන බාහ්ලීකාන් සුදාමානං ච පර්වතම් ॥ 18 ॥
විෂ්ණෝඃ පදං ප්රේක්ෂමාණා විපාශාංචාපි ශාල්මලීම් ।
නදීර්වාපී ස්තටාකානි පල්වලානි සරාංසි ච ॥ 19 ॥
පශ්යංතෝ විවිධාංශ්චාපි සිංහාව්යාඝ්රමෘග ද්විපාන් ।
යයුඃ පථාऽතිමහතා ශාසනං භර්තුරීප්සවඃ ॥ 20 ॥
තේ ශ්රාංතවාහනා දූතා විකෘෂ්ණේන පථා තතඃ ।
ගිරිව්රජං පුරවරං ශීඝ්රමාසේදුරංජසා ॥ 21 ॥
භර්තුඃ ප්රියාර්ථං කුලරක්ෂණාර්ථං භර්තුශ්ච වංශස්ය පරිග්රහාර්ථම් ।
අහේඩමානා ස්ත්වරයා ස්ම දූතා රාත්ර්යාංතු තේ තත්පුරමේව යාතාඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටෂෂ්ටිතමස්සර්ගඃ ॥
