ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ അഷ്ടഷഷ്ടിതമസ്സര്ഗഃ ।
തേഷാം ഹി വചനം ശ്രുത്വാ വസിഷ്ഠഃ പ്രത്യുവാച ഹ ।
മിത്രാമാത്യഗണാന്സർവാന്ബ്രാഹ്മണാംസ്താനിദം വചഃ ॥ 1 ॥
യദസൌ മാതുലകുലേ ദത്തരാജ്യം പരം സുഖീ ।
ഭരതോ വസതി ഭ്രാത്രാ ശത്രുഘ്നേന സമന്വിതഃ ॥ 2 ॥
തച്ഛീഘ്രം ജവനാ ദൂതാ ഗച്ഛംതു ത്വരിതൈര്ഹയൈഃ ।
ആനേതും ഭ്രാതരൌ വീരൌ കിം സമീക്ഷാമഹേ വയമ് ॥ 3 ॥
ഗച്ഛംത്വിതി തത സ്സർവേ വസിഷ്ഠം വാക്യമബ്രുവന് ।
തേഷാം തദ്വചനം ശ്രൂത്വാ വസിഷ്ഠോ വാക്യമബ്രവീത് ॥ 4 ॥
ഏഹി സിദ്ധാര്ഥ വിജയ ജയംതാശോക നംദന ।
ശ്രൂയതാമിതി കര്തവ്യം സർവാനേവ ബ്രവീമി വഃ ॥ 5 ॥
പുരം രാജഗൃഹം ഗത്വാ ശീഘ്രം ശീഘ്രജവൈ ര്ഹയൈഃ ।
ത്യക്തശോകൈരിദം വാച്യ ശ്ശാസനാദ്ഭരതോ മമ ॥ 6 ॥
പുരോഹിത സ്ത്വാം കുശലം പ്രാഹ സർവേ ച മംത്രിണഃ ।
ത്വരമാണശ്ച നിര്യാഹി കൃത്യമാത്യയികം ത്വയാ ॥ 7 ॥
മാ ചാസ്മൈ പ്രോഷിതം രാമം മാ ചാസ്മൈ പിതരം മൃതമ് ।
ഭവംത ശ്ശംസിഷുര്ഗത്വാ രാഘവാണാമിമം ക്ഷയമ് ॥ 8 ॥
കൌശേയാനി ച വസ്ത്രാണി ഭൂഷണാനി വരാണി ച ।
ക്ഷിപ്രമാദയ രാജ്ഞശ്ച ഭരതസ്യ ച ഗച്ഛത ॥ 9 ॥
ദത്തപഥ്യശനാ ദൂതാ ജഗ്മുസ്സ്വം സ്വം നിവേശനമ് ।
കേകയാം സ്തേ ഗമിഷ്യംതോ ഹയാനാരുഹ്യ സംമതാന് ॥ 10 ॥
തതഃ പ്രാസ്ഥാനികം കൃത്വാ കാര്യശേഷമനംതരമ് ।
വസിഷ്ഠേനാഭ്യനുജ്ഞാതാ ദൂതാ സ്സംത്വരിതാ യയുഃ ॥ 11 ॥
ന്യംതേനാപരതാലസ്യ പ്രലംബസ്യോത്തരം പ്രതി ।
നിഷേവമാണാ സ്തേ ജഗ്മുര്നദീം മധ്യേന മാലിനീമ് ॥ 12 ॥
തേ ഹസ്തിനാപുരേ ഗംഗാം തീര്ത്വാ പ്രത്യങ്മുഖാ യയുഃ ।
പാംചാലദേശമാസാദ്യ മധ്യേന കുരുജാംഗലമ് ॥ 13 ॥
സരാംസി ച സുപൂര്ണാനി നദീശ്ച വിമലോദകാഃ ।
നിരീക്ഷമാണാ സ്തേ ജഗ്മുര്ദൂതാഃ കാര്യവശാദ്ദ്രുതമ് ॥ 14 ॥
തേ പ്രസന്നോദകാം ദിവ്യാം നാനാവിഹഗസേവിതാമ് ।
ഉപാതിജഗ്മുർവേഗേന ശരദംഡാം ജനാകുലാമ് ॥ 15 ॥
നികൂലവൃക്ഷമാസാദ്യ ദിവ്യം സത്യോപയാചനമ് ।
അഭിഗമ്യാഭിവാദ്യം തം കുലിംഗാം പ്രാവിശന്പുരീമ് ॥ 16 ॥
ആഭികാലം തതഃ പ്രാപ്യ തേ ബോധിഭവനാച്ച്യുതാമ് ।
പിതൃപൈതാമഹീം പുണ്യാം തേരുരിക്ഷുമതീം നദീമ് ॥ 17 ॥
അവേക്ഷ്യാംജലിപാനാംശ്ച ബ്രാഹ്മണാന്വേദപാരഗാന് ।
യയുര്മധ്യേന ബാഹ്ലീകാന് സുദാമാനം ച പർവതമ് ॥ 18 ॥
വിഷ്ണോഃ പദം പ്രേക്ഷമാണാ വിപാശാംചാപി ശാല്മലീമ് ।
നദീർവാപീ സ്തടാകാനി പല്വലാനി സരാംസി ച ॥ 19 ॥
പശ്യംതോ വിവിധാംശ്ചാപി സിംഹാവ്യാഘ്രമൃഗ ദ്വിപാന് ।
യയുഃ പഥാഽതിമഹതാ ശാസനം ഭര്തുരീപ്സവഃ ॥ 20 ॥
തേ ശ്രാംതവാഹനാ ദൂതാ വികൃഷ്ണേന പഥാ തതഃ ।
ഗിരിവ്രജം പുരവരം ശീഘ്രമാസേദുരംജസാ ॥ 21 ॥
ഭര്തുഃ പ്രിയാര്ഥം കുലരക്ഷണാര്ഥം ഭര്തുശ്ച വംശസ്യ പരിഗ്രഹാര്ഥമ് ।
അഹേഡമാനാ സ്ത്വരയാ സ്മ ദൂതാ രാത്ര്യാംതു തേ തത്പുരമേവ യാതാഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ അഷ്ടഷഷ്ടിതമസ്സര്ഗഃ ॥
