શ્રીમદ્વાલ્મીકીય રામાયણે અયોધ્યાકાંડમ્ ।
અથ અષ્ટષષ્ટિતમસ્સર્ગઃ ।
તેષાં હિ વચનં શ્રુત્વા વસિષ્ઠઃ પ્રત્યુવાચ હ ।
મિત્રામાત્યગણાન્સર્વાન્બ્રાહ્મણાંસ્તાનિદં વચઃ ॥ 1 ॥
યદસૌ માતુલકુલે દત્તરાજ્યં પરં સુખી ।
ભરતો વસતિ ભ્રાત્રા શત્રુઘ્નેન સમન્વિતઃ ॥ 2 ॥
તચ્છીઘ્રં જવના દૂતા ગચ્છંતુ ત્વરિતૈર્હયૈઃ ।
આનેતું ભ્રાતરૌ વીરૌ કિં સમીક્ષામહે વયમ્ ॥ 3 ॥
ગચ્છંત્વિતિ તત સ્સર્વે વસિષ્ઠં વાક્યમબ્રુવન્ ।
તેષાં તદ્વચનં શ્રૂત્વા વસિષ્ઠો વાક્યમબ્રવીત્ ॥ 4 ॥
એહિ સિદ્ધાર્થ વિજય જયંતાશોક નંદન ।
શ્રૂયતામિતિ કર્તવ્યં સર્વાનેવ બ્રવીમિ વઃ ॥ 5 ॥
પુરં રાજગૃહં ગત્વા શીઘ્રં શીઘ્રજવૈ ર્હયૈઃ ।
ત્યક્તશોકૈરિદં વાચ્ય શ્શાસનાદ્ભરતો મમ ॥ 6 ॥
પુરોહિત સ્ત્વાં કુશલં પ્રાહ સર્વે ચ મંત્રિણઃ ।
ત્વરમાણશ્ચ નિર્યાહિ કૃત્યમાત્યયિકં ત્વયા ॥ 7 ॥
મા ચાસ્મૈ પ્રોષિતં રામં મા ચાસ્મૈ પિતરં મૃતમ્ ।
ભવંત શ્શંસિષુર્ગત્વા રાઘવાણામિમં ક્ષયમ્ ॥ 8 ॥
કૌશેયાનિ ચ વસ્ત્રાણિ ભૂષણાનિ વરાણિ ચ ।
ક્ષિપ્રમાદય રાજ્ઞશ્ચ ભરતસ્ય ચ ગચ્છત ॥ 9 ॥
દત્તપથ્યશના દૂતા જગ્મુસ્સ્વં સ્વં નિવેશનમ્ ।
કેકયાં સ્તે ગમિષ્યંતો હયાનારુહ્ય સંમતાન્ ॥ 10 ॥
તતઃ પ્રાસ્થાનિકં કૃત્વા કાર્યશેષમનંતરમ્ ।
વસિષ્ઠેનાભ્યનુજ્ઞાતા દૂતા સ્સંત્વરિતા યયુઃ ॥ 11 ॥
ન્યંતેનાપરતાલસ્ય પ્રલંબસ્યોત્તરં પ્રતિ ।
નિષેવમાણા સ્તે જગ્મુર્નદીં મધ્યેન માલિનીમ્ ॥ 12 ॥
તે હસ્તિનાપુરે ગંગાં તીર્ત્વા પ્રત્યઙ્મુખા યયુઃ ।
પાંચાલદેશમાસાદ્ય મધ્યેન કુરુજાંગલમ્ ॥ 13 ॥
સરાંસિ ચ સુપૂર્ણાનિ નદીશ્ચ વિમલોદકાઃ ।
નિરીક્ષમાણા સ્તે જગ્મુર્દૂતાઃ કાર્યવશાદ્દ્રુતમ્ ॥ 14 ॥
તે પ્રસન્નોદકાં દિવ્યાં નાનાવિહગસેવિતામ્ ।
ઉપાતિજગ્મુર્વેગેન શરદંડાં જનાકુલામ્ ॥ 15 ॥
નિકૂલવૃક્ષમાસાદ્ય દિવ્યં સત્યોપયાચનમ્ ।
અભિગમ્યાભિવાદ્યં તં કુલિંગાં પ્રાવિશન્પુરીમ્ ॥ 16 ॥
આભિકાલં તતઃ પ્રાપ્ય તે બોધિભવનાચ્ચ્યુતામ્ ।
પિતૃપૈતામહીં પુણ્યાં તેરુરિક્ષુમતીં નદીમ્ ॥ 17 ॥
અવેક્ષ્યાંજલિપાનાંશ્ચ બ્રાહ્મણાન્વેદપારગાન્ ।
યયુર્મધ્યેન બાહ્લીકાન્ સુદામાનં ચ પર્વતમ્ ॥ 18 ॥
વિષ્ણોઃ પદં પ્રેક્ષમાણા વિપાશાંચાપિ શાલ્મલીમ્ ।
નદીર્વાપી સ્તટાકાનિ પલ્વલાનિ સરાંસિ ચ ॥ 19 ॥
પશ્યંતો વિવિધાંશ્ચાપિ સિંહાવ્યાઘ્રમૃગ દ્વિપાન્ ।
યયુઃ પથાઽતિમહતા શાસનં ભર્તુરીપ્સવઃ ॥ 20 ॥
તે શ્રાંતવાહના દૂતા વિકૃષ્ણેન પથા તતઃ ।
ગિરિવ્રજં પુરવરં શીઘ્રમાસેદુરંજસા ॥ 21 ॥
ભર્તુઃ પ્રિયાર્થં કુલરક્ષણાર્થં ભર્તુશ્ચ વંશસ્ય પરિગ્રહાર્થમ્ ।
અહેડમાના સ્ત્વરયા સ્મ દૂતા રાત્ર્યાંતુ તે તત્પુરમેવ યાતાઃ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે અષ્ટષષ્ટિતમસ્સર્ગઃ ॥
