শ্রীমদ্বাল্মীকীয় রামাযণে অয়োধ্য়াকাংডম্ ।
অথ অষ্টষষ্টিতমস্সর্গঃ ।
তেষাং হি বচনং শ্রুত্বা বসিষ্ঠঃ প্রত্য়ুবাচ হ ।
মিত্রামাত্যগণান্সর্বান্ব্রাহ্মণাংস্তানিদং বচঃ ॥ 1 ॥
যদসৌ মাতুলকুলে দত্তরাজ্য়ং পরং সুখী ।
ভরতো বসতি ভ্রাত্রা শত্রুঘ্নেন সমন্বিতঃ ॥ 2 ॥
তচ্ছীঘ্রং জবনা দূতা গচ্ছংতু ত্বরিতৈর্হয়ৈঃ ।
আনেতুং ভ্রাতরৌ বীরৌ কিং সমীক্ষামহে বযম্ ॥ 3 ॥
গচ্ছংত্বিতি তত স্সর্বে বসিষ্ঠং বাক্যমব্রুবন্ ।
তেষাং তদ্বচনং শ্রূত্বা বসিষ্ঠো বাক্যমব্রবীত্ ॥ 4 ॥
এহি সিদ্ধার্থ বিজয় জয়ংতাশোক নংদন ।
শ্রূযতামিতি কর্তব্য়ং সর্বানেব ব্রবীমি বঃ ॥ 5 ॥
পুরং রাজগৃহং গত্বা শীঘ্রং শীঘ্রজবৈ র্হয়ৈঃ ।
ত্যক্তশোকৈরিদং বাচ্য় শ্শাসনাদ্ভরতো মম ॥ 6 ॥
পুরোহিত স্ত্বাং কুশলং প্রাহ সর্বে চ মংত্রিণঃ ।
ত্বরমাণশ্চ নির্য়াহি কৃত্যমাত্যয়িকং ত্বয়া ॥ 7 ॥
মা চাস্মৈ প্রোষিতং রামং মা চাস্মৈ পিতরং মৃতম্ ।
ভবংত শ্শংসিষুর্গত্বা রাঘবাণামিমং ক্ষযম্ ॥ 8 ॥
কৌশেয়ানি চ বস্ত্রাণি ভূষণানি বরাণি চ ।
ক্ষিপ্রমাদয় রাজ্ঞশ্চ ভরতস্য় চ গচ্ছত ॥ 9 ॥
দত্তপথ্যশনা দূতা জগ্মুস্স্বং স্বং নিবেশনম্ ।
কেকয়াং স্তে গমিষ্য়ংতো হয়ানারুহ্য় সংমতান্ ॥ 10 ॥
ততঃ প্রাস্থানিকং কৃত্বা কার্যশেষমনংতরম্ ।
বসিষ্ঠেনাভ্যনুজ্ঞাতা দূতা স্সংত্বরিতা যয়ুঃ ॥ 11 ॥
ন্য়ংতেনাপরতালস্য় প্রলংবস্য়োত্তরং প্রতি ।
নিষেবমাণা স্তে জগ্মুর্নদীং মধ্য়েন মালিনীম্ ॥ 12 ॥
তে হস্তিনাপুরে গংগাং তীর্ত্বা প্রত্যঙ্মুখা যয়ুঃ ।
পাংচালদেশমাসাদ্য় মধ্য়েন কুরুজাংগলম্ ॥ 13 ॥
সরাংসি চ সুপূর্ণানি নদীশ্চ বিমলোদকাঃ ।
নিরীক্ষমাণা স্তে জগ্মুর্দূতাঃ কার্যবশাদ্দ্রুতম্ ॥ 14 ॥
তে প্রসন্নোদকাং দিব্য়াং নানাবিহগসেবিতাম্ ।
উপাতিজগ্মুর্বেগেন শরদংডাং জনাকুলাম্ ॥ 15 ॥
নিকূলবৃক্ষমাসাদ্য় দিব্য়ং সত্য়োপয়াচনম্ ।
অভিগম্য়াভিবাদ্য়ং তং কুলিংগাং প্রাবিশন্পুরীম্ ॥ 16 ॥
আভিকালং ততঃ প্রাপ্য় তে বোধিভবনাচ্চ্য়ুতাম্ ।
পিতৃপৈতামহীং পুণ্য়াং তেরুরিক্ষুমতীং নদীম্ ॥ 17 ॥
অবেক্ষ্য়াংজলিপানাংশ্চ ব্রাহ্মণান্বেদপারগান্ ।
যয়ুর্মধ্য়েন বাহ্লীকান্ সুদামানং চ পর্বতম্ ॥ 18 ॥
বিষ্ণোঃ পদং প্রেক্ষমাণা বিপাশাংচাপি শাল্মলীম্ ।
নদীর্বাপী স্তটাকানি পল্বলানি সরাংসি চ ॥ 19 ॥
পশ্য়ংতো বিবিধাংশ্চাপি সিংহাব্য়াঘ্রমৃগ দ্বিপান্ ।
যয়ুঃ পথাঽতিমহতা শাসনং ভর্তুরীপ্সবঃ ॥ 20 ॥
তে শ্রাংতবাহনা দূতা বিকৃষ্ণেন পথা ততঃ ।
গিরিব্রজং পুরবরং শীঘ্রমাসেদুরংজসা ॥ 21 ॥
ভর্তুঃ প্রিয়ার্থং কুলরক্ষণার্থং ভর্তুশ্চ বংশস্য় পরিগ্রহার্থম্ ।
অহেডমানা স্ত্বরয়া স্ম দূতা রাত্র্য়াংতু তে তত্পুরমেব যাতাঃ ॥ 22 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে অষ্টষষ্টিতমস্সর্গঃ ॥
