ශ්රීමද්වාල්මීකීය රාමායණේ කිෂ්කිංධාකාංඩම් ।
අථ විංශස්සර්ගඃ ।
රාමචාපවිසෘෂ්ටේන ශරේණාංතකරේණ තම් ।
දෘෂ්ට්වා විනිහතං භූමෞ තාරා තාරාධිපානනා ॥ 1 ॥
සා සමාසාද්ය භර්තාරං පර්යෂ්වජත භාමිනී ।
ඉෂුණාऽභිහතං දෘෂ්ට්වා වාලිනං කුංජරෝපමම් ॥ 2 ॥
වානරේංද්ර මහේංද්රාභං ශෝකසංතප්තමානසා ।
තාරා තරුමිවෝන්මූලං පර්යදේවයදාතුරා ॥ 3 ॥
රණේ දාරුණ වික්රාංත ප්රවීර ප්ලවතාං වර ।
කිං දීනාමපුරෝභාගාමද්ය ත්වං නාභිභාෂසේ ॥ 4 ॥
උත්තිෂ්ඨ හරිශාර්දූල භජස්ව ශයනෝත්තමම් ।
නෛවංවිධාශ්ශේරතේ හි භූමෞ නෘපතිසත්තමාඃ ॥ 5 ॥
අතීව ඛලු තේ කාංතා වසුධා වසුධාධිප ।
ගතාසුරපි යාං ගාත්රෛර්මාං විහාය නිෂේවසේ ॥ 6 ॥
ව්යක්තමන්යා ත්වයා වීර ධර්මතඃ සංප්රවර්තිතා ।
කිෂ්කිංධේව පුරී රම්යා ස්වර්ගමාර්ගේ විනිර්මිතා ॥ 7 ॥
යාන්යස්මාභිස්ත්වයා සාර්ධං වනේෂු මධුගංධිෂු ।
විහෘතානි ත්වයා කාලේ තේෂාමුපරමඃ කෘතඃ ॥ 8 ॥
නිරානංදා නිරාශාऽහං නිමග්නා ශෝකසාගරේ ।
ත්වයි පංචත්වමාපන්නේ මහායූථපයූථපේ ॥ 9 ॥
හෘදයං සුස්ථිරං මහ්යං දෘෂ්ට්වා විනිහතං පතිම් ।
යන්න ශෝකාභිසංතප්තං ස්ඵුටතේऽද්ය සහස්රධා ॥ 10 ॥
සුග්රීවස්ය ත්වයා භාර්යා හෘතා ස ච විවාසිතඃ ।
යත්තු ත්තස්ය ත්වයා ව්යුෂ්ටිඃ ප්රාප්තේයං ප්ලවගාධිප ॥ 11 ॥
නිශ්ශ්රේයසපරා මෝහාත්ත්වයා චාහං විගර්හිතා ।
යෛෂාऽබ්රුවං හිතං වාක්යං වානරේංද්ර හිතෛෂිණී ॥ 12 ॥
රූපයෞවනදෘප්තානාං දක්ෂිණානාං ච මානද ।
නූනමප්සරසාමාර්ය චිත්තානි ප්රමථිෂ්යසි ॥ 13 ॥
කාලෝ නිස්සංශයෝ නූනං ජීවිතාංතකරස්තව ।
බලාද්යේනාවපන්නෝऽසි සුග්රීවස්යාවශෝ වශම් ॥ 14 ॥
වෛධව්යං ශෝකසංතාපං කෘපණං කෘපණා සතී ।
අදුඃඛෝපචිතා පූර්වං වර්තයිෂ්යාම්යනාථවත් ॥ 15 ॥
ලාලිතශ්චාංගදෝ වීරස්සුකුමාරස්සුඛෝචිතඃ ।
වර්ත්ස්යතේ කාමවස්ථාං මේ පිතෘව්යේ ක්රෝධමූර්ඡිතේ ॥ 16 ॥
කුරුෂ්ව පිතරං පුත්ර සුදෘෂ්ටං ධර්මවත්සලම් ।
දුර්ලභං දර්ශනං වත්ස තව තස්ය භවිෂ්යති ॥ 17 ॥
සමාශ්වාසය පුත්රං ත්වං සංදේශං සංදිශස්ව මේ ।
මූර්ධ්නි චෛනං සමාඝ්රාය ප්රවාසං ප්රස්ථිතෝ හ්යසි ॥ 18 ॥
රාමේණ හි මහත්කර්ම කෘතං ත්වාමභිනිඝ්නතා ।
ආනෘණ්යං ච ගතං තස්ය සුග්රීවස්ය ප්රතිශ්රවේ ॥ 19 ॥
සකාමෝ භව සුග්රීව රුමාං ත්වං ප්රතිපත්ස්යසේ ।
භුංක්ෂව රාජ්යමනුද්විග්නශ්ශස්තෝ භ්රාතා රිපුස්තව ॥ 20 ॥
කිං මාමේවං විලපතීං ප්රේම්ණා ත්වං නාභිභාෂසේ ।
ඉමාඃ පශ්ය වරා බහ්වීර්භාර්යාස්තේ වානරේශ්වර ॥ 21 ॥
තස්යා විලපිතං ශ්රුත්වා වානර්යස්සර්වතශ්ච තාඃ ।
පරිගෘහ්යාංගදං දීනං දුඃඛාර්තා පරිචුක්රුශුඃ ॥ 22 ॥
කිමංගදං සාංගදවීරබාහෝ විහාය යාස්යද්ය චිරප්රවාසම් ।
න යුක්තමේවං ගුණසන්නිකෘෂ්ටං විහාය පුත්රං ප්රියපුත්ර ගංතුම් ॥ 23 ॥
කිමප්රියං තේ ප්රිය චාරුවේෂ මයා කෘතං නාථ සුතේන වා තේ ।
සහාංගදාං මාං ප්රවිහාය වීර යත්ප්රස්ථිතෝ දීර්ඝ මිතඃ ප්රවාසම් ॥ 24 ॥
යද්යප්රියං කිංචිදසංප්රධාර්ය කෘතං මයා ස්යාත්තව දීර්ඝබාහෝ ।
ක්ෂමස්ව මේ තද්ධරිවංශනාථ ව්රජාමි මූර්ධ්නා තව වීර පාදෞ ॥ 25 ॥
තථා තු තාරා කරුණං රුදංතී භර්තුස්සමීපේ සහ වානරීභිඃ ।
ව්යවස්යත ප්රායමුපෝපවේෂ්ටු මනිංද්යවර්ණා භුවි යත්ර වාලී ॥ 26 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ විංශස්සර්ගඃ ॥
