শ্রীমদ্বাল্মীকীয় রামাযণে বালকাংডম্ ।
অথ একসপ্ততিতমস্সর্গঃ ।
এবং ব্রুবাণং জনকঃ প্রত্য়ুবাচ কৃতাংজলিঃ ।
শ্রোতুমর্হসি ভদ্রং তে কুলং নঃ পরিকীর্তিতম্ ॥ 1 ॥
প্রদানে হি মুনিশ্রেষ্ঠ কুলং নিরবশেষতঃ ।
বক্তব্য়ং কুলজাতেন তন্নিবোধ মহামুনে ॥ 2 ॥
রাজাঽভূত্ ত্রিষু লোকেষু বিশ্রুত স্স্বেন কর্মণা ।
নিমিঃ পরমধর্মাত্মা সর্বসত্ত্ববতাং বরঃ ॥ 3 ॥
তস্য় পুত্রোমিথির্নাম মিথিলা যেন নির্মিতা ।
প্রথমো জনকো নাম জনকাদপ্য়ুদাবসুঃ ॥ 4 ॥
উদাবসোস্তু ধর্মাত্মা জাতো বৈ নংদিবর্ধনঃ ।
নংদিবর্ধনপুত্রস্তু সুকেতুর্নাম নামতঃ ॥ 5 ॥
সুকেতোরপি ধর্মাত্মা দেবরাতো মহাবলঃ ।
দেবরাতস্য় রাজর্ষের্বৃহদ্রথ ইতি স্মৃতঃ ॥ 6 ॥
বৃহদ্রথস্য় শূরোঽভূন্মহাবীরঃ প্রতাপবান্ ।
মহাবীরস্য় ধৃতিমান্ সুধৃতিস্সত্যবিক্রমঃ ॥ 7 ॥
সুধৃতেরপি ধর্মাত্মা দৃষ্টকেতুস্সুধার্মিকঃ ।
দৃষ্টকেতোস্তু রাজর্ষের্হর্যশ্ব ইতি বিশ্রুতঃ ॥ 8 ॥
হর্যশ্বস্য় মরুঃ পুত্রো মরোঃ পুত্রঃ প্রতিংধকঃ ।
প্রতিংধকস্য় ধর্মাত্মা রাজা কীর্তিরথস্সুতঃ ॥ 9 ॥
পুত্রঃ কীর্তিরথস্য়াপি দেবমীঢ ইতি স্মৃতঃ ।
দেবমীঢস্য় বিবুধো বিবুধস্য় মহীধ্রকঃ ॥ 10 ॥
মহীধ্রকসুতো রাজা কীর্তিরাতো মহাবলঃ ।
কীর্তিরাতস্য় রাজর্ষের্মহারোমা ব্যজাযত ॥ 11 ॥
মহারোম্ণস্তু ধর্মাত্মা স্বর্ণরোমা ব্যজাযত ।
স্বর্ণরোম্ণস্তু রাজর্ষের্হ্রস্বরোমা ব্যজাযত ॥ 12 ॥
তস্য় পুত্রদ্বয়ং জজ্ঞে ধর্মজ্ঞস্য় মহাত্মনঃ ।
জ্য়েষ্ঠোঽহমনুজো ভ্রাতা মম বীরঃ কুশধ্বজঃ ॥ 13 ॥
মাং তু জ্য়েষ্ঠং পিতা রাজ্য়ে সোঽভিষিচ্য় নরাধিপঃ ।
কুশধ্বজং সমাবেশ্য় ভারং ময়ি বনং গতঃ ॥ 14 ॥
বৃদ্ধে পিতরি স্বর্য়াতে ধর্মেণ ধুরমাবহম্ ।
ভ্রাতরং দেবসংকাশং স্নেহাত্পশ্যন্ কুশধ্বজম্ ॥ 15 ॥
কস্য় চিত্ত্বথকালস্য় সাংকাশ্য়াদগমত্পুরাত্ ।
সুধন্বা বীর্যবান্রাজা মিথিলামবরোধকঃ ॥ 16 ॥
স চ মে প্রেষয়ামাস শৈবং ধনুরনুত্তমম্ ।
সীতা কন্য়া চ পদ্মাক্ষী মহ্য়ং বৈ দীযতামিতি ॥ 17 ॥
তস্য়াপ্রদানাদ্ব্রহ্মর্ষে যুদ্ধমাসীন্ময়া সহ ।
স হতোঽভিমুখো রাজা সুধন্বা তু ময়া রণে ॥ 18 ॥
নিহত্য় তং মুনিশ্রেষ্ঠ সুধন্বানং নরাধিপম্ ।
সাংকাশ্য়ে ভ্রাতরং বীরমভ্যষিংচং কুশধ্বজম্ ॥ 19 ॥
কনীয়ানেষ মে ভ্রাতা অহং জ্য়েষ্ঠো মহামুনে ।
দদামি পরমপ্রীতো বধ্বৌ তে মুনিপুংগব ॥ 20 ॥
সীতাং রামায় ভদ্রং তে ঊর্মিলা লক্ষ্মণায় চ ।
বীর্যশুল্কাং মম সুতাং সীতাং সুরসুতোপমাম্ ॥ 21 ॥
দ্বিতীয়ামূর্মিলাং চৈব ত্রির্দদামি ন সংশয়ঃ ।
দদামি পরমপ্রীতো বধ্বৌ তে রঘুনংদন ॥ 22 ॥
রামলক্ষ্মণয়ো রাজন্ গোদানং কারযস্ব হ ।
পিতৃকার্য়ং চ ভদ্রং তে ততো বৈবাহিকং কুরু ॥ 23 ॥
মখা হ্যদ্য় মহাবাহো তৃতীয়ে দিবসে প্রভো ।
ফল্গুন্য়ামুত্তরে রাজংস্তস্মিন্বৈবাহিকং কুরু ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে বালকাংডে একসপ্ততিতমস্সর্গঃ ॥
