শ্রীমদ্বাল্মীকীয় রামাযণে অরণ্যকাংডম্ ।
অথ একোনসপ্ততিতমস্সর্গঃ ।
কৃত্বৈবমুদকং তস্মৈ প্রস্থিতৌ রামলক্ষ্মণৌ ।
অবেক্ষংতৌ বনে সীতাং পশ্চিমাং জগ্মতুর্দিশম্ ॥ 1 ॥
তৌ দিশং দক্ষিণাং গত্বা শরচাপাসিধারিণৌ ।
অবিপ্রহতমৈক্ষ্বাকৌ পংথানং প্রতিপেদতুঃ ॥ 2 ॥
গুল্মৈর্বৃক্ষৈশ্চ বহুভির্লতাভিশ্চ প্রবেষ্টিতম্ ।
আবৃতং সর্বতো দুর্গং গহনং ঘোরদর্শনম্ ॥ 3 ॥
ব্যতিক্রম্য় তু বেগেন ব্য়ালসিংহনিষেবিতম্ ।
সুভীমং তন্মহারণ্য়ং ব্যতিয়াতৌ মহাবলৌ ॥ 4 ॥
ততঃ পরং জনস্থানাতত্রিক্রোশং গম্য় রাঘবৌ ।
ক্রৌংচারণ্য়ং বিবিশতুর্গহনং তৌ মহৌজসৌ ॥ 5 ॥
নানামেঘঘনপ্রখ্য়ং প্রহৃষ্টমিব সর্বতঃ ।
নানাপক্ষিগণৈর্য়ুক্তং নানাব্য়ালমৃগৈর্য়ুতম্ ॥ 6 ॥
দিদৃক্ষমাণৌ বৈদেহীং তদ্বনং তৌ বিচিক্যতুঃ ।
তত্র তত্রাবতিষ্ঠংতৌ সীতাহরণকর্শিতৌ ॥ 7 ॥
ততঃ পূর্বেণ তৌ গত্বা ত্রিক্রোশং ভ্রাতরৌ তদা ।
ক্রৌংচারণ্যমতিক্রম্য় মতংগাশ্রমমংতরা ॥ 8 ॥
দৃষ্ট্বা তু তদ্বনং ঘোরং বহুভীমমৃগদ্বিজম্ ।
ননাসত্ত্বসমাকীর্ণং সর্বং গহনপাদপম্ ॥ 9 ॥
দদৃশাতে তু তৌ তত্র দরীং দশরথাত্মজৌ ।
পাতালসমগংভীরাং তমসা নিত্যসংবৃতাম্ ॥ 10 ॥
আসাদ্য় তৌ নরব্য়াঘ্রৌ দর্য়াস্তস্য়াবিদূরতঃ ।
দদৃশাতে মহারূপাং রাক্ষসীং বিকৃতাননাম্ ॥ 11 ॥
ভযদামল্পসত্ত্বানাং বীভত্সাং রৌদ্রদর্শনাম্ ।
লংবোদরীং তীক্ষ্ণদংষ্ট্রাং করালীং পরুষত্বচম্ ॥ 12 ॥
ভক্ষয়ংতীং মৃগান্ভীমান্বিকটাং মুক্তমূর্ধজাম্ ।
প্রৈক্ষেতাং তৌ ততস্তত্র ভ্রাতরৌ রামলক্ষ্মণৌ ॥ 13 ॥
সা সমাসাদ্য় তৌ বীরৌ ব্রজংতং ভ্রাতুরগ্রতঃ ।
এহি রংস্য়াবহেত্য়ুক্ত্বা সমালংবত লক্ষ্মণম্ ॥ 14 ॥
উবাচ চৈনং বচনং সৌমিত্রিমুপগূহ্য় সা ।
অহং ত্বয়োমুখী নাম লব্ধা তে ত্বমসি প্রিয়ঃ ॥ 15 ॥
নাথ পর্বতকূটেষু নদীনাং পুলিনেষু চ ।
আয়ুশ্শেষমিমং বীর ত্বং ময়া সহ রংস্যসে ॥ 16 ॥
এবমুক্তস্তু কুপিতঃ খড্গমুদ্ধৃত্য় লক্ষ্মণঃ ।
কর্ণনাসাস্তনং তস্য়া নিচকর্তারিসূদনঃ ॥ 17 ॥
কর্ণনাসে নিকৃত্তে তু বিস্বরং সা বিনদ্য় চ ।
যথাগতং প্রদুদ্রাব রাক্ষসী ভীমদর্শনা ॥ 18 ॥
তস্য়াং গতায়াং গহনং ব্রজংতৌ বনমোজসা ।
আসেদতুরমিত্রঘ্নৌ ভ্রাতরৌ রামলক্ষ্মণৌ ॥ 19 ॥
লক্ষ্মণস্তু মহাতেজাস্সত্ত্ববান্ শীলবান্ শুচিঃ ।
অব্রবীত্প্রাংজলির্বাক্য়ং ভ্রাতরং দীপ্ততেজসম্ ॥ 20 ॥
স্পংদতে চ দৃঢং বাহুরুদ্বিগ্নমিব মে মনঃ ।
প্রাযশশ্চাপ্যনিষ্টানি নিমিত্তান্য়ুপলক্ষয়ে ॥ 21 ॥
তস্মাত্সজ্জীভবার্য় ত্বং কুরুষ্ব বচনং হিতম্ ।
মমৈব হি নিমিত্তানি সদ্যশ্শংসংতি সংভ্রমম্ ॥ 22 ॥
এষ বংচুলকো নাম পক্ষী পরমদারুণঃ ।
আবয়োর্বিজয়ং যুদ্ধে শংসন্নিব বিনর্দতি ॥ 23 ॥
তয়োরন্বেষতোরেবং সর্বং তদ্বনমোজসা ।
সংজজ্ঞে বিপুলঃ শব্দো প্রভংজন্নিব তদ্বনম্ ॥ 24 ॥
সংবেষ্টিতমিবাত্যর্থং গগনং মাতরিশ্বনা ।
বনস্য় তস্য় শব্দোঽভূদ্দিবমাপূরযন্নিব ॥ 25 ॥
তং শব্দং কাংক্ষমাণস্তু রামঃ কক্ষে সহানুজঃ ।
দদর্শ সুমহাকায়ং রাক্ষসং বিপুলোদরম্ ॥ 26 ॥
আসেদতুস্ততস্তত্র তাবুভৌ প্রমুখে স্থিতম্ ।
বিবৃদ্ধমশিরোগ্রীবং কবংধমুদরে মুখম্ ॥ 27 ॥
রোমভির্নিচিতৈস্তীক্ষ্ণৈর্মহাগিরিমিবোছ্রিতম্ ।
নীলমেঘনিভং রৌদ্রং মেঘস্তনিতনিস্বনম্ ॥ 28 ॥
অগ্নিজ্বালানিকাশেন ললাটস্থেন দীপ্যতা ।
মহাপক্ষ্মেণ পিংগেন বিপুলেনাযতেন চ ॥ 29 ॥
একেনোরসি ঘোরেণ নযনেনাশুদর্শিনা ।
মহাদংষ্ট্রোপপন্নং তল্লেলিহানং মহামুখম্ ॥ 30 ॥
ভক্ষয়ংতং মহাঘোরানৃক্ষসিংহমৃগদ্বিপান্ ।
ঘোরৌ ভুজৌ বিকুর্বাণমুভৌ যোজনমাযতৌ ॥ 31 ॥
করাভ্য়াং বিবিধান্গৃহ্যঋক্ষান্পক্ষিগণান্মৃগান্ ।
আকর্ষংতং বিকর্ষংতমনেকান্মৃগয়ূথপান্ ॥ 32 ॥
স্থিতমাবৃত্য় পংথানং তয়োর্ভ্রাত্রোঃ প্রপন্নয়োঃ ।
অথ তৌ সমভিক্রম্য় ক্রোশমাত্রে দদর্শতুঃ ॥ 33 ॥
মহাংতং দারুণং ভীমং কবংধং ভুজসংবৃম্ ।
কবংধমিব সংস্থানাদতিঘোরপ্রদর্শনম্ ॥ 34 ॥
স মহাবাহুরত্যর্থং প্রসার্য় বিপুলৌ ভুজৌ ।
জগ্রাহ সহিতাবেব রাঘবৌ পীডযন্বলাত্ ॥ 35 ॥
খড্গিনৌ দৃঢধন্বানৌ তিগ্মতেজোবপুর্ধরৌ ।
ভ্রাতরৌ বিবশং প্রাপ্তৌ কৃষ্যমাণৌ মহাবলৌ ॥ 36 ॥
তত্র ধৈর্য়েণ শূরস্তু রাঘবো নৈব বিব্যথে ।
বাল্য়াদনাশ্রযত্বাচ্চ লক্ষ্মণস্ত্বতিবিব্যথে ॥ 37 ॥
উবাচ স বিষণ্ণস্সন্রাঘবং রাঘবানুজঃ ।
পশ্য় মাং বীর বিবশং রাক্ষসস্য় বশং গতম্ ॥ 38 ॥
ময়ৈকেন বিনির্য়ুক্তঃ পরিমুংচস্ব রাঘব ।
মাং হি ভূতবলিং দত্বা পলাযস্ব যথাসুখম্ ॥ 39 ॥
অধিগংতাসি বৈদেহীমচিরেণেতি মে মতিঃ ।
প্রতিলভ্য় চ কাকুত্স্থ পিতৃপৈতামহীং মহীম্ ॥ 40 ॥
তত্র মাং রাম রাজ্যস্থস্স্মর্তুমর্হসি সর্বদা ।
লক্ষ্মণেনৈবমুক্তস্তু রামস্সৌমিত্রিমব্রবীত্ ॥ 41 ॥
মা স্ম ত্রাসং কৃথা বীর ন হি ত্বাদৃগ্বিষীদতি ।
এতস্মিন্নংতরে ক্রূরো ভ্রাতরৌ রামলক্ষ্মণৌ ॥ 42 ॥
পপ্রচ্ছ ঘননির্ঘোষঃ কবংধো দানবোত্তমঃ ।
কৌ যুবাং বৃষভস্কংধৌ মহাখড্গধনুর্ধরৌ ॥ 43 ॥
ঘোরং দেশমিমং প্রাপ্তৌ মম ভক্ষাবুপস্থিতৌ ।
বদতং কার্যমিহ বাং কিমর্থং চাগতৌ যুবাম্ ॥ 44 ॥
ইমং দেশমনুপ্রাপ্তৌ ক্ষুধার্তস্য়েহ তিষ্ঠতঃ ।
সবাণচাপখড্গৌ চ তীক্ষ্ণশৃংগাবিবর্ষভৌ ॥ 45 ॥
মমাস্যমনুসংপ্রাপ্তৌ দুর্লভং জীবিতং পুনঃ ।
তস্য় তদ্বচনং শ্রুত্বা কবংধস্য় দুরাত্মনঃ ॥ 46 ॥
উবাচ লক্ষ্মণং রামো মুখেন পরিশুষ্যতা ।
কৃচ্ছ্রাত্ কৃচ্ছ্রতরং প্রাপ্য় দারুণং সত্যবিক্রমঃ ॥ 47 ॥
ব্যসনং জীবিতাংতায় প্রাপ্তমপ্রাপ্য় তাং প্রিয়াম্ ।
কালস্য় সুমহদ্বীর্য়ং সর্বভূতেষু লক্ষ্মণ ॥ 48 ॥
ত্বাং চ মাং চ নরব্য়াঘ্র ব্যসনৈঃ পশ্য় মোহিতৌ ।
নাতিভারোস্তি কালস্য় সর্বভূতেষু লক্ষ্মণ ॥ 49 ॥
শূরাশ্চ বলবংতশ্চ কৃতাস্ত্রাশ্চ রণাজিরে ।
কালাভিপন্নাস্সীদংতি যথা বালুকসেতবঃ ॥ 50 ॥
ইতি ব্রুবাণো দৃঢসত্যবিক্রমো মহাযশা দাশরথিঃ প্রতাপবান্ ।
অবেক্ষ্য় সৌমিত্রিমুদগ্রপৌরুষং স্থিরাং তদা স্বাং মতিমাত্মনাঽকরোত্ ॥ 51 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অরণ্যকাংডে একোনসপ্ততিতমস্সর্গঃ ॥
