শ্রীমদ্বাল্মীকীয় রামাযণে অয়োধ্য়াকাংডম্ ।
অথ ত্রিংশস্সর্গঃ ।
সাংত্ব্যমানা তু রামেণ মৈথিলী জনকাত্মজা ।
বনবাসনিমিত্তায় ভর্তারমিদমব্রবীত্ ॥ 1 ॥
সা তমুত্তমসংবিগ্না সীতা বিপুলবক্ষসম্ ।
প্রণয়াচ্চাভিমানাচ্চ পরিচিক্ষেপ রাঘবম্ ॥ 2 ॥
কিং ত্বাঽমন্যত বৈদেহঃ পিতা মে মিথিলাধিপঃ ।
রাম জামাতরং প্রাপ্য় স্ত্রিয়ং পুরুষবিগ্রহম্ ॥ 3 ॥
অনৃতং বত লোকোঽযমজ্ঞানাদ্যদি বক্ষ্যতি ।
তেজো নাস্তি পরং রামে তপতীব দিবাকরে ॥ 4 ॥
কিং হি কৃত্বা বিষণ্ণস্ত্বং কুতো বা ভযমস্তি তে ।
যত্পরিত্যক্তুকামস্ত্বং মামনন্যপরাযণাম্ ॥ 5 ॥
দ্য়ুমত্সেনসুতং বীর সত্যবংতমনুব্রতাম্ ।
সাবিত্রীমিব মাং বিদ্ধি ত্বমাত্মবশবর্তিনীম্ ॥ 6 ॥
ন ত্বহং মনসাঽপ্যন্য়ং দ্রষ্টাঽস্মি ত্বদৃতেঽনঘ ।
ত্বয়া রাঘব গচ্ছেয়ং যথাঽন্য়া কুলপাংসিনী ॥ 7 ॥
স্বয়ং তু ভার্য়াং কৌমারীং চিরমধ্য়ুষিতাং সতীম্ ।
শৈলূষ ইব মাং রাম পরেভ্য়ো দাতুমিচ্ছসি ॥ 8 ॥
যস্য় পথ্য়ং চ রামাঽত্থ যস্য় চার্থেঽবরুধ্যসে ।
ত্বং তস্য় ভব বশ্যশ্চ বিধেযশ্চ সদাঽনঘ ॥ 9 ॥
স মামনাদায় বনং ন ত্বং প্রস্থাতুমর্হসি ।
তপো বা যদি বাঽরণ্য়ং স্বর্গো বা স্য়াত্সহ মে ত্বয়া ॥ 10 ॥
ন চ মে ভবিতা তত্র কশ্চিত্পথি পরিশ্রমঃ ।
পৃষ্ঠতস্তব গচ্ছংত্য়া বিহারশযনেষ্বিব ॥ 11 ॥
কুশকাশশরেষীকা যে চ কংটকিনো দ্রুমাঃ ।
তূলাজিনসমস্পর্শা মার্গে মম সহ ত্বয়া ॥ 12 ॥
মহাবাতসমুদ্ধূতং যন্মামপকরিষ্যতি ।
রজো রমণ তন্মন্য়ে পরার্থ্যমিব চংদনম্ ॥ 13 ॥
শাদ্বলেষু যথা শিশ্য়ে বনাংতে বনগোচর ।
কুথাস্তরণতল্পেষু কিং স্য়াত্সুখতরং ততঃ ॥ 14 ॥
পত্রং মূলং ফলং যত্ত্বমল্পং বা যদি বা বহু ।
দাস্যসি স্বযমাহৃত্য় তন্মেঽমৃতরসোপমম্ ॥ 15 ॥
ন মাতুর্ন পিতুস্তত্র স্মরিষ্য়ামি ন বেশ্মনঃ ।
আর্তবান্য়ুপভুংজানা পুষ্পাণি চ ফলানি চ ॥ 16 ॥
ন চ তত্র ততঃ কিংচিদ্দ্রষ্টুমর্হসি বিপ্রিযম্ ।
মত্কৃতে ন চ তে শোকো ন ভবিষ্য়ামি দুর্ভরা ॥ 17 ॥
য স্ত্বয়া সহ স স্বর্গো নিরয়ো যস্ত্বয়া বিনা ।
ইতি জানন্পরাং প্রীতিং গচ্ছ রাম ময়া সহ ॥ 18 ॥
অথ মামেবমব্যগ্রাং বনং নৈব নয়িষ্যতি ।
বিষমদ্য়ৈব পাস্য়ামি মা বিশং দ্বিষতাং গমম্ ॥ 19 ॥
পশ্চাদপি হি দুঃখেন মম নৈবাস্তি জীবিতম্ ।
উজ্ঝিতায়াস্ত্বয়া নাথ তদৈব মরণং বরম্ ॥ 20 ॥
ইমং হি সহিতুং শোকং মুহূর্তমপি নোত্সহে ।
কিং পুনর্দশবর্ষাণি ত্রীণি চৈকং চ দুঃখিতা ॥ 21 ॥
ইতি সা শোকসংতপ্তা বিলপ্য় করুণং বহু ।
চুক্রোশ পতিমাযস্তা ভৃশমালিংগ্য় সস্বরম্ ॥ 22 ॥
সা বিদ্ধা বহুভির্বাক্য়ৈর্দিগ্ধৈরিব গজাংগনা ।
চিরসন্নিযতং বাষ্পং মুমোচাগ্নিমিবারণিঃ ॥ 23 ॥
তস্য়া স্ফটিকসংকাশং বারি সংতাপসংভবম্ ।
নেত্রাভ্য়াং পরিসুস্রাব পংকজাভ্য়ামিবোদকম্ ॥ 24 ॥
তচ্চৈবামলচংদ্রাভং মুখমাযতলোচনম্ ।
পর্যশুষ্যত বাষ্পেণ জলোদ্ধৃতমিবাংবুজম্ ॥ 25 ॥
তাং পরিষ্বজ্য় বাহুভ্য়াং বিসংজ্ঞামিব দুঃখিতাম্ ।
উবাচ বচনং রামঃ পরিবিশ্বাসয়ংস্তদা ॥ 26 ॥
ন দেবি তব দুঃখেন স্বর্গমপ্যভিরোচয়ে ।
ন হি মেঽস্তি ভয়ং কিংচিত্স্বয়ংভোরিব সর্বতঃ ॥ 27 ॥
তব সর্বমভিপ্রাযমবিজ্ঞায় শুভাননে ।
বাসং ন রোচয়েঽরণ্য়ে শক্তিমানপি রক্ষণে ॥ 28 ॥
যত্সৃষ্টাঽসি ময়া সার্ধং বনবাসায় মৈথিলি ।
ন বিহাতুং ময়া শক্য়া কীর্তিরাত্মবতা যথা ॥ 29 ॥
ধর্মস্তু গজনাসোরু সদ্ভিরাচরিতঃ পুরা ।
তং চাহমনুবর্তেঽদ্য় যথা সূর্য়ং সুবর্চলা ॥ 30 ॥
ন খল্বহং ন গচ্ছেয়ং বনং জনকনংদিনি ।
বচনং তন্নযতি মাং পিতু স্সত্য়োপবৃংহিতম্ ॥ 31 ॥
এষ ধর্মস্তু সুশ্রোণি পিতুর্মাতুশ্চ বশ্যতা ।
অতশ্চ তং ব্যতিক্রম্য় নাহং জীবিতুমুত্সহে ॥ 32 ॥
অস্বাধীনং কথং দৈবং প্রকারৈরভিরাধ্যতে ।
স্বাধীনং সমতিক্রম্য় মাতরং পিতরং গুরুম্ ॥ 33 ॥
যত্ত্রয়ং তত্ত্রয়ো লোকাঃ পবিত্রং তত্সমং ভুবি ।
নান্যদস্তি শুভাপাংগে তেনেদমভিরাধ্যতে ॥ 34 ॥
ন সত্য়ং দানমানৌ বা ন যজ্ঞাশ্চাপ্তদক্ষিণাঃ ।
তথা বলকরা স্সীতে যথা সেবা পিতুর্হিতা ॥ 35 ॥
স্বর্গো ধনং বা ধান্য়ং বা বিদ্য়াঃ পুত্রাস্সুখানি চ ।
গুরুবৃত্ত্যনুরোধেন ন কিংচিদপি দুর্লভম্ ॥ 36 ॥
দেবগংধর্বগোলোকান্ব্রহ্মলোকাং স্তথাঽপরান্ ।
প্রাপ্নুবংতি মহাত্মানো মাতাপিতৃপরাযণাঃ ॥ 37 ॥
স মাং পিতা যথা শাস্তি সত্যধর্মপথে স্থিতঃ ।
তথা বর্তিতুমিচ্ছামি স হি ধর্মস্সনাতনঃ ॥ 38 ॥
মম সন্না মতিস্সীতে ত্বাং নেতুং দংডকাবনম্ ।
বসিষ্য়ামীতি সা ত্বং মামনুয়াতুং সুনিশ্চিতা ॥ 39 ॥
সা হি সৃষ্টাঽনবদ্য়াংগি বনায় মদিরেক্ষণে ।
অনুগচ্ছস্ব মাং ভীরু সহধর্মচরী ভব ॥ 40 ॥
সর্বথা সদৃশং সীতে মম স্বস্য় কুলস্য় চ ।
ব্যবসাযমনুক্রাংতা কাংতে ত্বমতিশোভনম্ ॥ 41 ॥
আরভস্ব শুভশ্রোণি বনবাসক্ষমাঃ ক্রিয়াঃ ।
নেদানীং ত্বদৃতে সীতে স্বর্গোঽপি মম রোচতে ॥ 42 ॥
ব্রাহ্মণেভ্যশ্চ রত্নানি ভিক্ষুকেভ্যশ্চ ভোজনম্ ।
দেহি চাশংসমানেভ্য় স্সংত্বরস্ব চ মা চিরম্ ॥ 43 ॥
ভূষণানি মহার্হাণি বরবস্ত্রাণি যানি চ ।
রমণীয়াশ্চ যে কেচিত্ক্রীডার্থাশ্চাপ্য়ুপস্করাঃ ॥ 44 ॥
শযনীয়ানি যানানি মম চান্য়ানি যানি চ ।
দেহি স্বভৃত্যবর্গস্য় ব্রাহ্মণানামনংতরম্ ॥ 45 ॥
অনুকূলং তু সা ভর্তুর্জ্ঞাত্বা গমনমাত্মনঃ ।
ক্ষিপ্রং প্রমুদিতা দেবী দাতুমেবোপচক্রমে ॥ 46 ॥
ততঃ প্রহৃষ্টা প্রতিপূর্ণমানসা যশশ্বিনী ভর্তুরবেক্ষ্য় ভাষিতম্ ।
ধনানি রত্নানি চ দাতুমংগনা প্রচক্রমে ধর্মভৃতাং মনস্স্বিনী ॥ 47 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে অয়োধ্য়াকাংডে ত্রিংশস্সর্গঃ ॥
