শ্রীমদ্বাল্মীকীয় রামাযণে সুংদরকাংডম্ ।
অথ অষ্টাদশস্সর্গঃ ।
তথা বিপ্রেক্ষ্যমাণস্য় বনং পুষ্পিতপাদপম্ ।
বিচিন্বতশ্চ বৈদেহীং কিংচিচ্ছেষা নিশাঽভবত্ ॥ 1 ॥
ষডংগবেদবিদুষাং ক্রতুপ্রবরয়াজিনাম্ ।
শুশ্রাব ব্রহ্মঘোষাংশ্চ স বিরাত্রে ব্রহ্মরক্ষসাম্ ॥ 2 ॥
অথ মংগলবাদিত্রশব্দৈঃ শ্রুতিমনোহরৈঃ ।
প্রাবুধ্যত মহাবাহুর্দশগ্রীবো মহাবলঃ ॥ 3 ॥
বিবুধ্যতু যথাকালং রাক্ষসেংদ্রঃ প্রতাপবান্ ।
স্রস্তমাল্য়াংবরধরো বৈদেহীমন্বচিংতযত্ ॥ 4 ॥
ভৃশং নিয়ুক্তস্তস্য়াং চ মদনেন মদোত্কটঃ ।
ন স তং রাক্ষসঃ কামং শশাকাত্মনি গূহিতুম্ ॥ 5 ॥
স সর্বাভরণৈর্য়ুক্তো বিভ্রচ্ছ্রিযমনুত্তমাম্ ।
তাং নগৈর্বহুভির্জুষ্টাং সর্বপুষ্পফলোপগৈঃ ॥ 6 ॥
বৃতাং পুষ্করিণীভিশ্চ নানাপুষ্পোপশোভিতাম্ ।
সদা মদৈশ্চ বিহগৈর্বিচিত্রাং পরমাদ্ভুতাম্ ॥ 7 ॥
ঈহামৃগৈশ্চ বিবিধৈর্জুষ্টাং দৃষ্টিমনোহরৈঃ ।
বীধীঃ সংপ্রেক্ষমাণশ্চ মণিকাংচনতোরণাঃ ॥ 8 ॥
নানামৃগগণাকীর্ণাং ফলৈঃ প্রপতিতৈর্বৃতাম্ ।
অশোকবনিকামেব প্রাবিশত্সংততদ্রুমাম্ ॥ 9 ॥
অংগনাশতমাত্রং তু তং ব্রজংতমনুব্রজত্ ।
মহেংদ্রমিব পৌলস্ত্য়ং দেবগংধর্বয়োষিতঃ ॥ 10 ॥
দীপিকাঃ কাংচনীঃ কাশ্চিজ্জগৃহুস্তত্র যোষিতঃ ।
বালব্যজনহস্তাশ্চ তালবৃংতানি চাপরাঃ ॥ 11 ॥
কাংচনৈরপি ভৃংগারৈর্জহ্রুঃ সলিলমগ্রতঃ ।
মংডলাগ্রান্ বৃসীশ্চাপি গৃহ্য়ান্য়াঃ পৃষ্ঠতো যয়ুঃ ॥ 12 ॥
কাচিদ্রত্নময়ীং স্থালীং পূর্ণাং পানস্য় ভামিনী ।
দক্ষিণা দক্ষিণেনৈব তদা জগ্রাহ পাণিনা ॥ 13 ॥
রাজহংসপ্রতীকাশং ছত্রং পূর্ণশশিপ্রভম্ ।
সৌবর্ণদংডমপরা গৃহীত্বা পৃষ্ঠতো যয়ৌ ॥ 14 ॥
নিদ্রামদপরীতাক্ষ্য়ো রাবণস্য়োত্তমাঃ স্ত্রিয়ঃ ।
অনুজগ্মুঃ পতিং বীরং ঘনং বিদ্য়ুল্লতা ইব ॥ 15 ॥
ব্য়াবিদ্ধহারকেয়ূরাঃ সমামৃদিতবর্ণকাঃ ।
সমাগলিতকেশাংতাঃ সস্বেদবদনাস্তথা ॥ 16 ॥
ঘূর্ণংত্য়ো মদশেষেণ নিদ্রয়া চ শুভাননাঃ ।
স্বেদক্লিষ্টাংগকুসুমাস্সুমাল্য়াকুলমূর্ধজাঃ ॥ 17 ॥
প্রয়াংতং নৈঋতপতিং নার্য়ো মদিরলোচনাঃ ।
বহুমানাচ্চ কামাচ্চ প্রিয়া ভার্য়াস্তমন্বয়ুঃ ॥ 18 ॥
স চ কামপরাধীনঃ পতিস্তাসাং মহাবলঃ ।
সীতাসক্তমনা মংদো মংদাংচিতগতির্বভৌ ॥ 19 ॥
ততঃ কাংচীনিনাদং চ নূপুরাণাং চ নিস্বনম্ ।
শুশ্রাব পরমস্ত্রীণাং স কপির্মারুতাত্মজঃ ॥ 20 ॥
তং চাপ্রতিমকর্মাণমচিংত্যবলপৌরুষম্ ।
দ্বারদেশমনুপ্রাপ্তং দদর্শ হনুমান্ কপিঃ ॥ 21 ॥
দীপিকাভিরনেকাভিঃ সমংতাদবভাসিতম্ ।
গংধতৈলাবসিক্তাভির্ধ্রিযমাণাভিরগ্রতঃ ॥ 22 ॥
কামদর্পমদৈর্য়ুক্তং জিহ্মতাম্রাযতেক্ষণম্ ।
সমক্ষমিব কংদর্পমপবিদ্ধশরাসনম্ ॥ 23 ॥
মথিতামৃতফেনাভমরজোবস্ত্রমুত্তমম্ ।
সলীলমনুকর্ষংতং বিমুক্তং সক্তমংগদে ॥ 24 ॥
তং পত্রবিটপে লীনঃ পত্রপুষ্পঘনাবৃতঃ ।
সমীপমিব সংক্রাংতং নিধ্য়াতুমুপচক্রমে ॥ 25 ॥
অবেক্ষমাণস্তু ততো দদর্শ কপিকুংজরঃ ।
রূপয়ৌবনসংপন্না রাবণস্য় বরস্ত্রিয়ঃ ॥ 26 ॥
তাভিঃ পরিবৃতো রাজা সুরূপাভির্মহাযশাঃ ।
তন্মৃগদ্বিজসংঘুষ্টং প্রবিষ্টঃ প্রমদাবনম্ ॥ 27 ॥
ক্ষীবো বিচিত্রাভরণঃ শংকুকর্ণো মহাবলঃ ।
তেন বিশ্রবসঃ পুত্রঃ স দৃষ্টো রাক্ষসাধিপঃ ॥ 28 ॥
বৃতঃ পরমনারীভিস্তারাভিরিব চংদ্রমাঃ ।
তং দদর্শ মহাতেজাস্তেজোবংতং মহাকপিঃ ॥ 29 ॥
রাবণোঽয়ং মহাবাহুরিতি সংচিংত্য় বানরঃ ।
অবপ্লুতো মহাতেজা হনুমান্মারুতাত্মজঃ ॥ 30 ॥
স তথাপ্য়ুগ্রতেজাঃ সন্নির্ধূতস্তস্য় তেজসা ।
পত্রগুহ্য়াংতরে সক্তো হনুমান্ সংবৃতোঽভবত্ ॥ 31 ॥
স তামসিতকেশাংতাং সুশ্রোণীং সংহতস্ত্নীম্ ।
দিদৃক্ষুরসিতাপাংগামুপাবর্তত রাবণঃ ॥ 32 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে সুংদরকাংডে অষ্টাদশস্সর্গঃ ॥
