শ্রীমদ্বাল্মীকীয় রামাযণে কিষ্কিংধাকাংডম্ ।
অথ একোনচত্বারিংশস্সর্গঃ ।
ইতি ব্রুবাণং সুগ্রীবং রামো ধর্মভৃতাং বরঃ ।
বাহুভ্য়াং সংপরিষ্বজ্য় প্রত্য়ুবাচ কৃতাংজলিম্ ॥ 1 ॥
যদিংদ্রো বর্ষতে বর্ষং ন তচ্চিত্রং ভবেত্ক্বচিত্ ।
আদিত্য়ো বা সহস্রাংশুঃ কুর্য়াদ্বিতিমিরং নভঃ ॥ 2 ॥
চংদ্রমা রশ্মিভিঃ কুর্য়াত্পৃথিবীং সৌম্য় নির্মলাম্ ।
ত্বদ্বিধো বাঽপি মিত্রাণাং প্রতিকুর্য়াত্পরংতপ ॥ 3 ॥
এবং ত্বয়ি ন তচ্চিত্রং ভবেদ্যত্সৌম্য় শোভনম্ ।
জানাম্যহং ত্বাং সুগ্রীব সততং প্রিযবাদিনম্ ॥ 4 ॥
ত্বত্সনাথঃ সখে সংখ্য়ে জেতাঽস্মি সকলানরীন্ ।
ত্বমেব মে সুহৃতন্মিত্রং সাহায়্য়ং কর্তুমর্হসি ॥ 5 ॥
জহারাত্মবিনাশায় বৈদেহীং রাক্ষসাধমঃ ।
বংচয়িত্বা তু পৌলোমীমনুহ্লাদো যথা শচীম্ ॥ 6 ॥
ন চিরাত্তং হনিষ্য়ামি রাবণং নিশিতৈশ্শরৈঃ ।
পৌলোম্য়াঃ পিতরং দৃপ্তং শতক্রতুরিবাঽহবে ॥ 7 ॥
এতস্মিন্নংতরে চৈব রজস্সমভিবর্তত ।
উষ্ণাং তীব্রাং সহস্রাংশোশ্ছাদযদ্গগনে প্রভাম্ ॥ 8 ॥
দিশঃ পর্য়াকুলাশ্চাসন্রজসা তেন মূর্ছতা ।
চচাল চ মহী সর্বা সশৈলবনকাননা ॥ 9 ॥
ততো নগেংদ্রসংকাশৈস্তীক্ষ্ণদংষ্ট্রৈর্মহাবলৈঃ ।
কৃত্স্না সংছাদিতা ভূমিরসংখ্য়েয়ৈঃ প্লবংগমৈঃ ॥ 10 ॥
নিমেষাংতরমাত্রেণ ততস্তৈর্হরিয়ূথপৈঃ ।
কোটীশতপরীবারৈঃ কামরূপিভিরাবৃতা ॥ 11 ॥
নাদেয়ৈঃ পার্বতীয়ৈশ্চ সামুদ্রৈশ্চ মহাবলৈঃ ।
হরিভির্মেঘনির্হ্রাদৈরন্য়ৈশ্চ বনচারিভিঃ ॥ 12 ॥
তরুণাদিত্যবর্ণৈশ্চ শশিগৌরৈশ্চ বানরৈঃ ।
পদ্মকেসরবর্ণৈশ্চ শ্বেতৈর্মেরুকৃতালয়ৈঃ ॥ 13 ॥
কোটীসহস্রৈর্দশভিঃ শ্রীমান্পরিবৃতস্তদা ।
বীরশ্শতবলির্নাম বানরঃ প্রত্যদৃশ্যত ॥ 14 ॥
ততঃ কাংচনশৈলাভস্তারায়া বীর্যবান্পিতা ।
অনেকৈর্দশসাহস্রৈঃ কোটিভিঃ প্রত্যদৃশ্যত ॥ 15 ॥
তথাঽপরেণ কোটীনাং সহস্রেণ সমন্বিতঃ ।
পিতা রুমায়া সংপ্রাপ্তস্সুগ্রীবশ্বশুরো বিভুঃ ॥ 16 ॥
পদ্মকেসরসংকাশস্তরুণার্কনিভাননঃ ।
বুদ্ধিমান্বানরশ্রেষ্ঠস্সর্ববানরসত্তমঃ ॥ 17 ॥
অনেকৈর্বহুসাহস্রৈর্বানরাণাং সমন্বিতঃ ।
পিতা হনুমতশ্রশীমান্কেসরী প্রত্যদৃশ্যত ॥ 18 ॥
গোলাংগূলমহারাজো গবাক্ষো ভীমবিক্রমঃ ।
বৃতঃ কোটিসহস্রেণ বানরাণামদৃশ্যত ॥ 19 ॥
ঋক্ষাণাং ভীমবেগানাং ধূম্রশ্শত্রুনিবর্হণঃ ।
বৃতঃ কোটিসহস্রাভ্য়াং দ্বাভ্য়াং সমভিবর্তত ॥ 20 ॥
মহাচলনিভৈর্ঘোরৈঃ পনসো নাম যূথপঃ ।
আজগাম মহাবীর্যস্তিসৃভিঃ কোটিভির্বৃতঃ ॥ 21 ॥
নীলাংজনচয়াকারো নীলো নামাঽথ যূথপঃ ।
অদৃশ্যত মহাকায়ঃ কোটিভির্দশভির্বৃতঃ ॥ 22 ॥
ততঃ কাংচনশৈলাভো গবয়ো নাম যূথপঃ ।
আজগাম মহাবীর্য়ঃ পংচভিঃ কোটিভির্বৃতঃ ॥ 23 ॥
দরীমুখশ্চ বলবান্য়ূথপোঽভ্য়াযয়ৌ তদা ।
বৃতঃ কোটিসহস্রেণ সুগ্রীবং সমুপস্থিতঃ ॥ 24 ॥
মৈংদশ্চ দ্বিবিদশ্চোভাবশ্বিপুত্রৌ মহাবলৌ ।
কোটিকোটিসহস্রেণ বানরাণামদৃশ্যতাম্ ॥ 25 ॥
গজশ্চ বলবান্ বীরঃ কোটিভিস্তিসৃভির্বৃতঃ ।
আজগাম মহাতেজা সুগ্রীবস্য় সমীপতঃ ॥ 26 ॥
ঋক্ষরাজো মহাতেজা জাংববান্নাম নামতঃ ।
কোটিভির্দশভিঃ প্রাপ্তঃ সুগ্রীবস্য় বশে স্থিতঃ ॥ 27 ॥
রুমণ্বান্নাম বিক্রাংতো বানরো বানরেশ্বরম্ ।
আযয়ৌ বলবাংস্তূর্ণং কোটীশতসমাবৃতঃ ॥ 28 ॥
ততঃ কোটিসহস্রাণাং সহস্রেণ শতেন চ ।
পৃষ্ঠতোঽনুগতঃ প্রাপ্তো হরিভির্গংধমাদনঃ ॥ 29 ॥
ততঃ পদ্মসহস্রেণ বৃতশ্শংকুশতেন চ ।
যুবরাজোঽংগদঃ প্রাপ্তঃ পিতৃতুল্যপরাক্রমঃ ॥ 30 ॥
ততস্তারাদ্য়ুতিস্তারো হরির্ভীমপরাক্রমঃ ।
পংচভির্হরিকোটীভির্দূরতঃ প্রত্যদৃশ্যত ॥ 31 ॥
ইংদ্রজানুঃ কপির্বীরো যূথপঃ প্রত্যদৃশ্যত ।
একাদশানাং কোটীনামীশ্বরস্তৈস্সমাবৃতঃ ॥ 32 ॥
ততো রংভস্ত্বনুপ্রাপ্তস্তরুণাদিত্যসন্নিভঃ ।
অয়ুতেনাবৃতশ্চৈব সহস্রেণ শতেন চ ॥ 33 ॥
ততো যূথপতির্বীরো দুর্মুখো নাম বানরঃ ।
প্রত্যদৃশ্যত কোটীভ্য়াং দ্বাভ্য়াং পরিবৃতো বলী ॥ 34 ॥
কৈলাসশিখরাকারৈর্বানরৈর্ভীমবিক্রমৈঃ ।
বৃতঃ কোটিসহস্রেণ হনুমান্প্রত্যদৃশ্যত ॥ 35 ॥
নলশ্চাপি মহাবীর্যস্সংবৃতো দ্রুমবাসিভিঃ ।
কোটীশতেন সংপ্রাপ্তস্সহস্রেণ শতেন চ ॥ 36 ॥
ততো দধিমুখশ্রীমান্কোটিভির্দশভির্বৃতঃ ।
সংপ্রাপ্তোঽভিমতস্তস্য় সুগ্রীবস্য় মহাত্মনঃ ॥ 37 ॥
শরভঃ কুমুদো বহ্নির্বানরো রংহ এব চ ।
এতে চান্য়ে চ বহবো বানরাঃ কামরূপিণঃ ॥ 38 ॥
আবৃত্য় পৃথিবীং সর্বাং পর্বতাংশ্চ বনানি চ ।
যূথপা স্সমনুপ্রাপ্তা স্তেষাং সংখ্য়া ন বিদ্যতে ॥ 39 ॥
আগতাশ্চ বিশিষ্টাশ্চ পৃথিব্য়াং সর্ববানরাঃ ।
আপ্লবংতঃ প্লবংতশ্চ গর্জংতশ্চ প্লবংগমাঃ ।
অভ্যবর্তংত সুগ্রীবং সূর্যমভ্রগণা ইব ॥ 40 ॥
কুর্বাণা বহুশব্দাংশ্চ প্রহৃষ্টা বাহুশালিনঃ ।
শিরোভির্বানরেংদ্রায় সুগ্রীবায় ন্যবেদযন্ ॥ 41 ॥
অপরে বানরশ্রেষ্ঠাস্সংগম্য় চ যথোচিতম্ ।
সুগ্রীবেণ সমাগম্য় স্থিতাঃ প্রাংজলয় স্তদা ॥ 42 ॥
সুগ্রীবস্ত্বরিতো রামে সর্বাংস্তাং বানররর্ষভান্ ।
নিবেদয়িত্বা ধর্মজ্ঞঃ স্থিতঃ প্রাংজলিরব্রবীত্ ॥ 43 ॥
যথাসুখং পর্বতনিঝরেষু বনেষু সর্বেষু চ বানরেংদ্রাঃ ।
নিবেশয়িত্বা বিধিবদ্বলানি বলং বলজ্ঞঃ প্রতিপত্তুমীষ্টে ॥ 44 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে একোনচত্বারিংশস্সর্গঃ ॥
