শ্রীমদ্বাল্মীকীয় রামাযণে কিষ্কিংধাকাংডম্ ।
অথ ষড্বিংশস্সর্গঃ ।
ততশ্শোকাভিসংতপ্তং সুগ্রীবং ক্লিন্নবাসসম্ ।
শাখামৃগমহামাত্রাঃ পরিবার্য়োপতস্থিরে ॥ 1 ॥
অভিগম্য় মহাবাহুং রামমক্লিষ্টকারিণম্ ।
স্থিতাঃ প্রাংজলযস্সর্বে পিতামহমিবর্ষয়ঃ ॥ 2 ॥
ততঃ কাংচনশৈলাভ স্তরুণার্কনিভাননঃ ।
অব্রবীত্প্রাংজলির্বাক্য়ং হনূমান্মারুতাত্মজঃ ॥ 3 ॥
ভবত্প্রসাদাত্সুগ্রীবঃ পিতৃপৈতামহং মহত্ ।
বানরাণাং সুদুষ্প্রাপং প্রাপ্তো রাজ্যমিদং প্রভো ॥ 4 ॥
ভবতা সমনুজ্ঞাতঃ প্রবিশ্য় নগরং শুভম্ ॥ 5 ॥
সংবিধাস্যতি কার্য়াণি সর্বাণি সসুহৃজ্জনঃ ।
স্নাতোঽয়ং বিবিধৈর্গংধৈরৌষধৈশ্চ যথাবিধি ॥ 6 ॥
অর্চয়িষ্যতি রত্নৈশ্চ মাল্য়ৈশ্চ ত্বাং বিশেষতঃ ।
ইমাং গিরিগুহাং রম্য়ামভিগংতুমিতোঽর্হসি ॥ 7 ॥
কুরুষ্ব স্বামিসংবংধং বানরান্সংপ্রহর্ষয় ।
এবমুক্তো হনুমতা রাঘবঃ পরবীরহা ॥ 8 ॥
প্রত্য়ুবাচ হনূমংতং বুদ্ধিমান্বাক্যকোবিদঃ ।
চতুর্দশ সমাস্সৌম্য় গ্রামং বা যদি বা পুরম্ ॥ 9 ॥
ন প্রবেক্ষ্য়ামি হনুমন্পিতুর্নির্দেশপালকঃ ।
সুসমৃদ্ধাং গুহাং রম্য়াং সুগ্রীবো বানরর্ষভঃ ॥ 10 ॥
প্রবিষ্টো বিধিবদ্বীরঃ ক্ষিপ্রং রাজ্য়েঽভিষিচ্যতাম্ ।
এবমুক্ত্বা হনূমংতং রামস্সুগ্রীবমব্রবীত্ ॥ 11 ॥
বৃত্তজ্ঞো বৃত্তসংপন্নমুদারবলবিক্রমম্ ।
ইমমপ্য়ংগদং বীর যৌবরাজ্য়েঽভিষেচয় ॥ 12 ॥
জ্য়েষ্ঠস্য় স সুতো জ্য়েষ্ঠস্সদৃশো বিক্রমেণ তে ।
অংগদোঽযমদীনাত্মা যৌবরাজ্যস্য় ভাজনম্ ॥ 13 ॥
পূর্বোঽয়ং বার্ষিকো মাসঃ শ্রাবণস্সলিলাগমঃ ।
প্রবৃত্তাস্সৌম্য় চত্বারো মাসা বার্ষিকসজ্ঞিকাঃ ॥ 14 ॥
নাযমুদ্য়োগসময়ঃ প্রবিশ ত্বং পুরীং শুভাম্ ।
অস্মিন্বত্স্য়াম্যহং সৌম্য় পর্বতে সহ লক্ষ্মণঃ ॥ 15 ॥
ইয়ং গিরিগুহা রম্য়া বিশালা যুক্তমারুতা ।
প্রভূতসলিলা সৌম্য় প্রভূতকমলোত্পলা ॥ 16 ॥
কার্তিকে সমনুপ্রাপ্তে ত্বং রাবণবধে যত ।
এষ নস্সমযস্সৌম্য় প্রবিশ ত্বং স্বমালযম্ ॥ 17 ॥
অভিষিক্তস্ব রাজ্য়ে চ সুহৃদস্সংপ্রহর্ষয় ।
ইতি রামাভ্যনুজ্ঞাতস্সুগ্রীবো বানরাধিপঃ ॥ 18 ॥
প্রবিবেশ পুরীং রম্য়াং কিষ্কিংধাং বালিপালিতাম্ ।
তং বানরসহস্রাণি প্রবিষ্টং বানরেশ্বরম্ ॥ 19 ॥
অভিবাদ্য় প্রবিষ্টানি সর্বতঃ পর্যবারযন্ ।
ততঃ প্রকৃতযস্সর্বা দৃষ্ট্বা হরিগণেশ্বরম্ ॥ 20 ॥
প্রণম্য় মূর্ধ্না পতিতা বসুধায়াং সমাহিতাঃ ।
সুগ্রীবঃ প্রকৃতীস্সর্বাস্সংভাষ্য়োত্থাপ্য় বীর্যবান্ ॥ 21 ॥
ভ্রাতুরংতঃপুরং সৌম্য়ং প্রবিবেশ মহাবলঃ ।
প্রবিশ্য় ত্বভিনিষ্ক্রাংতং সুগ্রীবং প্লবগেশ্বরম্ ॥ 22 ॥
অভ্যষিংচংত সুহৃদস্সহস্রাক্ষমিবামরাঃ ।
তস্য় পাংডুরমাজহ্রুশ্ছত্রং হেমপরিষ্কৃতম্ ॥ 23 ॥
শুক্লে চ বালব্যজনে হেমদংডে যশস্করে ।
তথা সর্বাণি রত্নানি সর্ববীজৌষধীরপি ॥ 24 ॥
সক্ষীরাণাং চ বৃক্ষাণাং প্ররোহান্কুসুমানি চ ।
শুক্লানি চৈব বস্ত্রাণি শ্বেতং চৈবানুলেপনম্ ॥ 25 ॥
সুগংধীনি চ মাল্য়ানি স্থলজান্য়ংবুজানি চ ।
চংদনানি চ দিব্য়ানি গংধাংশ্চ বিবিধান্বহূন্ ॥ 26 ॥
অক্ষতং জাতরূপং চ প্রিয়ংগুমধুসর্পিষী ।
দধি চর্ম চ বৈয়াঘ্রং বারাহী চাপ্য়ুপানহৌ ॥ 27 ॥
সমালংভনমাদায় রোচনাং সমনশ্শিলাম্ ।
আগ্মুস্তত্র মুদিতা বরাঃ কন্য়াস্তু ষোডশ ॥ 28 ॥
ততস্তে বানরশ্রেষ্ঠং যথাকালং যথাবিধি ।
রত্নৈর্বস্ত্রৈশ্চ ভক্ষ্য়ৈশ্চ তোষয়িত্বা দ্বিজর্ষভান্ ॥ 29 ॥
ততঃ কুশপরিস্তীর্ণং সমিদ্ধং জাতবেদসম্ ।
মংত্রপূতেন হবিষা হুত্বা মংত্রবিদো জনাঃ ॥ 30 ॥
ততো হেমপ্রতিষ্ঠানে বরাস্তরণসংবৃতে ।
প্রাসাদশিখরে রম্য়ে চিত্রমাল্য়োপশোভিতে ॥ 31 ॥
প্রাঙ্মুখং বিবিধৈর্মংত্রৈঃ স্থাপয়িত্বা বরাসনে ।
নদীনদেভ্যস্সংহৃত্য় তীর্থেভ্যশ্চ সমংততঃ ॥ 32 ॥
আহৃত্য় চ সমুদ্রেভ্যস্সর্বেভ্য়ো বানরর্ষভাঃ ।
অপঃ কনককুংভেষু নিধায় বিমলাশ্শুভাঃ ॥ 33 ॥
শুভৈর্বৃষভশৃংগৈশ্চ কলশৈশ্চাপি কাংচনৈঃ ।
শাস্ত্রদৃষ্টেন বিধিনা মহর্ষিবিহিতেন চ ॥ 34 ॥
গজো গবাক্ষো গবযশ্শরভো গংধমাদনঃ ।
মৈংদশ্চ দ্বিবিদশ্চৈব হনুমান্জাংববান্নলঃ ॥ 35 ॥
অভ্যষিংচংত সুগ্রীবং প্রসন্নেন সুগংধিনা ।
সলিলেন সহস্রাক্ষং বসবো বাসবং যথা ॥ 36 ॥
অভিষিক্তে তু সুগ্রীবে সর্বে বানরপুংগবাঃ ।
প্রচুক্রুশুর্মহাত্মানো হৃষ্টা স্তত্র সহস্রশঃ ॥ 37 ॥
রামস্য় তু বচঃ কুর্বন্সুগ্রীবো হরিপুংগবঃ ।
অংগদং সংপরিষ্বজ্য় যৌবরাজ্য়েঽভ্যষেচযত্ ॥ 38 ॥
অংগদে চাভিষিক্তে তু সানুক্রোশাঃ প্লবংগমাঃ ।
সাধু সাধ্বিতি সুগ্রীবং মহাত্মানোঽভ্যপূজযন্ ॥ 39 ॥
রামং চৈব মহাত্মানং লক্ষ্মণং চ পুনঃ পুনঃ ।
প্রীতাশ্চ তুষ্টুবুস্সর্বে তাদৃশে তত্র বর্তিতে ॥ 40 ॥
হৃষ্টপুষ্টজনাকীর্ণা পতাকাধ্বজশোভিতা ।
বভূব নগরী রম্য়া কিষ্কিংধা গিরিগহ্বরে ॥ 41 ॥
নিবেদ্য় রামায় তদা মহাত্মনে মহাভিষেকং কপিবাহিনীপতিঃ ।
রুমাং চ ভার্য়ং প্রতিলভ্য় বীর্যবা নবাপ রাজ্য়ং ত্রিদশাধিপো যথা ॥ 42 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে ষড্বিংশস্সর্গঃ ॥
